KOKETŠEGO yeo e diregago ka lebelo ka mokgatlong wa Jehofa e dira gore go nyakege ka go akgofa Diholo tša Mmušo tše di oketšegilego, Diholo tša Kopano, meago ya dikolo tša pušo ya Modimo, diofisi tša bofetoledi gotee le meago ya makala dinageng tše di fapafapanego. Ka baka leo, ka October 2013, Sehlopha se Bušago se ile sa hloma lefapha le lefsa gore modiro wa go thala dipolane, wa go aga, wa go mpshafatša meago le wa go hlokomela meago ya mokgatlo o dirwe ka tsela e atlegago kudu le ya go seketša. Lefapha le le lefsa, leo le bitšwago Lefapha la Lefase ka Bophara la Bohlami le la go Aga, le ntlongkgolo ya rena ya lefase ka bophara kua Brooklyn, New York, gomme  le okametšwe ke Komiti ya Kgatišo ya Sehlopha se Bušago.

Lefapha leo lona le okametše Mafapha a Bohlami le a go Aga a Dinaga, ao a hwetšagalago lekaleng la Afrika Borwa, Australia, Jeremane gotee le United States. Mafapha a a okametše modiro wa go thala dipolane, wa go aga le wa go hlokomela meago ya mokgatlo mafelong a fapafapanego. Morero wa mafapha a ke go akgofiša go agwa ga Diholo tša Mmušo. Peleng, Diholo tša Mmušo di be di agwa ka thušo ya Komiti ya tša Meago ya Tikologo goba lenaneo la go thuša dinaga tšeo di diilago. Ga bjale mafapha a a kopantšwe ka morero wa gore bana babo rena bao ba diriše mekgwa e mekaonekaone yeo ba bego ba dutše ba e diriša go akgofiša modiro wa go aga.

E le gore dilo di sepele gabotse modirong wo wa go aga Diholo tša Mmušo le Diholo tša Kopano tše di oketšegilego, go hlomilwe Lefapha la Bohlami le la go Aga la Tikologo lekaleng le lengwe le le lengwe. Lefapha le le okametšwe ke Komiti ya Lekala ya nageng yeo. Se se kgahlišago ka phetogo ye ke gore ga bjale makala ka moka a ka diriša bahlanka ba go aga bao ba lego tirelong ya nako e tletšego go thuša bana babo rena go ikagela Diholo tša Mmušo le Diholo tša Kopano.

Ka April 2014, go be go na le mediro e megolo ya go aga ya ka godimo ga e 270 yeo e bego e swanetše go fetšwa, go akaretša diofisi tša bofetoledi tše 90, Diholo tša Kopano tše 35 le mediro e mengwe e 130 makaleng. Go oketša moo, go nyakega Diholo tša Mmušo kapelapela, go akaretša tša ka godimo ga tše 14 000 tšeo di swanetšego go agwa goba go mpshafatšwa.

Ruri go matlafatša tumelo go bona batho ba Jehofa bao ba nago le botee ba aga meago yeo e tlišago theto le letago leineng la gagwe le lekgethwa ba sa šitišwe ke gore ke ba  setšhaba sefe, setšo le leleme! Dan Molchan yo a hlankelago Komiting ya Bašomi kua ntlongkgolo o re: “Go sa na le mošomo o montši wo o swanetšego go dirwa. Ka baka leo, re leboga dithapelo tša bana babo rena le dikgaetšedi, gotee le meneelo yeo ba e ntšhago go thekga modiro wo. Eupša re leboga kudu bana babo rena le dikgaetšedi bao ba ithaopago ka go rata go re thuša medirong ye.”