DITABA TŠA TLALELETŠO C
Kamoo re ka Swarago Dithuto tša Beibele re Diriša Puku ya O ka Thabela Bophelo go ya go Ile!
Pele bana babo rena ba ka tšweletša puku ya, O ka Thabela Bophelo go ya go Ile! ba ile ba rapela kudu le go dira nyakišišo ka mo go tseneletšego. E le gore puku ye e go hole kudu ge o swere dithuto tša Beibele, dira dilo tše di latelago:
Pele o swara thuto ya Beibele
-
1. Lokišetša gabotse. Ge o dutše o lokišetša, nagana ka dilo tšeo motho yo o ithutago le yena a di hlokago, o nagane ka maemo a gagwe le ka ditumelo tša gagwe. Leka go nagana gore ke dilo dife tšeo o ka mo thušago go di kwešiša goba tšeo o ka mo thušago go di diriša. Ipotšiše gore ditaba tšeo di lego ka tlase ga karolwana yeo e rego “Ithute ka mo go Oketšegilego,” di ka thuša bjang motho yo o ithutago le yena Beibele. Ge e ba go nyakega, o ka di diriša ge o swere thuto ya Beibele.
Nakong ya ge o swere thuto ya Beibele
-
2. Ge e ba motho yo o ithutago le yena Beibele a dumela gore o thome ka thapelo o be o phethe ka yona, dira bjalo.
-
3. O se ke wa bolela kudu. Go e na le moo, bolela kudu ka dilo tšeo di ngwadilwego ka pukung yeo le ithutago yona gomme o mo dumelele gore a bolele kamoo a ikwago ka gona.
-
4. Ge o thoma karolo e nngwe le e nngwe ya puku, bala mantšu a mathomo a karolo yeo gomme o botše motho yo o ithutago le yena ka dihlogo tše sego kae tšeo di lego karolong yeo.
-
5. Ge o fetša karolo e nngwe le e nngwe ya puku, diriša karolwana yeo e rego, seo le ithutilego sona, gore o thuše motho yo o ithutago le yena Beibele go gopola dilo tšeo a ithutilego tšona.
-
6. Ge o dutše o ithuta le morutwana, thutong e nngwe le e nngwe:
-
Balang dirapa.
-
Balang mangwalo ka moka ao a ngwadilwego gore, “Bala” goba “Balang.”
-
Ge e ba go nyakega, balang mangwalo ao a tsopotšwego.
-
Bapala dibidio ka moka tšeo di ngwadilwego gore, “Bapala” goba “Bapalang” (ge e ba o ka kgona go dira bjalo).
-
Botšiša motho yo o ithutago le yena dipotšišo ka moka tšeo di lego thutong yeo le ithutago yona.
-
Botša morutwana gore a lebelele seswantšho seo se lego ka tlase ga karolo yeo e rego, “Ithute ka mo go Tseneletšego,” gomme o mo kgopele gore a se hlalose.
-
Diriša karolwana yeo e rego “Seo o ka se Dirago,” go thuša motho yoo o ithutago le yena go itlhahloba e le gore a bone ge e ba a dira tšwelopele. O ka mo kgothaletša go diriša tšhišinyo yeo e ngwadilwego moo le go mo kgothaletša go ngwala dilo tše dingwe tšeo a nyakago go di fihlelela.
-
Botšiša motho yoo o ithutago le yena ge e ba go na le dihlogo goba dibidio tšeo a di thabetšego karolwaneng ya “Ithute ka mo go Oketšegilego,” ge a be a lokišetša thuto yeo le ithutago yona.
-
Nako le nako ge le ithuta thuto e itšego, lekang go e fetša le semeetseng.
-
Ka morago ga ge o feditše go ithuta le motho
-
7. Dula o nagana ka motho yoo o ithutago le yena. Rapela Jehofa gore a mo thuše gore a dire tšwelopele le gore a go fe bohlale bja go tseba kamoo o ka mo thušago ka gona.