1. Morero wa Modimo ka lefase ke ofe?

MORERO wa Modimo ka lefase ke o kgahlišago e le ruri. Jehofa o nyaka gore lefase le tlale ka batho ba ba thabilego e bile ba phetše gabotse. Beibele e re “Modimo a dira thšemo ya Edene” gomme “a mediša dihlare tšohle tše di kxahlišaxo xe di bônwa, tše bose xe di lewa.” Ka morago Modimo a bopa monna wa pele le mosadi, Adama le Efa, A ba bea legaeng leo le lebotse gomme a ba botša gore: “Tswalang Le atê, tlalang lefase, Le le fenyê.” (Genesi 1:28; 2:8, 9, 15) Ka gona e be e le morero wa Modimo gore batho ba be le bana, ba katološe mellwane ya legae leo la paradeise go phatlalala le lefase gomme ba hlokomele diphoofolo.

2. (a) Re tseba bjang gore morero wa Modimo ka lefase o tla phethagala? (b) Ke batho ba mohuta ofe bao ba tlago go phela ka mo go sa felego?

² Na o nagana gore morero wa Jehofa Modimo wa gore batho ba phele lefaseng la paradeise o tla ka wa phethagala? Modimo o re: “Ke boletše; ke tlo di tliša.” (Jesaya 46:9-11; 55:11) Ee, seo Modimo a se rerilego o tlo se dira e le ka kgonthe! O re ‘ga se a bopa lefase gore e be la lefela,’ eupša ‘o le diretše go dulwa ke batho.’ (Jesaya 45:18) Ke batho ba mohuta mang bao Modimo a bego a nyaka gore ba phele mo lefaseng? Le gona o be a nyaka gore ba phele moo ka nako e kaaka’ng? Beibele e araba ka gore: “Baloki e ba beng ba naxa,  ba dula mo xo yôna ka mehla le ka mehla.” (Mongwalo o sekamego ke wa rena.)—Psalme 37:29; Kutollo 21:3, 4.

3. Ke maemo afe a nyamišago ao a lego gona lefaseng mo nakong ye, gomme se se rotoša dipotšišo dife?

³ Go molaleng gore se ga se sa tšwa se direga. Batho ga bjale ba a babja gomme ba a hwa; e bile ba a lwa le go bolayana bona seng. Go na le phošo e diregilego. Lega go le bjalo, ruri Modimo ga se a ka a rera gore lefase le be ka tsela ye re le bonago le le ka yona lehono! Go diregile’ng? Ke ka baka la’ng morero wa Modimo o sa phethagala? Ga go na puku ya histori ye e ngwadilwego ke motho yeo e ka re botšago seo ka gobane bothata bo thomile legodimong.

4, 5. (a) Ge e le gabotse ke mang yo a ilego a bolela le Efa ka go diriša noga? (b) Motho yo pele a kilego a itshwara gabotse e bile a botega a ka ba bjang lehodu?

⁴ Puku ya pele ya Beibele e bolela ka moganetši wa Modimo yo a ilego a iponagatša tšhemong ya Edene. Moganetši o hlaloswa e le “noga,” eupša e be e se phoofolo feela. Puku ya mafelelo ya Beibele e mo hlalosa e le ‘yo a bitšwago Diabolo le Sathane, yo a timetšago lefase ka moka le go agilwego go lona.’ E bile o bitšwa “noga ya kgale.” (Genesi 3:1; Kutollo 12:9) Morongwa yo yo matla goba sebopiwa sa moya seo se sa bonagalego, o ile a diriša noga go bolela le Efa, go swana le ge motho yo a nago le bokgoni a ka dira gore go bonagale eka lentšu la gagwe le tšwa go popi ye e lego kgaufsi le yena. Ga go pelaelo gore motho yoo wa moya o be a le gona ge Modimo a lokišetša lefase gore le dulwe ke batho.—Jobo 38:4, 7.

