Samuele o ile a thoma go dula taberenakeleng le go šoma moo e sa le yo monyenyane kudu. Taberenakeleng ke moo batho ba bego ba etla go rapela Jehofa. Na o a tseba gore go tlile bjang gore Samuele a dule taberenakeleng? Anke re thome ka go ithuta ka mmago Samuele e lego Hanna.

Go tšere nako e telele Hanna a sa kgone go ba le ngwana le ge a be a nyaka go ba le yena. Ka gona o ile a rapela Jehofa gore a mo thuše. O ile a holofetša gore ge a ka ba le ngwana wa mošemanyana, o be a tla mo tliša taberenakeleng gore a tlo dula moo le go šoma gona. Jehofa o ile a araba thapelo ya Hanna gomme a ba le ngwana wa mošemanyana. O ile a mmitša Samuele. Go etša ge Hanna a be a holofeditše, e itše ge Samuele a be a na le nywaga e meraro goba e mene, a mo iša taberenakeleng gore a šomele Modimo moo.

Ka nako yeo, Eli e be e le moperisita yo a phagamego taberenakeleng. Barwa ba gagwe ba babedi ba be ba šoma moo. Gopola gore taberenakele e be e le lefelo leo batho ba bego ba rapela Modimo go lona, ka gona batho ba be ba swanetše go dira dilo tše di lokilego moo. Eupša barwa ba Eli ba be ba dira dilo tše mpe kudu. Samuele o ile a bona seo ba bego ba se dira. Na Samuele o ile a dira dilo tše mpe go swana le barwa ba Eli?— Aowa, o ile a dula a dira dilo tše di lokilego tšeo batswadi ba gagwe ba mo rutilego tšona.

O nagana gore Eli nkabe a ile a dira eng ka barwa ba gagwe ba babedi?— Nkabe a ile a ba otla. Le gona nkabe a ile a ba raka ntlong ya Modimo gore ba se sa šoma moo. Eupša Eli o ile a ba tlogela, ka gona Jehofa o ile a galefela Eli le barwa ba gagwe ba babedi ke moka a ba otla.

Bošegong bjo bongwe ge Samuele a robetše, o ile a kwa motho yo mongwe a mmitša a re: ‘Samuele!’ Samuele o ile a kitimela go Eli, eupša Eli a re go yena: ‘Ga se ka go bitša.’ Se se ile sa direga gape gabedi. Ge se direga laboraro, Eli o ile a botša Samuele gore ge a ka kwa a bitšwa gape, a bolele a re: ‘Bolela hle Jehofa, ke theeditše.’  Samuele o ile a dira sona seo. Ke moka Jehofa a re go Samuele: ‘Botša Eli gore ke tlo otla lapa la gagwe ka baka la dilo tše mpe tše le di dirilego.’ Na o nagana gore go bile bonolo gore Samuele a botše Eli taba yeo?— Aowa. Eupša le ge Samuele a be a boifa, o ile a dira seo Jehofa a bego a mo laetše sona. Seo Jehofa a se boletšego se ile sa direga. Barwa ba babedi ba Eli ba ile ba bolawa gomme Eli le yena a hwa.

Samuele ke mohlala o mobotse go rena. O ile a dira dilo tše di lokilego gaešita le ge a be a bona batho ba bangwe ba dira dilo tše mpe. Wena o tla dira’ng? Na o tla swana le Samuele gomme wa dula o dira dilo tše di lokilego? Ge e ba o dira bjalo, o tla thabiša Jehofa le batswadi ba gago.