Ka March 11, 1792, makgoba a makgolo a Maamerika ao a bego a lokolotšwe a ile a kgobokana ka tlase ga Sehlare seo sa Leokodi go keteka go bušetšwa Afrika. Letšatšing leo a ile a thea motse woo o bego o tla a nea kholofelo, e lego motse wa Freetown. Makgoba ao a lokolotšwego a ile a tšwela pele go goroga go fihlela motse wo o na le merafo ya ka godimo ga e 100 ya Maafrika. Badudi ba ba bafsa ba ile ba tšea Sehlare seo sa Leokodi e le leswao la tokologo le kholofelo.

Mo e nyakilego go ba ka nywaga e 100, Dihlatse tša Jehofa kua Sierra Leone di be di dutše di botša baagišani ba tšona gore go tla ba le tokologo ya kgonthe—e lego “tokologo ya letago ya bana ba Modimo.” (Baroma 8:21) Tokologo ye e tla bolela go lokologa bokgobeng bja sebe le lehu ge Mmušo wa Modimo ka Mesia o tliša khutšo le Paradeise mo lefaseng.—Jes. 9:6, 7; 11:6-9.

Nywageng ya ka godimo ga e 50 e fetilego, ofisi ya lekala ya Dihlatse tša Jehofa kua Sierra Leone e be e dutše e okamela le modiro wa go nea bohlatse kua Guinea. Naga ye ya kgauswi le Sierra Leone e ile ya lebeletšana le khuduego ya dipolotiki, ya leago le ya tša boiphedišo, gomme seo sa dira gore badudi ba yona ba bantši ba amogele molaetša o kgothatšago wa Beibele.

Dihlatse tša Jehofa tša Sierra Leone le Guinea di ile tša phatlalatša ditaba tše dibotse gaešita le ge di be di lebeletšane le mathata a mantši. Mathata ao a be a akaretša go tlaišwa mmeleng, bodiidi bjo šoro, go se tsebe go bala le go ngwala, ditumelo tšeo di tsemilego medu, dikarogano tša semorafo le bošoro bjo bo šiišago. Diphihlelo tše di latelago di hlatsela gore bahlanka ba ba Jehofa bao ba botegago ba be ba na le tumelo e matla e bile ba ineetše ka mo go feletšego. Re holofela gore phihlelo ya bona e tla go kgoma pelo le go tiiša tumelo ya gago go “Modimo yo a neago kholofelo.”—Baroma 15:13.