Timotheo e be e le lesogana leo le bego le thabela go thuša batho. O ile a ya dinageng tše dintši gore a yo thuša batho ba bangwe. Ka baka la se, o ile a ba le bophelo bjo bo kgahlišago kudu. Na o ka rata go kwa ka seo?—

Timotheo o goletše motseng wo o bitšwago Lisitara. Ge e be e sa le yo monyenyane, makgolo wa gagwe e lego Loisa le mmagwe e lego Yunise, ba ile ba thoma go mo ruta ka Jehofa. Ge Timotheo a dutše a gola, o ile a nyaka go thuša ba bangwe go ithuta ka Jehofa.

Ge Timotheo e be e sa le lesogana, Paulo o ile a mo kgopela gore a sepele le yena go yo bolela ditaba tše dibotse mafelong a mangwe. Timotheo o ile a dumela go sepela le yena. O be a itokišeleditše go yo thuša ba bangwe.

 Timotheo o ile a ya le Paulo motseng o mongwe wa kua Matsedonia wo o bitšwago Thesalonika. E le gore ba fihle moo, ba ile ba swanelwa ke go sepela ka maoto nako e telele ke moka ba namele sekepe. Mafelelong ge ba fihlile moo, ba ile ba thuša batho ba bantši go ithuta ka Jehofa. Eupša batho ba bangwe ba ile ba galefa gomme ba leka go ba gobatša. Ka gona Paulo le Timotheo ba ile ba swanelwa ke go tloga moo ke moka ba yo ruta mafelong a mangwe.

Ka morago ga dikgwedi tše itšego, Paulo o ile a kgopela Timotheo gore a boele Thesalonika go yo hlola bana babo bona ba moo. Go be go nyakega sebete gore a boele motseng woo o kotsi! Eupša Timotheo o ile a boela moo ka gobane o be a tshwenyegile ka bana babo ba moo. O ile a tlela Paulo le ditaba tše dibotse. Bana babo bona ba Thesalonika ba be ba tšwela pele gabotse therešong!

Timotheo o ile a šoma le Paulo ka nywaga e mentši. Paulo o kile a ngwala gore go be go se na motho yo mongwe ka ntle le Timotheo yoo a bego a ka mo romela go yo thuša diphuthego. Timotheo o be a rata Jehofa le batho.

Na le wena o rata batho le go nyaka go ba thuša go ithuta ka Jehofa?— Ge e ba go le bjalo, gona o ka ba le bophelo bjo bo thabišago le bjo bo kgahlišago kudu go fo swana le Timotheo!