MO E ka bago kgwedi ka morago ga go bolawa ga Trujillo ka 1961, ke ile ka kolobetšwa ge ke be ke ithutela tša molao yunibesithing. Tate o be a nyaka gore ke be mošomedi wa tša molao, eupša ke be ke bona matla ao thuto ya Modimo e nago le ona. Ka gona, le ge tate a be a sa nyake, ke ile ka tlogela yunibesithi. Ka moragonyana, ke ile ka ba mmulamadibogo yo a kgethegilego.

E nngwe ya dikabelo tša ka e be e le kua La Vega, yeo e bego e tletše ka Bokatholika. Nakong ya ge ke le moo, ga go na motho yo a ilego a amogela therešo. Motho feela yo a bego a eba gona ge ke nea dipolelo tša phatlalatša e be e le mmulamadibogo yo ke bego ke šoma le yena. Eupša Jehofa o ile a mmatlafatša ka thuto ya motho ka noši ya Beibele, dikopano le ka thapelo e tšwago pelong. Ke ile ka botšiša Jehofa ka  thapelo ge e ba go tla tsoga go bile le phuthego mo La Vega. Ga bjale ke bolela ke thabile gore go na le Diholo tša Mmušo tše 6, diphuthego tše 14 le bagoeledi ba Mmušo ba fetago 800.

Ke ile ka nyalana le mosadi wa ka Ángela ka 1965, gomme ka 1981 ra laletšwa Bethele. Ge ke kolobetšwa, go be go na le bagoeledi ba 681 feela nageng ye. Ga bjale re na le bagoeledi ba fetago 36 000, gomme ba diketekete ba ba gona dikopanong tša rena tše dintši. Ge ke lebelela morago, ke thabišwa ke go bona kamoo Jehofa a butšego dipelo tša batho ba bantši gore di amogele therešo ya Beibele.