Ngwanabo rena yo mongwe kua Indonesia o ile a nea moleti wa dikoloi taletšo ya Segopotšo matšatši a mabedi pele ga tiragalo ye. Moleti yo, yo e bego e le Momoseleme, o ile a botšiša ge e ba a ka tla le batho ba bangwe segopotšong le ge a neilwe taletšo e tee. Ngwanabo rena o ile a mmotša gore a ka tla le ba bangwe. Monna yoo o ile a re o na le lapa le legolo gomme a kgopela ditaletšo  tše di oketšegilego. Ngwanabo rena o ile a mo nea ditaletšo tše 20 gomme a mo hlalosetša gore tiragalo yeo ke Segopotšo sa lehu la Jesu le gore batho ka moka, e ka ba e le Bakriste goba Mamoseleme, ba ka tla. Monna yoo o ile a re o tla tla le batho ba e ka bago ba 60 go ya go ba 70.

Ka moragonyana ga gore polelo ya Segopotšo e thome, go šetše go na le batho ba 248, moleti yola wa dikoloi o ile a fihla le batho ba bangwe ba e ka bago ba 100—e le banna, basadi le bana, go akaretša le batšofadi le mosadi yo a bego a le kgauswi le go belega. Ba be ba hirile dikoloi tše mmalwa gore di ba tliše hoteleng yeo Segopotšo se bego se swaretšwe go yona. Mathomong ge bahlapetši ba hoteleng yeo ba bona lešaba leo la batho, ba ile ba gana ba tsena. Ba ile ba ipotšiša gore go reng lešaba le lekaakaa la Mamoseleme le be le nyaka go kopanela le Bakriste tiragalong yeo. Ka morago ga gore ba bontšhe bahlapetši bao ditaletšo tša bona tša segopotšo, bahlapetši bao ba ile ba ba felegetša holong yeo Segopotšo se bego se swaretšwe go yona. Mo e ka bago batho ba 60 sehlopheng seo ba ile ba dumelelwa go tsena ka holong yeo e bego e tletše wa go falala.

Ka morago ga matšatši a sego kae, ngwanabo rena o ile a etela moleti yola wa dikoloi gomme a mmotšiša ge e ba sehlopha seo a bego a tlile le sona se thabetše lenaneo. Gaešita le ge a ile a dumela gore ba bantši ba be ba lewa ke dihlong tša go tla moo, eupša o ile a re ba thabišitšwe kudu ke gore batho ka moka ba be ba le botho e bile ba ba dumediša ka go ba swara ka matsogo. Ke moka ngwanabo rena o ile a mo laletša polelong e kgethegilego yeo e bego e tlo swarwa Sontaga se se latelago. Lekgeng le o ile a tla le ditho tša lapa tše 40 le baagišani ba gagwe. Ka ge ba ile ba fihla polelo e le kgauswi le go fela, bagolo ba ile ba dira phetho ya gore polelo yeo e newe gape. Modulasetulo o ile a rola polelo yeo gape, a hlalosa morero wa lenaneo ka boripana, gwa akaretšwa kopelo le thapelo. E  le gore seboledi se thuše batho ba bao e bego e le Mamoseleme, polelong ya sona ka moka se be se diriša mantšu ao ba a tlwaetšego, a go swana le gore “Puku e Kgethwa” go e na le gore “Beibele” le “moporofeta Isa” go e na le gore “Jesu.”

Ka morago, mogolo yo mongwe o ile a etela moleti yoo legaeng la gagwe gomme a thoma go boledišana le yena ka Beibele a diriša poroutšha ya Theetša Modimo. Batho ba bangwe ba 12 le bona ba ile ba thoma go ba gona thutong yeo, go akaretša basadi ba bangwe ba Mamoseleme le bana ba sego kae.

Dipese tšeo di tlogago Ulaanbaatar, kua Mongolia, di ralala nageng ye ka moka. Maeto a bjalo a dipese a ka tšea diiri tše 48. Banamedi ba ka kgetha go boga naga ka mafasetere goba go robala. Ga go na dikgatišo tšeo ba ka di balago gaešita le ge batho ba Mongolia ba rata go bala. Ba naganne ka se, bana babo rena ba bangwe Phuthegong ya Songinokhairkhan ba ile ba ya go baotledi ba dipese tšeo gomme ba re: “Re rata go le nea puku e nngwe e botse kudu e le mpho. Ka difofaneng go dula go beilwe dikgatišo tšeo batho ba ka ipalelago tšona. Ge e ba le nagana gore banamedi ba dipese tša lena ba ka rata go bala dikgatišo tše itšego, re ka ba tsenyetša dikgatišo ka mekotleng ya ditulo tša bona.” Baotledi ba seswai ba dipese ba ile ba dumela seo. Ka baka la seo, bana babo rena bao ba ile ba sepediša dimakasine tše 299 le diporoutšha tše 144. Ba ile ba dira le dithulaganyo tša gore kgwedi le kgwedi ba tliše dimakasine tše mpsha ge di se na go gatišwa.

