DIHLATSE TŠA JEHOFA di rata Beibele go feta kgatišo le ge e le efe. Re ithuta yona ka mehla le go e diriša go ruta ba bangwe ditaba tše dibotse tša Mmušo wa Modimo. (Mat. 24:14) Ka baka leo, bana babo rena ba ile ba dira sohle seo ba ka se kgonago go kgonthišetša gore kgatišo e kaonefaditšwego ya 2013 ya Phetolelo ya Lefase le Lefsa ya Mangwalo a Makgethwa ka Seisemane e tle e be e botse le go se hlagale kapela.

Ge bana babo rena ba lefapheng la go gatiša kua Wallkill, New York, U.S.A., ba be ba ahlaahla sebopego sa Beibele yeo e mpsha le molaodi yo mongwe wa khamphani yeo e dirago dipuku, molaodi yoo o itše: “Ga go kgonege go dira Beibele yeo le bolelago ka yona.” O okeditše ka gore: “Ke therešo gore Dibeibele tše dintši di diretšwe gore di bogege ge di le tafoleng goba rakeng—eupša tša go se hlagale kapela ga di gona.”

 Dikgatišo tša pele tša Phetolelo ya Lefase le Lefsa di be di hlagala kapela. Ka baka leo, bana babo rena ba lefapheng la go gatiša kua Wallkill ba ile ba hlahloba ka kelohloko matlakala a ka ntle a Beibele, dikgomaretši le mekgwa ya go kgomaganya dipuku e le gore ba tšweletše Beibele yeo e bego e tla kgona go kgotlelela maemo a sa swanego a leratadima. Go ya ka seo ba se hweditšego, ba ile ba tšweletša Dibeibele tša go dira diteko gomme ba di romela tšhemong gore di dirišwe ka nakwana ke Dihlatse tša dinageng tše mmalwa moo go fišago kudu goba go tonyago kudu.

Ka morago ga dikgwedi tše tshelelago, Dibeibele tšeo di ile tša bušetšwa lekaleng gomme bana babo rena ba di kaonefatša ke moka ba di romela tšhemong gape. Ka kakaretšo, go ile gwa romelwa Dibeibele tša ka godimo ga tše 1 690 tšhemong gore di lekwe. Ka phošo, tše sego kae tša tšona di ile tša se swarwe gabotse. Ka mohlala, Beibele e nngwe e ile ya gatwa ke koloi, e nngwe ya nelwa ke pula bošego ka moka gomme e nngwe yona ya nwelela ka gare ga mafula a ledimo le legolo.

Ka 2011, ge Dibeibele tšeo di dutše di dirišwa tšhemong, re ile ra reka motšhene o mofsa wa lebelo le legolo wa go dira dipuku bakeng sa mafelo a rena a go gatiša kua Wallkill le Ebina, Japane. Re be re swanetše go tšweletša palo e lekanego ya Dibeibele tše di bego di tla abja ge e lokollwa la mathomo, e bile re be re swanetše go gatiša Dibeibele tše di swanago tlwaa mafelong ao ka bobedi.

Mathomong a 2012, mafelo ao ka bobedi a ile a thoma go gatiša tokollo ya 1984 ya Phetolelo ya Lefase le Lefsa a diriša a mangwe a matlakala a ka ntle a mafsa. Lega go le bjalo, metšhene ye e mefsa e be e diriša sekgomaretši le mohuta o itšego wa pampiri letlakaleng la ka ntle leo le bego le se la ka la romelwa tšhemong go yo lekwa ka nakwana, ka go re’alo matlakala a ka ntle a Beibele yeo a be a kobega. Ka gona go tšweletšwa ga Dibeibele go ile gwa emišwa.

Badiri ba tše dingwe tša ditlabakelo tša go tšweletša matlakala  a ka ntle a dipuku ba ile ba dumela gore go kobega ga matlakala a boleta a ka ntle ke bothata bjoo dikhamphani tša go dira dipuku di bo tsebago gomme di bona bo ka se rarollege. Lega go le bjalo, go e na le go boela Dibeibeleng tša matlakala a ka ntle a thata, bana babo rena ba be ba ikemišeditše go tšweletša Beibele yeo e nago le letlakala la ka ntle le boleta, leo le ka se hlagalego kapela le le lebotse. Ka morago ga dikgwedi tše e ka bago tše nne tša go leka mehuta e fapafapanego ya dikgomaretši le mašelana ao a tsenywago ka gare ga matlakala a ka ntle a dipuku, ba ile ba hwetša mohuta wo o ilego wa dira gore ba lefapha la go gatiša ba tšwele pele ka go tšweletša Dibeibele tša matlakala a ka ntle a boleta ao a ka se kobegego.

Kgatišo e kaonefaditšwego ya Phetolelo ya Lefase le Lefsa e be e tlo lokollwa ka October 5, 2013, sebokeng sa ngwaga le ngwaga sa Watch Tower Bible and Tract Society of Pennsylvania. Mafelo a go gatiša a ile a hwetša difaele tša elektroniki tša Beibele ye e mpsha ka Labohlano, August 9, 2013, gomme letšatšing le le latelago modiro wa go gatiša wa thoma. Beibele ya  mathomo e feletšego e ile ya tšweletšwa ka August 15. Dibekeng tše šupago tše di latetšego, bao ba šomago mafelong a go gatiša kua Wallkill le Ebina ba ile ba šoma bošego le mosegare go tšweletša le go romela Dibeibele tše fetago tše 1 600 000, gore motho yo mongwe le yo mongwe yo a bego a tla ba gona sebokeng seo sa ngwaga le ngwaga a tle a ikhweletše kopi.

Le ge Beibele ye e le e botse e bile e diretšwe gore e se ke ya hlagala kapela, molaetša wa yona wo o neago bophelo ke o kgahlišago le go feta. Letšatši ka morago ga gore kgaetšedi yo mongwe kua United States a hwetše Beibele ya gagwe e mpsha, o ile a ngwala gore: “Ka ge bjale re na le kgatišo e mpsha, ke kgona go kwešiša Beibele gakaone.”