⁵ Lega go le bjalo, ka ge dibopiwa ka moka tša Jehofa di phethagetše, ke mang a dirilego “Diabolo” yo, yena “Sathane”? Ge e bewa ka tsela e bonolo, yo mongwe wa barwa ba matla ba Modimo ba moya o ile a iphetoša Diabolo. Se se ile sa kgonega bjang? Re swanetše go lemoga gore lehono motho yoo pele a kilego a itshwara gabotse e bile a botega a ka  ba lehodu. Seo se direga bjang? Motho a ka dumelela kganyogo e fošagetšego gore e gole ka pelong ya gagwe. Ge e ba a dula a nagana ka yona, kganyogo yeo e fošagetšego e ka ba e matla kudu. Ka baka leo, ge sebaka se bulega, a ka dira ka go dumelelana le kganyogo e mpe yeo a bego a dutše a nagana ka yona.—Jakobo 1:13-15.

6. Morwa yo matla wa Modimo wa moya o ile a fetoga bjang Sathane Diabolo?

⁶ Se se diregile tabeng ya Sathane Diabolo. Go bonagala a kwele ge Modimo a botša Adama le Efa gore ba be le bana gomme ba tlatše lefase ka bana ba bona. (Genesi 1:27, 28) Go bonagala Sathane a ile a nagana gore: ‘Batho ba ka moka ba ka rapela nna go e na le Modimo!’ Ka gona kganyogo e fošagetšego e ile ya gola ka pelong ya gagwe. Mafelelong o ile a gata mogato wa gore a fore Efa ka go mmotša maaka ka Modimo. (Genesi 3:1-5) Ka gona o ile a ba “Diabolo,” e lego seo se bolelago gore “Mothomeletši.” Ka nako e swanago, o ile a ba “Sathane” e lego seo se bolelago gore “Moganetši.”

7. (a) Ke ka baka la’ng Adama le Efa ba ile ba hwa? (b) Ke ka baka la’ng bana ka moka ba Adama ba tšofala le go hwa?

⁷ Ka go diriša maaka le boradia, Sathane Diabolo o ile a dira gore Adama le Efa ba se kwe Modimo. (Genesi 2:17; 3:6) Ka baka leo, mafelelong ba ile ba hwa, bjalo ka ge Modimo a ile a bolela gore ba tla hwa ge e ba ba ka se kwe. (Genesi 3:17-19) Ka ge Adama a ile a ba yo a sa phethagalago ka morago ga go dira sebe, bana ba gagwe ka moka ba ile ba abelwa sebe sa gagwe. (Ba-Roma 5:12) Boemo bjo bo ka swantšhwa le pane yeo e dirišetšwago go paka borotho. Ge e ba pane e e-na le sekoti mo go yona, go direga’ng ka lofo e nngwe le e nngwe ya borotho yeo e dirilwego ka pane yeo? Lofo e nngwe le e nngwe e ba le sekoti goba go se phethagale go yona. Ka mo go swanago, motho yo mongwe le yo mongwe o abetšwe seo re ka rego ke sekoti sa go se phethagale go tšwa go Adama. Ke ka baka leo batho ka moka ba tšofalago le go hwa.—Ba-Roma 3:23.

8, 9. (a) Ke tlhohlo efe yeo go bonagalago Sathane a ile a e dira? (b) Ke ka baka la’ng Modimo a ile a se fediše marabele le semeetseng?

 ⁸ Ge Sathane a be a dira gore Adama le Efa ba dire sebe malebana le Modimo, ge e le gabotse o be a etile borabele pele. O be a hlohla tsela ya Jehofa ya go buša. Ge e le gabotse, Sathane o be a re: ‘Modimo ke mmuši yo mobe. O bolela maaka e bile o tima bahlanka ba gagwe dilo tše dibotse. Ga  go nyakege gore batho ba bušwe ke Modimo. Ba ka itirela phetho mabapi le seo e lego se sebotse le seo e lego se sebe. E bile ba tla phela gakaone ge ba bušwa ke nna.’ Modimo o be a tla swaragana bjang le tlhohlo e bjalo ya thogako? Ba bangwe ba nagana gore Modimo ge e le gabotse nkabe a ile a bolaya marabele. Eupša na seo se ka be se ile sa araba tlhohlo ya Sathane? Na se ka be se ile sa hlatsela gore tsela ya Modimo ya go buša e lokile?

