Mathomong a bo-1990, diphuthego tše dintši tša Georgia di be di etelelwa pele ke mogolo o tee goba mohlanka wa bodiredi. Gantši diphuthego di be di bopša ke dihlopha tše di fapafapanego tšeo di bego di itshwarela diboka tša tšona. Lebaka ke gore bagoeledi ba ba be ba dula kgole le kgole tšhemong e kgolo kudu yeo e bego e bopša ke ditoropo tše mmalwa goba metsana.

Joni Shalamberidze le Pavle Abdushelishvili, bao ba kilego ba šoma ditšhemong tšeo di lego kgole, ba ile ba kgopelwa gore ba yo thuša phuthego ya motseng wa Telavi, tikologong ya Kakheti. Phuthego ya moo e be e na le bagoeledi ba 300, eupša go se na mogolo le o tee. E be e bopša ke dihlopha tše 13 tšeo di bego di kopanela mafelong a fapafapanego.

 Go se go ye kae, Joni le Pavle ba ile ba bona selo seo se bego se šitiša bana babo rena ba moo go tia tumelong. Joni o re: “Bana babo rena ba bantši ba be ba na le dipolase le mašemo a diterebe. Ka ge go tlwaelegile gore batho ba magaeng ba thušane le baagišani ba bona mašemong, bana babo rena ba be ba fetša nako e ntši kudu ba phela le batho ba lefase.”—1 Bakor. 15:33.

Joni le Pavle ba ile ba šišinya gore bana babo rena ba kgopele Dihlatsegotee le bona go ba thuša mašemong a bona. Se se be se tla ba thuša gore ba tiiše segwera sa bona ge ba le gare ba šoma. (Mmo. 4:9, 10) Joni o re: “Bana babo rena ka phuthegong ba ile ba thoma go ratana kudu.” Ge Joni le Pavle ba be ba tloga Kakheti ka morago ga mengwaga e meraro, go be go šetše go na le bagolo ba 5 le bahlanka ba bodiredi ba 12.

Ka ge modiro wa rena o be o thibetšwe go fihlela mathomong a bo-1990, bana babo rena ba be ba bokana ka dihlotswana gore ba sware Thuto ya Puku ya Phuthego le Thuto ya Morokami feela. Gaešita le ge diboka tše di be di ba matlafatša, di be di sa ba tlwaetše go bolela ditaba tše dibotse tšhemong.

Dilo di ile tša fetoga ge mmušo wa Makomanisi o be o ewa. Mokgatlo wa Jehofa o ile wa laela diphuthego gore di sware Sekolo sa Bodiredi sa Pušo ya Modimo le Seboka sa Tirelo beke le beke.

Naili Khutsishvili le sesi wa gagwe e lego Lali Alekperova ba gopola dilo tše di kgahlišago ka diboka tšeo. Lali o gopola ka gore: “Diboka tšeo di be di kgahliša kudu. Ka moka ga rena re be re thabišwa ke gore ga bjale dikgaetšedi le tšona di be di newa dikabelo lenaneong.”

Naili o re: “Pontšhong e nngwe, mong wa ntlo o be a bala kuranta a le sethaleng, gomme a kwa motho a kokota mojako. Ka morago ga go botša motho yoo gore a tsene, dikgaetšedi tše pedi  di ile tša tsena ka mojako o mogolo gomme tša leba sethaleng.” Lali o oketša ka gore: “Le ge diboka tšeo di be di se tša tlwaelega, di ile tša re thuša go kaonefatša bokgoni bja rena bja go bolela tšhemong.”

Ka mengwaga e mentši, bana babo rena ba sego kae ba be ba dira dikopi tša dikgatišo tša rena ka metšhene ya go kopolla ya letsogo magaeng a bona. Ka ge batho ba bantši ba be ba nyaka dikgatišo tša rena, bana babo rena ba ile ba kgopela thušo dikhamphaning tša go gatiša gore di ba phrinthele dimakasine tša rena ka tšhelete ya tlase.

Bana babo rena ba be ba diriša bokgoni ge ba lokišeletša kopi yeo e bego e tlo dirišetšwa go phrintha tše dingwe. Ba be ba thaepa mongwalo wa Segeorgia ka bothakga gore makasine wa Segeorgia o swane le wa Seisemane. Ka morago ga moo, bana babo rena ba be ba sega diswantšho tša makasineng wa Seisemane gomme ba di kgomaretša matlakaleng ao ba thaepilego go wona. Ke moka, ba be ba sega ditlhaka tše di botsana tša Segeorgia dikuranteng gomme ba di kgomaretša letlakaleng la ka ntle la makasine wa Segeorgia. Ge ba feditše, ba be ba tšea kopi yeo ya makasine gomme ba e romela motšheneng gore go yo phrinthwa dikopi tše dingwe!

