Ismael, yo a dulago Mexico, o ile a dira phetho ya go bala Beibele ka moka. Ge ngwaga o fela, o be a šetše a e badile gabedi, eupša ka morago a foufala. Ka morago ga mengwaga e itšego, Ángel, yo e lego Hlatse ya Jehofa, o ile a kopana le Ismael gomme a mmotša ka dikholofetšo tša Modimo. Ismael o be a fišegela go ithuta mo go  oketšegilego, eupša o ile a re: “Nka se kgone go bala Beibele ka ge ke foufetše.”

Ángel o ile a mo kgonthišetša ka gore: “O se ke wa tshwenyega, ke tla go ruta mongwalo wa Braille.”

Ismael o ile a botšiša gore: “Na o kgona go bala mongwalo wa Braille?”

Ángel o ile a araba ka gore: “Aowa, eupša ke tla ithuta le wena.” Ismael o be a sa kgolwe gore Ángel o tla dira seo bakeng sa gagwe. Ángel o ile a ya gae, a dira nyakišišo mabapi le tsela ya go bala mongwalo wa Braille, gomme a gatiša ditlhaka tša dinkokomana godimo ga khatepokisi. Ka morago o ile a thoma go ruta Ismael go bala mongwalo wa Braille. Go se go ye kae, ke ge Ismael a ithutile ditlhaka tša Braille, a eba gona dibokeng e bile a bala dikgatišo tša rena tša mongwalo wa Braille. Ga bjale Ángel o ithuta Beibele le batho ba bane bao foufetšego. Batho bao ba rata go bolela ka Paradeise ya nakong e tlago ge ba tla be ba kgona bona.

Viannei, e lego kgaetšedi wa mengwaga e 14 wa United States, o ngwadile gore: “Ge ke be ke le klaseng ya thuto ya tša leago, morutiši yo a bego a emetše morutiši wa ka legato o ile a thoma go bolela ka madumedi. O ile a kgopela gore re bolele a mangwe a ona, ka gona ka bolela bja Dihlatse tša Jehofa. Bao ke tsenago le bona ka klaseng ba ile ba sega, ba bolela gore re ba senyetša nako, ba re ga re na mošomo le gore ba lahla dikgatišo tša rena. Morutiši le yena o be a bolela gampe ka rena.

 “Ke ile ka rapela Jehofa gore a mphe matla a gore ke nee bohlatse. Ke ile ka ba botša gore ga se gore ge re ya malapeng a gabo bona re nyaka go ba senyetša nako. Lebaka ke gore Jehofa o re roma gore re yo ba nea keletšo e botse yeo e theilwego Beibeleng. Ke ile ka ba kgopela gore ba se ke ba lahla dikgatišo. Di ka fetoša maphelo a bona gomme tša ba phološa. Morutiši o ile a kgopela tshwarelo, a ba a holofetša gore nakong e tlago ge Hlatse e ka mo etela, o tla e amogela,  a theetša le go bala dikgatišo tša rena. Ke be ke sa dumele gore o be a rerešitše ka seo a se bolelago.

“Ke ile ka mmona ka morago ga dikgwedi tše nne, gomme ka makatšwa ke gore o be a ithuta. Ka morago ga dikgwedi tše dingwe tše tshela, o ile a tlo nnyaka sekolong gore a nteboge ge ke ile ka bolela le yena ka Beibele. Ke be ke sa mo tsebe ka gobane o be a kotile e bile a beotše le ditedu. Ga bjale ke mogoeledi yo a sa kolobetšwago.”

Ngwagola, batho ba Jehofa ba Brazil ba ile ba lebiša tlhokomelo karolong e kgolo ya Amazon. Ba bantši tikologong yeo ga se ba ka ba kwa ditaba tše dibotse. Ka go lemoga seo, Sehlopha se Bušago se ile sa dumelela gore go dirwe lesolo le le kgethegilego la boboledi leo le tšeago ngwaga gore go fihlelelwe batho ba dikete bao ba dulago dikarolong tšeo di lego lekatana tša Amazon.