Nageng e nngwe kua Asia, bagolo ba bangwe ba babedi ba ile ba kgopelwa gore ba etele kgaetšedi yo a bego a fodile moyeng ka nywaga e seswai. Ka ge ba be ba sa mo tsebe, bana  babo rena ba ile ba mo founela gomme ba rulaganya go kopana le yena lebenkeleng la gagwe mabenkeleng a itšego a mantši. Ka morago ga go nyakana le lebenkele leo mabenkeleng ao a pitlaganego, mafelelong ba ile ba hwetša lebenkele leo le nago le aterese e swanago le ya kgaetšedi yoo. Ge ba tsena, ba ile ba dumedišwa ke mosadi yo a bego a beile Beibele e nyenyane tesekeng ya gagwe. Ka morago ga gore bana babo rena bao ba mmotšiše sefane, motse wo a tšwago go wona le nywaga ya bana ba gagwe ba babedi, ba ile ba phetha ka gore ke kgaetšedi yo ba nyakanago le yena. Ba ile ba re: “Re bana beno, re Dihlatse tša Jehofa.”

Mosadi yoo o ile a araba a maketše ka gore: “Nna ke Mokriste.” Bana babo rena ba ile ba makatšwa ke tsela yeo a arabetšego ka yona. Lega go le bjalo, ba ile ba mo nea dikgatišo tše di theilwego Beibeleng, gomme a leboga kudu. Eupša ge bana babo rena bao ba tloga, ba ile ba lemoga gore ba tsene lebenkeleng le le fošagetšego! Ba be ba nyaka lebenkele la bo-2202, eupša bona ba tsena go la bo-2200. Yo mongwe wa bana babo rena bao o ile a re: “Ke ile ka kwa kudumela e elela ka mokokotlong wa ka, go le bjalo ka ge eka barongwa ba re hlahlile gore re tsene lebenkeleng leo. Mosadi yoo le kgaetšedi yo a bego a fodile moyeng ba be ba na le sefane sa go swana, ba etšwa motseng o swanago e bile ba na le bana ba nywaga yeo e nyakilego e lekana! Ge nkabe mosadi yoo a be a na le sefane se se fapanego goba a etšwa motseng o mongwe, nkabe re tsebile gore re lahlegile.” Ka morago ga gore bana babo rena ba fete mabenkele a mabedi, ba ile ba hwetša kgaetšedi yo a fodilego moyeng yo a bego a ba emetše.

 Ka baka la go etela motho yo a fošagetšego, mosadi yola wa mathomo o ile a thoma go ithuta Beibele le go ba gona dibokeng. Kgaetšedi yo a bego a fodile moyeng le yena o ile a thoma go ya dibokeng le go tšea karolo ka mehla bodireding. O itše: “Ke ile ka hloka mantšu a go leboga, ka gobane gaešita le ge ke be ke fodile moyeng ka nywaga e mentši gakaakaa, Jehofa ga se a ka a ntebala.”

Greg le Alma ba hudugetše sehlakahlakeng sa Catanduanes kua Philippines gore ba yo hlankela mo go nyakegago bagoeledi ba oketšegilego ba Mmušo. Naga yeo e tletše ka dithaba, ka gona Greg le Alma ba swanelwa ke go sepela dikhilomithara tše 19 ka maoto gore ba fihle tšhemong ya bona. Ka dinako tše dingwe, ba sepela diiri tše pedi ka seketswana gore ba yo dira boboledi dihlakahlakeng tše dingwe. Sehleng sa dipula, ga ba kgone go dira maeto a bjalo. Go e na le gore ba itulele gae gomme ba se dire boboledi, ba ile ba phetha ka gore ba diriše tokišetšo yeo ba e newago ke khamphani ya diselefouno tša bona yeo e ba dumelelago go romela batho melaetša e mentši ka mo ba ka kgonago ntle le go ba jela tšhelete.

Greg o re o thoma melaetša ya gagwe ka go ngwala leina la gagwe. Ke moka a re: “Ke rata go abelana le wena molaetša o tšwago Beibeleng.” Lengwalo le lengwe leo a hweditšego le atlega ke la Johane 17:3. Ka morago ga go le tsopola, o botšiša dipotšišo tše tše pedi: Modimo wa therešo ke mang? le gona Jesu Kriste ke mang? Ke moka o kgopela motho yoo gore a arabe. Ge motho yoo a ka araba, Greg o mo romela lengwalo le lengwe, go swana le la Psalme 83:18. Ge motho yoo a ka tšwela pele a araba melaetša yeo, Greg o mmotšiša ge e ba a ka mo founela gomme ba tšwetša pele poledišano. Greg le Alma ba re batho ba bantši ba thabela seo.

 Mosadi yo mongwe yo Greg le Alma ba mo rometšego molaetša o be a na le dipotšišo tše dintšinyana tša mabapi le Beibele, ka go re’alo ba ile ba romelana melaetša e mentši kudu le yena. Melaetša yeo e ile ya feleletša ka gore mosadi yoo a swarelwe thuto ya Beibele. Mosadi yoo o ile a botša motlogolo wa gagwe le mošomigotee dilo tšeo a bego a ithuta tšona. Ka baka leo, mafelong boraro bja bona ba ile ba kolobetšwa.