THUTO 10
Jesu ka Mehla o be a Ekwa
Na go bonolo go kwa batswadi ba gago ka mehla?— Ka dinako tše dingwe go thata. Na o be o tseba gore Jesu o be a ekwa Jehofa le batswadi ba gagwe?— Mohlala wa gagwe o ka go thuša gore o kwe batswadi ba gago le ge go se bonolo. Anke re ithute ka se.
Pele Jesu a ka tla mo lefaseng, o be a na le Tatagwe e lego Jehofa kua legodimong. Eupša Jesu o be a na le batswadi le mo lefaseng. Maina a bona e be e le Josefa le Maria. Na o a tseba gore go tlile bjang gore e be batswadi ba gagwe?—
Jehofa o ile a tšea bophelo bja Jesu legodimong ke moka a bo tsenya ka mpeng ya Maria gore Jesu a tle a belegwe gomme a phele mo lefaseng. Wo e be e le mohlolo! Jesu o ile a gola ka mpeng ya Maria go swana le ge bana ba bangwe ba gola ka dimpeng tša bommago bona. Mo e ka bago ka morago ga dikgwedi tše senyane, Jesu o ile a belegwa. Ye ke tsela yeo Maria le monna wa gagwe Josefa e bilego batswadi ba Jesu ba mo lefaseng.
Ge Jesu a be a na le nywaga e 12 feela, o ile a dira selo seo se ilego sa bontšha gore o rata Tatagwe e lego Jehofa kudu. Seo se diragetše ge Jesu le lapa la gabo ba be ba tšere leeto le letelele la go ya Jerusalema go yo bina Paseka. Ge ba boela gae, Jesu o ile a timelela Josefa le Maria. Na o a tseba gore Jesu o be a le kae?—
Ke ka baka la eng Jesu a be a le ka tempeleng?
Josefa le Maria ba ile ba boela Jerusalema kapejana gomme ba nyaka Jesu gohle. Ba be ba tshwenyegile kudu ka ge ba be ba sa mo hwetše. Eupša ka morago ga matšatši a mararo, ba ile ba mo hwetša ka tempeleng. Na o a tseba gore ke ka baka la eng Jesu a be a le tempeleng?— Ke ka gobane ge a be a le moo, o be a ithuta ka Tatagwe e lego Jehofa. O be a rata Jehofa gomme a nyaka go ithuta kamoo a ka mo thabišago ka gona. Le ge a be a šetše a godile e le monna, ka mehla Jesu o be a ekwa Jehofa. Jesu o be a ekwa le ge go be go se bonolo go dira bjalo le ge seo se be se dira gore a tlaišege. Na Jesu o be a ekwa Josefa le Maria ka mehla?— Ee, Beibele e re o be a ba kwa.
O ka ithuta eng mohlaleng wa Jesu?— O ka ithuta gore o swanetše go kwa batswadi ba gago, le ge go se bonolo go dira bjalo. Na o tla dira bjalo?—
