Rafael Pared, yo a hlankelago Bethele le mosadi wa gagwe Francia, o thomile go ba mogoeledi ka 1957 a na le nywaga e 18. O gopola kamoo maphodisa a ka sephiring a bego a mo  šala morago ge a be a eya tšhemong, a nyaka sebaka sa go swara yena le bao a bego a na le bona. Rafael o re: “Ka dinako tše dingwe re be re swanelwa ke go ja fase ka go tsena diphasetšing tša gare ga diterata le go tshela difense gore re se swarwe.” Kgaetšedi Andrea Almánzar o hlalosa seo yena le ba bangwe ba bego ba se dira gore ba se swarwe. O re: “Re be re swanetše go ba šedi. Ge re le bodireding, re be re nea bohlatse ntlong ya mathomo ke moka re tshela tše lesome pele re ka nea bohlatse go e latelago.”

Ka 1959, Trujillo o be a na le nywaga e ka bago e 30 a buša, eupša maemo a dipolotiki a be a fetoga. Ka June 14, 1959, batho bao ba kilego ba tšhaba Dominican Republic nakong ya dikgaruru ba ile ba boela ka šiši nageng ye go tlo leka go wiša mmušo wa Trujillo. Gaešita le ge maano a bona a ile a folotša gomme ba bangwe ba bona ba bolawa goba go golegwa, manaba ao a oketšegago a Trujillo a ile a ipotša gore a ka kgona go menola mmušo wo, ka go re’alo a tiiša letsogo.

Ka January 25, 1960, ka morago ga go dirišana ka nywaga e mentši le mmušo wa Trujillo, baruti ba Kereke ya Katholika ba ile ba ngwala lengwalo la go ipelaetša kgahlanong le go gatakelwa ga ditokelo tša batho. Radihistori wa Dominican e lego Bernardo Vega o hlalosa ka gore: “Tsela yeo mmušo wa Trujillo o ilego wa swara batho bao ba ilego ba tsena nageng ye ka šiši ka June 1959, gotee le tsela yeo o ilego wa swara mokgatlo wo o bego o lwantšha pušo ya gagwe, e ile ya gapeletša Kereke ya Katholika go thoma go lwantšha o šoro pušo ya Trujillo.”

Se se kgahlišago ke gore ka May 1960, mmušo o ile wa tloša thibelo go Dihlatse tša Jehofa. Ka morago ga go thibelwa ka nywaga e mentši, Dihlatse di ile tša hwetša tokologo go tšwa mothong yo di bego di sa mo nagana—Trujillo ka boyena—ka morago ga gore a kgaogane le Kereke ya Katholika.