Jesu o itše: “Ditaba tše tše dibotse tša Mmušo di tla bolelwa lefaseng ka moka gore e be bohlatse go ditšhaba tšohle, ke moka bofelo bo tla tla.” (Mat. 24:14) Wepesaete ya jw.org e ipontšhitše e le sedirišwa se se atlegago kudu sa go fihlelela batho ba “ditšhaba tšohle” ka nako e kopana yeo e šetšego pele bofelo bo fihla.

Banyalani ba bangwe ba baromiwa kua Dihlakahlakeng tša Solomon ba be ba nea bohlatse motsaneng wa kgauswi le lewatle moo go thewago dihlapi gomme ba kopana le banna ba bane. Ba ile ba lemoga gore banna bao ba be ba swere megalathekeng, ka gona ba ba botšiša ge e ba ba kgona go tsena Inthaneteng. Ba ile ba re ba a kgona. Banyalani ba  ba ile ba ba bontšha kamoo ba ka tsenago wepesaeteng ya jw.org, kamoo ba ka hwetšago leleme la bona, kamoo ba ka taoneloutago dimakasine tša rena le Beibele le kamoo ba ka dirišago karolo ya mabapi le malapa le bana. Ge baromiwa ba ba le bodireding, ba ipshina ka go bontšha bana bidio e rego Pray Anytime. Ka morago ga gore sehlopha sa bana bao ba bego ba kgahlegile se bogele bidio yeo, se ile sa kitimela ka dithokgweng tša moo se opela ka gore: “Anytime, anywhere, I can pray . . . ”

Ka mo tlase ke a mangwe a mangwalo a mantši a ditebogo ao a amogetšwego ntlongkgolo ya rena ya lefase ya New York:

“Nna le monna wa ka re hudugetše Mexico, gomme re leka go ithuta Sepanishi gore re kgone go botša motho le ge e le ofe yo re kopanago le yena ditaba tše dibotse. Nako le nako ge ke tsena wepesaeteng ya jw.org, ke leboga Jehofa ka gobane e nthušitše go theetša le go ithuta. Wepesaete ye e na le dilo tše dintši ka maleme a mantši kudu—go na le dimakasine, dipuku, mmino le diterama. Ke a le leboga e bile ke a le rata ka baka la modiro wa lena o mogolo.”—D.H. kua Mexico.

“Ga ke bone gabotse eupša ke rata Wepesaete ya lena kudu ka gobane e na le dilo tše dintši tšeo nka di theetšago. Ke le ngwaletše gore ke le kgothaletše go tšwela pele le tsenya dipuku tša lena tše dintši, diporoutšha le dikgatišo tše dingwe ka MP3 (difaele tša go theetšwa feela) ka gobane ke di theetša letšatši ka moka.”—K.G. kua United States.

“Ke rata wepesaete ya jw.org kudu! Go bonolo kudu go e diriša e bile e nkgothaleditše go ba le thuto ya motho ka noši le go fišega bodireding. Ke na le nywaga e 72, ke na le nywaga e 47 ke kolobeditšwe gomme ke butše madibogo ka nywaga e fetago e 30. Ke na le bana ba 9 bao ba  kolobeditšwego e bile ke na le ditlogolo tše 16 le ditlogolwana tše 3. Gona bjale ka lapeng la rena go na le meloko e mene ya babulamadibogo ba ka mehla. Ke leboga Jehofa ka dijo tše tša moya tšeo a re neago tšona ka nako e swanetšego.”—M.T. kua United States.

“Ke ngwala lengwalo le ka iri ya bone ka masa. Ke fela ke fetša mašego ke sa robale ka gobane ke swerwe ke bolwetši bjo bošoro bja multiple sclerosis le mefokolo e mengwe, go etša ge go le bjalo ka bana babo rena ba bangwe ba rategago lefaseng ka bophara. Jehofa o tšwela pele a re hlokomela moyeng, gomme ke rata go le leboga bakeng sa sona seo. Ke ithuta kudu ka diswantšho, ke ka baka leo ke kgongwago kudu ke tsela yeo wepesaete ye e hlamilwego ka yona. Ke leboga kudu dibidio tše kopana le diswantšho tšeo ka moka ga tšona di nago le ditlhaloso tšeo di kwagalago gabotse.”—B.B. kua New Zealand.

“Ke le ngwalela gore ke le leboge. Ke šoma ke le ngaka karolong yeo e lego lekatana ya Sri Lanka moo ke sa kgonego go hwetša dimakasine tša lena ka segagešo. Eupša ke leboga  Wepesaete ya lena ka ge ke kgona go di taonelouta go yona le go di bala ka segagešo. Wepesaete ya lena ke e nngwe ya dimpho tše bohlokwahlokwa tšeo Jehofa a di neilego batho ba go swana le nna.”—N.F. kua Sri Lanka.

“Ke le ngwalela go le leboga ka mošomo o mogolo wo le o dirago wa go thuša batho go ithuta ka Jehofa. Hle tšwelang pele le tsenya dibidio wepesaeteng ya lena ya jw.org. Dibidio tšeo di thušitše nna le lapa la gešo go rarolla mathata. Bidio yeo e nthušitšego kudu ke e rego O ka Fenya Bomphenyašilo Ntle le go lwa. Ke sa buša ke re, re a leboga ka mošomo wa lena o mogolo.”—Y.S. wa nywaga e 9 kua United States.

“Ke rata go leboga lena le Jehofa bakeng sa dijo tša moya tšeo re di hwetšago. Wepesaete ya jw.org e nthušitše kudu, kudukudu karolo ya ‘Bafsa.’ Le gona ke leboga kudu dibidio tše di rego, Eba Mogwera wa Jehofa. Ke na le baratho ba bararo gomme ke bona kamoo tsebišo ye e ba thušago ka gona. Le ge re dula kgole le lena, re borwarre bjo bo nago le botee ka baka la lerato leo re ratago Jehofa ka lona. Ke a leboga.”—A.B. kua Peru.