⁹ Maikwelo a phethagetšego a Jehofa a toka a ile a se mo dumelele gore a bolaye marabele le semeetseng. O ile a phetha ka gore go be go nyakega nako gore go arabje tlhohlo ya Sathane ka tsela e kgotsofatšago le go hlatsela gore Diabolo ke moaketši. Ka gona Modimo o ile a phetha ka gore o tla dumelela batho gore ba ipuše ka nako e itšego ka tlase ga tutuetšo ya Sathane. Taba ya lebaka leo ka lona Jehofa a ilego a dira seo le lebaka leo a ilego a dumelela gore go fete nako e ntši gakaakaa pele a rarolla dikgang tše e tla ahla-ahlwa go Kgaolo 11 ya puku ye. Lega go le bjalo, ga bjale re swanetše go nagana ka se: Na Adama le Efa ba be ba swanetše go dumela Sathane, yo le ka mohla a sa kago a ba direla selo le ge e le sefe se sebotse? Na go be go swanetše gore ba dumele gore Jehofa yo a ilego a ba nea dilo ka moka tšeo ba bego ba e-na le tšona ke moaketši yo šoro? Ke’ng seo nkabego o ile wa se dira?

10. O ka thekga bjang lehlakore la Jehofa e le go araba tlhohlo ya Sathane?

¹⁰ Ke mo gobotse go nagana ka dipotšišo tše ka gobane yo mongwe le yo mongwe wa rena o lebeletšane le dikgang tše di swanago lehono. Ee, o na le sebaka sa gore o thekge lehlakore la Jehofa e le go araba tlhohlo ya Sathane. O ka amogela Jehofa e le Mmuši wa gago le go thuša go bontšha gore Sathane ke moaketši. (Psalme 73:28; Diema 27:11) Ka manyami, ke ba sego kae feela gare ga batho ba dimilione tše dikete lefaseng le bao ba dirago kgetho e bjalo. Se se rotoša potšišo e bohlokwa e rego, Na Beibele ge e le gabotse e ruta gore Sathane o buša lefase le?

11, 12. (a) Teko ya Jesu e utolla bjang gore Sathane ke mmuši wa lefase le? (b) Ke’ng se sengwe seo se hlatselago gore Sathane ke mmuši wa lefase le?

¹¹ Jesu le ka mohla ga se a ka a belaela gore Sathane ke yena mmuši wa lefase le. Ka tsela e itšego ya mohlolo, Sathane ka nako e nngwe o ile a bontšha Jesu “mebušo ka moka ya lefase le letago la yona.” Ke moka Sathane a holofetša Jesu gore: “Dilo tše ka moka ke tla go nea tšona ge o ka wela fase wa ntirela tiro ya borapedi.” (Mateo 4:8, 9; Luka 4:5, 6) Nagana ka se. Na mpho yeo nkabe e bile teko go Jesu ge e ba Sathane e be e se mmuši wa mebušo ye? Jesu ga se a ka a gana gore mebušo ye ka moka ya lefase ke ya Sathane. Ruri Jesu nkabe a ile a dira seo ge e ba Sathane e be e se yena a laolago mebušo ye.

¹² Ee, Jehofa ke Modimo yo matla-ohle, Mmopi wa legohle le le makatšago. (Kutollo 4:11) Lega go le bjalo, ga go na moo Beibele e bolelago gore Jehofa Modimo goba Jesu Kriste ke mmuši wa lefase le. Ge e le gabotse, Jesu o ile a bolela ka go lebanya ka Sathane gore ke “mmuši wa lefase le.” (Johane 12:31; 14:30; 16:11) E bile Beibele e bolela ka Sathane Diabolo e le “modimo wa tshepedišo ye ya dilo.” (2 Ba-Korinthe 4:3, 4) Ge e le mabapi le moganetši yo, goba Sathane, moapostola wa Mokriste Johane o ile a ngwala gore: “Lefase ka moka le rapaletše matleng a yo kgopo.”—1 Johane 5:19.