Ofisi ya lekala e ile ya kgetha ditoropo tše 53 tšeo di ikadilego go bapa le dinoka tše dikgolo tša Amazon gore di etelwe ke baboledi ba ditaba tše dibotse ka nako yeo. Ka dikgwedi tše nne feela, bagoeledi ba fetago ba 6 500 ba ile ba arabela kgopelong yeo.

Toropong yeo e lego lekatana ya Anamã, moo go bego go se na bagoeledi ba Mmušo, bana babo rena le dikgaetšedi ba lesome ba ile ba dula matšatši a 11 moo. Ba ile ba sepediša dikgatišo tše fetago tše 12 500 gomme ba thoma dithuto tša Beibele tše 200, tšeo ga bjale di swarwago ka founo. Bana babo rena ge ba be ba le moo ba be ba swara diboka. Sebokeng sa mafelelo seo ba se swerego pele ba sepela, ba ile ba thabela go bona batho ba 90 ba tlile. Dikgolo di se tla ka lesolo leo.

Mengwageng e tshela e fetilego, Jehizel le Mariana ba be ba tsena ka klaseng e tee kua Venezuela. Ka ge Jehizel e le Hlatse ya Jehofa, Mariana o be a dula a mo kwera. Mariana o be a kgodišegile gore Jehizel o be a sa thabele bophelo. Ka letšatši le lengwe, ka morago ga gore Jehizel a botšwe mantšu a sego bose, o ile a re: “Mariana, anke o lebelele Wepesaete ya rena ya jw.org. O ye go ‘Dibidio,’ ke moka o kgotle lepokisi la ‘Bafsa.’”

 Thapameng yeo Mariana o ile a founela Jehizel. O ile a re: “Ga bjale ke tseba lebaka leo ka lona o phelago ka tsela ye o phelago ka yona.”

Ka ge Jehizel a be a sa kgodišege gore o bolela ka eng, o ile a mmotšiša gore: “Na o sa nkwera gape?”

Mariana o ile a re: “Aowa, nka se sa tsoga ke go kwerile gape. Ka thušo ya gago, ga bjale ke lemoga gore seo ke bego ke se tšea e le go thabela bophelo, ke sona seo se bego se mpakela mathata a mantši.” Go ile gwa dirwa dithulaganyo tša gore Mariana a ithute Beibele ka mehla, gomme ga bjale o ba gona dibokeng ka moka.

Gérole, yo a bego a šoma e le mongwaledi wa kereke kua Haiti, o ile a kgahlwa ke gore Dihlatse di be di kgona go araba dipotšišo tša gagwe ka moka di diriša Beibele. Yena le morwedi wa gagwe ba ile ba dumela go ithuta Beibele. Ka ge ba be ba kgomilwe ke seo ba bego ba ithuta sona, ba ile ba kgopela gore ba swarelwe thuto gabedi ka beke.

Ka morago ga dikgwedi tše tharo ba ithuta, Gérole o ile a ya go moruti wa kereke yeo a e tsenago gomme a mmotšiša dipotšišo tše nne, a re: “Jesu o beilwe gore e be Kgoši ka ngwaga ofe? Batho ba ba lokilego ba ya kae ge ba ehwa? Batho ba babe ba ya kae ge ba ehwa? Na Jesu o hwetše sefapanong goba koteng?” Moruti o ile a bolela gore a ka kgona go araba feela potšišo ya bobedi le ya boraro. O ile a re: “Dihlatse tša Jehofa di re ke ba 144 000 bao ba yago legodimong. Eupša nna ke re bohle bao ba dirago thato ya Modimo ba ya legodimong. Ge e le ba babe, ba tla swa sa ruri diheleng.” Ge a be a kgopelwa gore a bontšhe seo ka Mangwalo, o ile a palelwa. Gérole o ile a nyama, eupša ga bjale o be a tloga a ikemišeditše go tšwela pele a ithuta Beibele go feta le ge e le neng pele. O ile a itokolla kerekeng ya gagwe. O ile a bolela gore o be a ithutile mo gontši ka Beibele dikgweding tše tharo tša ge a ithuta le Dihlatse tša Jehofa go feta seo a ithutilego sona ge a be a tsena kereke mengwageng e fetago e 30. Gérole le morwedi wa gagwe ba sa tšwa go kolobetšwa, gomme ba thomile go ithuta Beibele le batho ba 23 motsaneng wa gabo bona.