KA 1997, ge mašole a marabele le a mmušo a be a elwa kua Freetown, ke ile ka ithaopela go sepediša mangwalo go tloga Freetown go ya ofising ya lekala ya nakwana kua Conakry, Guinea.

Ge ke be ke le boemapeseng bja toropo yeo, ke ile ka namela pese yeo e bego e na le sehlopha se sengwe sa banna. Kua kgojana go be go lla dithunya gomme seo se re boifiša. Ge re dutše re phatša mebila ya motse, dithunya di be di llela kgauswi le rena. Mootledi wa rena o ile a boela morago gomme a tšea tsela e nngwe. Nakwana ka morago, re ile ra emišwa ke sehlopha sa marabele ao a swerego dithunya gomme a re laela gore re tšwe ka peseng. Ka morago ga gore a re botšološiše, a ile a re dumelela gore re fete. Go se go ye kae re ile ra emišwa ke sehlopha se sengwe sa mašole. Ka ge yo mongwe wa batho bao re bego re nametše le bona a be a tseba molaodi wa ona, a ile a re dumelela gore re fete. Ge re be re feleletša motse, re ile ra kopana le sehlopha sa boraro sa marabele ao a ilego a re botšološiša eupša a re dumelela go tšwela pele ka leeto. Ge re dutše re lebile ka leboa,  re ile ra feta mafelo a mangwe a mantši a go phuruphutša go ba go fihla ge pese ya rena yeo e bego e tletše marole e goroga Conakry mantšiboeng a letšatši leo.

Maetong a fetilego, ke be ke swara mapokisi a dikgatišo, didirišwa tša ka ofising, dipego tša lekala le dilo tša go thuša ka tlhakodišo. Gantši ke be ke sepela ka koloi goba pese e nyenyane. Eupša ka dinako tše dingwe ke be ke romela dikgatišo ka barwadi ba dithoto gaešita le ka diketswana go phatša dinoka le go feta dithokgweng tšeo di ratwago ke pula.

Ka letšatši le lengwe ge ke be ke swere thoto e tšwago Freetown e eya Conakry, pese e nyenyane yeo ke bego ke e nametše e ile ya emišwa mollwaneng ke mašole a marabele. Yo mongwe wa ona o ile a bona merwalo ya ka gomme a thoma go mpotšološiša a gonona. Ka yona nako yeo ke ile ka bona motho yo mongwe yoo ke tsenego le yena sekolo e le yo mongwe wa marabele. Mašole ao a be a mmitša Roughneck, e bile e be e le lešole le sehlogo kudu gare ga sehlopha seo. Ke ile ka botša lešole leo le bego le mpotšološiša gore ke tlile go bona Roughneck, ke moka ka thoma go goeletša Roughneck. Kapejana o ile a lemoga gore ke nna ke moka a nkitimela. Re ile ra gokarelana gomme ra sega. Ge a se na go sega o ile a boela a senya sefahlego.

O ile a mpotšiša gore: “Molato ke’ng?”

Ka fetola ka re: “Ke leka go tshelela kua Guinea.”

Kapejana o ile a laela mašole ao gore a tlogele pese yeo e nyenyane gore e fete e se ya phuruphutšwa.

Ga e sa le go tloga ka letšatši leo, ka mehla ge ke feta lefelong leo Roughneck o be a botša mašole gore a ntlogele ke fete. Ke ile ka nea mašole ao dikopi tša dimakasine tša rena gomme a ile a di thabela kudu. Go se go ye kae ke ge ba mpitša Monna wa le-Watchtower.