13. Ke ka baka la’ng lefase le lefsa le nyakega?

¹³ Ngwaga o mongwe le o mongwe ge o feta, lefase e ba le kotsi kudu le go feta. Le tletše ka madira a ntwa, bo-radipolitiki ba sa botegego, baetapele ba nago le boikaketši ba bodumedi le disenyi tše di retetšego. Ga go kgonege go mpshafatša lefase ka moka. Beibele e utolla gore nako e kgaufsi yeo ka yona Modimo a tlago go fediša lefase le kgopo nakong ya ntwa ya gagwe ya Haramagedone. Lona le tla tšeelwa legato ke lefase le lefsa la go loka.—Kutollo 16:14-16.

14. Ke mang yo Modimo a mo kgethilego gore e be Mmuši wa Mmušo wa Gagwe, gomme se se ile sa bolelwa bjang e sa le pele?

 ¹⁴ Jehofa Modimo o kgethile Jesu Kriste gore e be Mmuši wa Mmušo, goba pušo ya Gagwe ya legodimong. Nakong e fetilego, Beibele e ile ya bolela e sa le pele gore: “Re tswaletšwe ngwana, re neilwe morwa, yo pušô e lexo lexetleng la xaxwe. Leina la xaxwe ké: . . . Kxoši ya kaxišô. Mmušô wó ké wa kênêlô, wa khutšô ye e sa felexo.” (Jesaya 9:5, 6) Ge e le mabapi le mmušo wo, Jesu o ile a ruta balatedi ba gagwe go rapela ka gore: “Mmušo wa gago a o tle. Thato ya gago a e direge le mo lefaseng bjalo ka ge e direga legodimong.” (Mateo 6:10) Go etša ge re tla bona ka morago pukung ye, Mmušo wa Modimo kgaufsinyane o tla fediša mebušo ka moka ya lefase, gomme wona ka bowona o tla tšeela yeo ka moka legato. (Daniele 2:44) Ke moka Mmušo wa Modimo o tla tliša lefase la paradeise.

15. “Lefase le lefsa” ke’ng?

¹⁵ Beibele e re kgonthišetša gore: “Go na le magodimo a mafsa le lefase le lefsa tše re di letetšego go ya ka kholofetšo ya gagwe, gomme toko e tla aga go tšona.” (2 Petro 3:13; Jesaya 65:17) Ka dinako tše dingwe ge Beibele e bolela ka “lefase” e bolela ka batho bao ba phelago lefaseng. (Genesi 11:1) Ka gona “lefase le lefsa” la go loka ke lekoko la batho leo le amogelwago ke Modimo.

16. Ke mpho efe ya bohlokwa yeo e tšwago go Modimo ye e yago go bao a ba amogelago, gomme ke’ng seo re swanetšego go se dira gore re e hwetše?

¹⁶ Jesu o holofeditše gore lefaseng le lefsa le le tlago, bao ba amogelwago ke Modimo ba tla hwetša mpho ya “bophelo bjo bo sa felego.” (Mareka 10:30) Hle phetla Beibele ya gago go Johane 3:16 le 17:3, gomme o bale seo Jesu a boletšego gore re swanetše go se dira e le gore re hwetše bophelo bjo bo sa felego. Ga bjale, ela hloko go tšwa Beibeleng ditšhegofatšo tšeo di tlago go thabelwa ke bao ba swanelwago ke mpho yeo e kgahlišago ye e tšwago go Modimo Paradeiseng e tlago ya lefaseng.

17, 18. Re ka kgonthišega bjang gore go tla ba le khutšo le polokego kae le kae lefaseng?

 ¹⁷ Bobe, ntwa, bosenyi le bošoro di tla be di fetile. “E mobe ó tlo ba a ile . . . Ba bolêta e tlo ba bôná beng ba naxa.” (Psalme 37:10, 11) Khutšo e tla ba gona ka gobane ‘Modimo o tla fediša dintwa go fihla magomong a lefase.’ (Psalme 46:9; Jesaya 2:4) Ka nako yeo ‘moloki o tlo taga, gomme khutšo e gole e e-ya le dikgwedi di sa kgaotše go balama’—gomme seo se bolela gore ka mo go sa felego!—Psalme 72:7.