Ka morago ga gore go be le dikhomphutha, bana babo rena ba babedi ba bafsa, e lego Levani Kopaliani le Leri Mirzashvili, ba ile ba ya diklaseng tša go ithuta go šomiša khomphutha. Leri o gopola ka gore: “Re be re sa tsebe selo ka dikhomphutha, e bile ka dinako tše dingwe dilo di be di sa sepele gabotse. Eupša ka thušo ya Jehofa, go se go ye kae re ile ra kgona go thaepa le go itsenyetša diswantšho dimakasineng tša rena.”

Go sa šetšwe mathata ao, diphuthego tša nageng ka moka ya Georgia di ile tša thoma go hwetša dimakasine tšeo di phrinthilwego nageng yeo tšeo di nago le diswantšho tša mebalabala.  Eupša ge nako e dutše e eya, batho ba bantši kudu ba ile ba thoma go nyaka dikgatišo tša rena. Go sa dutše go le bjalo, mokgatlo wa Jehofa o ile wa nea bahlanka ba Jehofa ba Georgia tlhahlo e lerato.

Kopano ya ditšhabatšhaba ya 1992 kua St. Petersburg, Russia, e ile ya nea bana babo rena ba Georgia sebaka sa gore ba kopane le baemedi bao ba bego ba etšwa lekaleng la Jeremane. Genadi Gudadze o hlalosa ka gore: “[Bana babo rena bao] ba ile ba re hlalosetša kamoo modiro wa go fetolela o dirwago ka gona. Ba ile ba re botša gore ge nako e dutše e eya, go tlo romelwa batho Georgia gore ba tlo re ruta tsela ya go fetolela.”

Go be go le thata kudu go phrintha dikgatišo tša rena ka Segeorgia. Ka ge leleme le le na le ditlhaka tša moswananoši, lenaneo la mokgatlo wa Jehofa la khomphutha leo le bitšwago Multilanguage Electronic Publishing System (MEPS) le be le se na ditlhaka tšeo. Ka baka leo, bana babo rena ba ile ba swanelwa ke go hlama ditlhaka tše dingwe gore ba kgone go phrintha dikgatišo ka Segeorgia.

Nakong e fetilego, mafelelong a bo-1970, lapa la ga Datikashvili, leo le bego le etšwa Georgia, le be le hudugetše United States. Ka moragonyana, ngwana yo mongwe lapeng leo e lego Marina, o ile a ithuta therešo. O ile a thuša kudu ge bana babo rena kua Bethele ya Brooklyn ba be ba hlama ditlhaka tša Segeorgia tšeo ba bego ba tla di tsenya lenaneong la khomphutha la MEPS. Go se go ye kae, lekala la Jeremane le ile la gatiša dipampišana tše sego kae tša Segeorgia le poroutšha ya ‘Bonang, Dilo ka Moka ke di Dira tše Mpsha.’

Ka 1993, Michael Fleckenstein le mosadi wa gagwe Silvia, ba ile ba fihla Tbilisi ba etšwa lekaleng la Jeremane gore ba tlo hloma ofisi ya bofetoledi. Michael o re: “Ke be ke sa dutše ke gopola  gabotse seboka seo re bilego le sona kopanong ya kua St. Petersburg. Ge re fihla Tbilisi ka morago ga ngwaga le dikgwedi tše tshela, re ile ra makala kudu ge ba be ba re bontšha sehlopha seo se bego se šoma gabotse sa bafetoledi ba leleme la Segeorgia!”

Ka dikgwedi tše sego kae feela, ke ge sehlopha sa bafetoledi ba 11 se šetše se šoma ofising ya bofetoledi ka moagong o monyenyane. Ka baka la tlwaetšo e botse kudu yeo mokgatlo wa Jehofa o ilego wa e nea bana babo rena ba, diphuthego di ile tša thoma go hwetša dijo tša moya ka mehla.

Ka morago ga gore Mmušo wa Soviet o we, batho ba dinageng tšeo di bego di bušwa ke Mmušo wo ba ile ba thoma go lwa ka bobona le go lwa le merafo e mengwe. Se se ile sa direga le kua Georgia. Ka baka leo, go tšea maeto, kudukudu go tsena dinageng tše dingwe, go ile gwa ba kotsi kudu.

Letšatšing le lengwe ka November 1994, ge Aleko Gvritishvili a be a tshela mollwane gomme a tsena nageng e nngwe a na le bana babo rena ba babedi, sehlopha sa banna bao ba swerego dibetša se ile sa ba emiša gomme sa re ba tšwe ka koloing. Aleko o re: “Banna bao ba ile ba galefa kudu ka morago ga gore ba bone dikgatišo tša rena tša mabapi le Beibele. Ba ile ba re fodiša  laene go le bjalo ka ge eka ba tlo re bolaya. Re ile ra rapela Jehofa go tšwa pelong. Mo e ka bago ka morago ga diiri tše pedi, yo mongwe wa bona o ile a re: ‘Tšeang dipuku tše tša lena le sepele—ge le ka boa mo, re tlo fiša koloi ya lena gomme ra le bolaya.’”

