LUIS, e lego motswala wa Trujillo, e be e le ramatlotlo wa mokgatlo wa dipolotiki wo o bego o buša, wo o bitšwago Partido Dominicano (Mokgatlo wa Dominican). Lega go le bjalo, mokgatlo o matla wa Trujillo o be o sa rate Luis, eupša le ge a ile a leka gantši go rola modiro, Trujillo o ile a gana.

Ka morago ga gore Trujillo a laele gore bana babo Luis ba babedi ba bolawe, Luis o ile a leka gabedi go bolaya mmušanoši yo. Eupša ga se a ka a gononelwa maitekelong ao a polao. Luis o ile a ba a ya le dingakeng tša ditaola a nyaka gore di mo thuše go bolaya monna yo yo a bego a mo hlalosa ka gore: “O be a itshwara bjalo ka sebata e bile a ipona a phagametše batho ka moka.” Luis o ile a bona puku ya “The Truth Shall Make You Free” godimo ga tafola legaeng la ngaka e nngwe gomme a thoma go e bala. Puku yeo e ile ya mo kgahla kudu moo a ilego a ya le yona gae gomme ka morago a fihlelela phetho ya gore bjo ke bodumedi bja therešo bjo a bego a bo nyaka.

 Ge Luis a be a etetše kua Ciudad Trujillo, o ile a ya dibokeng tša Dihlatse tša Jehofa gomme a tšea dipuku tše mmalwa le dimakasine gona moo. O ile a fetša bošego ka moka a di bala gomme ka morago a kgopela go swarelwa thuto ya Beibele. Ge a dutše a ithuta, Luis o ile a dira phetho ya go tlogela mokgatlo wa Trujillo. Ka morago ga gore mmušanoši yo a tsebe ka seo, o ile a nea Luis mošomo wa maemo a godimo wa go ba motseta wa mmušo wa Dominican kua Puerto Rico. Eupša Luis o ile a o gana, gaešita le ge a be a tseba gore phetho ya gagwe e be e tlo feleletša ka gore a tlaišwe.

Luis o gopola ka gore: “Ke ile ka tlaišwa ka ditsela ka moka, e bile mmušo o ile wa mpeela melaba ya mehutahuta yeo o ka naganago ka yona. Eupša ke be ke ikemišeditše go gana menate ya lefase le.” Luis e ile ya ba mogoeledi yo matla wa molaetša wa ditaba tše dibotse moo baruti ba kereke ya Katholika ya lefelong la gabo ba ilego ba mmitša “moebangedi.” Ka October 5, 1947, e lego dikgwedi tše tshela ka morago ga gore a ye dibokeng ka lekga la pele, Luis o ile a kolobetšwa.

Ka morago ga gore Luis a kolobetšwe, o ile a tsongwa ke maphodisa, a mo golega gomme a mo lahlela seleng ya bodulanoši. Ba bangwe ba ile ba leka gantši go mmolaya. Lega go le bjalo, ka mehla ge a be a golegwa gomme a išwa kgorong ya tsheko, o be a diriša sebaka seo go nea bohlatse. Luis o itše: “Ke lwele go swana le tau ke lwela tumelo ya ka, e bile ke a thaba ge ke nagana ka seo.”

Batho ba bangwe setšhabeng ba ile ba lemoga gore Luis o hlankela Modimo ka potego. Ka 1994, kuranta ya Dominican yeo e bitšwago El Siglo e ile ya bolela ka Luis gore: “Morena Luis Eduardo Montás o tsebja kudu San Cristobal e le monna yo a ikemišeditšego. Ke monnatia, monna yo a ratago batho le yo botho. Dilo ka moka tšeo a tsebjago ka tšona historing ya San Cristobal ke tša mabapi le go bolela ka molaetša wa Beibele.”