¹⁸ Barapedi ba Jehofa ba tla phela ka polokego. Ge feela ba-Isiraele ba mehleng ya Beibele ba be ba e-kwa Modimo, ba be ba phela ka polokego. (Lefitiko 25:18, 19) E tla ba mo go kgahlišago gakaakang go thabela polokego e swanago Paradeiseng!—Jesaya 32:18; Mika 4:4.

19. Ke ka baka la’ng re tseba gore go tla ba le motlalo wa dijo lefaseng le lefsa la Modimo?

¹⁹ Go hlaela ga dijo go ka se be gona. Mopsalme o opetše ka gore: “Xo tlo ba le mohora wa mabêlêʹ mo naxeng; ’phoxong tša thaba meré ya dienywa e tlo xwaša.” (Psalme 72:16) Jehofa Modimo o tla šegofatša baloki ba gagwe, gomme “lefase le [tla ntšha] dikenyô tša lôna.”—Psalme 67:6.

20. Ke ka baka la’ng re ka kgodišega gore lefase ka moka le tla fetoga paradeise?

²⁰ Lefase ka moka le tla fetoga paradeise. Magae a mafsa a kgahlišago gotee le dirapa di tla hlongwa nageng yeo pele e bego e sentšwe ke batho ba nago le sebe. (Jesaya 65:21-24; Kutollo 11:18) Ge nako e dutše e feta, dikarolo tša lefase tšeo di bego di šetše di le ka tlase ga taolo di tla katološwa go fihlela ge lefase ka moka e le le lebotse e bile le tšweletša dienywa go swana le tšhemo ya Edene. E bile Modimo a ka se ke a palelwa ke go ‘khupurolla seatla sa gagwe gomme a kgotsofatša kganyogo ya dilo ka moka tše di phelago.’—Psalme 145:16.

21. Ke’ng seo se bontšhago gore khutšo e tla ba gona gare ga batho le diphoofolo?

²¹ Khutšo e tla ba gona gare ga batho le diphoofolo. Diphoofolo  tša naga le tša ka gae di tla ja gotee. Gaešita le ngwana yo monyenyane a ka se boife diphoofolo tšeo ga bjale di lego kotsi.—Jesaya 11:6-9; 65:25.

22. Go tla direga’ng ka bolwetši?

²² Bolwetši bo tla hwelela. E le Mmuši wa Mmušo wa Modimo wa legodimong, Jesu o tla dira diphodišo tše dintši go feta nakong yela ya ge a be a le lefaseng. (Mateo 9:35; Mareka 1:40-42; Johane 5:5-9) Ka nako yeo “xo ka se bê le e a rexo: Ke a babya!”—Jesaya 33:24; 35:5, 6.

23. Ke ka baka la’ng tsogo e tla thabiša dipelo tša rena?

²³ Baratiwa ba ba hwilego ba tla tsošetšwa bophelong ba e-na le kholofelo ya go se sa hwa le ka mohla. Ka moka bao ba robetšego lehung bao ba lego mogopolong wa Modimo ba tla bušetšwa bophelong. Ge e le gabotse, “go tla ba le tsogo ya ba lokilego gotee le ba sa lokago.”—Ditiro 24:15; Johane 5:28, 29.

24. O ikwa bjang ka go phela Paradeiseng mo lefaseng?

²⁴ A bokamoso bjo bo kgahlišago gakaakang bjo bo letetšego bao ba kgethago go ithuta ka Mmopi wa rena yo Mogolo, Jehofa Modimo, gaešita le go mo hlankela! Jesu o be a bolela ka Paradeise e tlago mo lefaseng ge a be a holofetša sesenyi seo se ilego sa hwa kgaufsi le yena gore: “O tla ba le nna Paradeiseng.” (Luka 23:43) Ke gabohlokwa gore re ithute mo go oketšegilego ka Jesu Kriste, yoo ka yena ditšhegofatšo tše ka moka di tlago go kgonega.