Go sa šetšwe ditšhošetšo tšeo, bana babo rena ba ile ba tšwela pele ba išetša Dihlatsegotee dikgatišo tša mabapi le Beibele. Ngwanabo rena Zaza Jikurashvili, yoo a ilego a bea bophelo bja gagwe kotsing gore a išetše bana babo rena ba kua Georgia dikgatišo, o re: “Re be re tseba gore bana babo rena ba hloka dikgatišo tše gore ba tie tumelong. Basadi ba rena ba be ba re thekga kudu modirong wo.”

Aleko o re: “Bana babo rena ba bantši bao ba bego ba sepetša dikgatišo tše ba be ba na le malapa.” Ke’ng seo se bego se ba tutueletša go tšwela pele ka modiro wo go sa šetšwe kotsi ya gore ba be ba ka bolawa? Aleko o tšwela pele ka gore: “Lebaka le legolo e be e le go bontšha Jehofa gore re a mo rata le go mo leboga. Le gona re be re nyaka go ekiša Jehofa ka go hlokomela bana babo rena le dikgaetšedi.”

Ka baka la boikgafo bjo bja bana babo rena, Dihlatse tša Georgia di ile tša tšwela pele di hwetša dikgatišo go sa šetšwe dintwa tšeo di bego di le gona. Ka morago bana babo rena ba ile ba hwetša tsela e šireletšegilego ya go romela dikgatišo go tloga Jeremane go ya Georgia.

Ge dintwa tša dipolotiki di be di fedile ka 1995, Dihlatse tša Georgia di ile tša rulaganya gore di be le kopano ya mathomo ya selete. Ka 1996, batho ba e ka bago ba 6 000 go tšwa mahlakoreng ka moka a naga ya Georgia ba ile ba ba gona kopanong ya selete yeo e bego e swaretšwe motseng wa Gori, wa Marneuli le wa Tsnori.

Bao ba bego ba tlile kopanong ya selete ya kgauswi le Gori ga ba lebale kopano yeo. Yeo e bile phetogo e kgolo ka baka la gore  nakong e fetilego bana babo rena ba be ba sa kgolwe gore ka letšatši le lengwe ba ka tsoga ba tladitše holo ya moo nakong ya Segopotšo! Mo nakong ye, ba be ba letetše gore go tle batho ba ka godimo ga dikete tše pedi, eupša ba be ba sa hwetše lefelo leo le bego le ka ba lekana ka moka. Ka gona, ba ile ba phetha ka gore ba swarele kopano yeo ka ntle. Ba ile ba e swarela kgauswi le thaba e botsana ya kgauswi le motse woo, yeo batho ba ratago go ikhutša go yona.

Ngwanabo rena Kako Lomidze, yoo e bego e le setho sa Komiti ya Kopano yeo ya Selete, o re: “Ka morago ga lenaneo, bana babo rena le dikgaetšedi ba ile ba fetša nako e ntši ba dutše gotee, ba opela e bile ba thabela bogwera. Ka moka ga rena re ile ra bona gabotse gore batho ba Modimo ba na le botee e bile ba a ratana.”—Joh. 13:35.

Go thoma ka 1996, mokgatlo o ile wa rulaganya gore nageng ye ya Georgia balebeledi ba basepedi ba etele phuthego e nngwe le e nngwe beke ka moka. E le gore seo se kgonege, go ile gwa kgethwa balebeledi ba basepedi ba oketšegilego gore ba tlatše bana babo rena bao ba bego ba šetše ba etela diphuthego tša ka bodikela le bohlabela bja Georgia.

Ga go pelaelo gore ‘boitapišo bjo lerato’ le go šoma ka mafolofolo ga balebeledi ba ba basepedi go ile gwa thuša diphuthego gore di gole le go latela tlhahlo ya mokgatlo wa Jehofa kutšwanyana. (1 Bathes. 1:3) Go tloga ka 1990 go fihla ka 1997, palo ya bagoeledi e ile ya oketšega ka tsela e makatšago kudu. Le ge ka 1990 go be go na le bagoeledi ba 904 feela, ka morago ga mengwaga e šupago ke ge go šetše go na le bagoeledi ba 11 082!

Koketšego yeo e thomilego mengwageng e masome e fetilego, e be e thoma go bonagala nageng ka moka ya Georgia. Eupša tšeo e be e sa le dinyane; Jehofa o be a sa tlo šegofatša batho ba nageng ye ya Georgia.