THUTO 2
Rebeka o be a Nyaka go Thabiša Jehofa
Rebeka e be e le mosadi yo a bego a rata Jehofa. Leina la monna wa gagwe e be e le Isaka. Isaka le yena o be a rata Jehofa. Rebeka o kopane bjang le Isaka? Rebeka o ile a bontšha bjang gore o be a nyaka go thabiša Jehofa? Anke re ithute ka Rebeka.
Batswadi ba Isaka e be e le Aborahama le Sara. Ba be ba dula nageng ya Kanana, moo batho ba gona ba bego ba sa hlankele Jehofa. Eupša Aborahama o be a nyaka gore morwa yo wa gagwe a nyale mosadi yo a bego a hlankela Jehofa. Ka gona, Aborahama o ile a roma monna yo a bego a mo šomela, mohlomongwe Eliesere, gore a yo nyakela Isaka mosadi nageng yeo e bitšwago Harane, moo batho ba bangwe ba gabo Aborahama ba bego ba dula gona.
Rebeka o ile a šoma ka thata go gela dikamela meetse
Eliesere o ile a sepela le batho ba bangwe bao le bona ba bego ba šomela Aborahama. Ba ile ba sepela leeto le letelele kudu. Ba ile ba sepela le dikamela tše lesome tšeo di bego di rwele dijo le dimpho. Eliesere o be a tla tseba bjang mosadi yo a bego a tla mo kgethela Isaka? Ge Eliesere le banna bao a bego a sepela le bona ba fihla Harane, ba ile ba ema sedibeng ka gobane Eliesere o be a tseba gore batho ba be ba tlo ga meetse. O ile a rapela Jehofa a re: ‘Ge nka kgopela kgarebe e itšego gore e gele nna le dikamela meetse gomme ya dira bjalo, gona ke tla tseba gore ke yona yeo o e kgethilego.’
Kgarebe yeo e bitšwago Rebeka e ile ya tla sedibeng. Beibele e re e be e le yo mobotse kudu. Eliesere o ile a kgopela meetse a go nwa gomme Rebeka a re: ‘Ga go na bothata. Ke tla go gela gomme ka gela le dikamela tša gago.’ Nagana feela! Dikamela tše di nyorilwego di nwa meetse a mantši kudu, ka gona Rebeka o ile a swanelwa ke go boelela sedibeng gantši gore a di gele meetse. Na o a mmona mo seswantšhong gore o šoma ka thata bjang?— Eliesere o ile a makatšwa ke kamoo Jehofa a ilego a araba thapelo ya gagwe ka gona.
Eliesere o ile a nea Rebeka dimpho tše dintši tše dibotse. Rebeka o ile a re Eliesere le batho ba bangwe bao a bego a sepela le bona ba ye le yena gagabo. Ge ba fihlile moo, Eliesere o ile a hlalosa lebaka leo Aborahama a mo rometšego moo le kamoo Jehofa a arabilego thapelo ya gagwe. Lapa la gabo Rebeka le ile la thabela gore a nyalwe ke Isaka.
Rebeka o ile a ya Kanana le Eliesere gomme a nyalana le Isaka
Eupša na o nagana gore Rebeka o be a nyaka go nyalwa ke Isaka?— Rebeka o be a tseba gore Eliesere o be a rometšwe ke Jehofa. Ka gona ge lapa la gabo Rebeka le mmotšiša ge e ba a nyaka go ya Kanana gore a yo nyalwa ke Isaka, o ile a re: ‘Ee, ke nyaka go ya.’ O ile a tloga le Eliesere. Ge ba fihla Kanana, Rebeka o ile a nyalana le Isaka.
Ka ge Rebeka a ile a dira seo Jehofa a bego a nyaka gore a se dire, Jehofa o ile a mo šegofatša. Ka morago ga nywaga e mentši, Jesu o ile a belegelwa lelokong la Rebeka. Ge o ka swana le Rebeka gomme wa thabiša Jehofa, o tla go šegofatša.
