THUTO 38
Bontšha Gore o Leboga Mpho ya Bophelo
Bophelo bo bose kudu. Le ge re fela re eba le mathata, go na le dilo tše dintši kudu tšeo re ka di thabelago mo bophelong. Re ka bontšha bjang gore re leboga mpho ye e botse ya bophelo? Le gona, ke ka baka la’ng re swanetše go bontšha gore re leboga bophelo?
1. Ke ka baka la eng re swanetše go leboga bophelo?
Re swanetše go leboga bophelo ka gobane ke mpho yeo e tšwago go Tatago rena yo a re ratago kudu e lego Jehofa. Ka ge bophelo bo etšwa go yena, ke yena “mothopo wa bophelo.” (Psalme 36:9) Le gona, Beibele e re: “Yena ka noši o nea batho ka moka bophelo le mohemo le dilo ka moka.” (Ditiro 17:25, 28) Jehofa o re fa dilo ka moka tšeo re di hlokago gore re phele. E bile o re fa le dilo tšeo di dirago gore re ipshine ka bophelo.—Bala Ditiro 14:17.
2. Re ka bontšha Jehofa bjang gore re leboga mpho yeo a re filego yona ya bophelo?
Jehofa o thomile go go rata ge mma wa gago a se no thoma go go ima. E bile o ile a dira gore Dafida yo a bego a mo hlankela a ngwale gore: “Mahlo a gago a mpone ke sa thoma go bopega.” (Psalme 139:16) Bophelo bja gago bo bohlokwa kudu go Jehofa. (Bala Mateo 10:29-31.) O kwa bohloko kudu ge motho a ka ipolaya goba a bolaya motho yo mongwe. a (Ekisodo 20:13) Le gona o kwa bohloko kudu ge re bea maphelo a rena le a batho ba bangwe kotsing ka boomo. Ge re itlhokomela e bile re hlompha maphelo a batho ba bangwe, re bontšha gore re hlompha mpho e botse yeo Modimo a re filego yona ya bophelo.
ITHUTE KA MO GO TSENELETŠEGO
Ekwa gore o ka dira eng gore o bontšhe gore o leboga mpho ya bophelo.
3. Itlhokomele
Ka ge re tshepišitše Jehofa gore re tlo dula re dira dilo tšeo a nyakago re di dira, re šomiša maphelo a rena go mo hlankela. Ge re dira bjalo, go no swana le ge re nea Jehofa maphelo a rena e le sehlabelo. Balang Baroma 12:1, 2, gomme le boledišaneng ka dipotšišo tše di latelago:
-
Ke ka baka la’ng o swanetše go itlhokomela?
-
Ke dilo dife tšeo o ka di dirago go bontšha gore o a itlhokomela?
4. Itšhireletše o be o šireletše le batho ba bangwe gore go se be le motho yo a gobalago goba yo a hwago
Beibele e re botša gore re se ke ra dira dilo tšeo di lego kotsi. Bapalang BIDIO ye gore o kwe dilo tšeo o ka di dirago gore o itšhireletše.
Balang Diema 22:3, gomme le boledišaneng ka gore wena le batho ba bangwe le ka dira eng gore le dule le šireletšegile . . .
-
ka gae.
-
mošomong.
-
ge o bapala dipapadi.
-
ge o reila koloi goba o nametše ka koloing.
5. Hlompha bophelo bja ngwana yo a sa imilwego
Dafida o ile a bolela gore Jehofa o na le taba le bophelo bja leseana leo le sa lego ka popelong, le dilo ka moka tšeo di diregago ka leseana leo. Balang Psalme 139:13-17, gomme le boledišaneng ka potšišo e latelago:
-
Go ya ka Jehofa, na bophelo bja motho bo thoma ge a sa imilwe goba ge a belegwa?
Jehofa o ile a nea Baisiraele melao yeo e bego e šireletša bomma le bana ba bona bao ba sa ba imilego. Balang Ekisodo 21:22, 23, gomme le boledišaneng ka dipotšišo tše di latelago:
-
Jehofa o be a ikwa bjang ka motho yo a bego a ka bolaya ka phošo leseana leo le sa imilwego?
-
O be a ikwa bjang ka motho yo a bego a ka bolaya leseana leo ka boomo? b
-
Wena o ikwa bjang ka molao wo Jehofa a bego a o neile Baisiraele lengwalong le?
Le ge mosadi yo a imilego a hlompha bophelo, ka dinako tše dingwe a ka bona eka o na le lebaka le le kwagalago la go ntšha mpa. Balang Jesaya 41:10, gomme le boledišaneng ka dipotšišo tše di latelago:
-
Ge e ba mosadi yo a imilego a ikwa a gapeletšega go ntšha mpa goba batho ba bangwe ba mo gapeletša, o swanetše go kgopela thušo go mang? Go re’ng o re’alo?
BATHO BA BANGWE BA RE: “Ga se phošo ge mosadi a ntšha mpa, akere ke mmele wa gagwe!”
-
Ke ka baka la’ng o dumela gore Jehofa o hlompha bophelo bja mma le bja ngwana yo a sa lego ka popelong ya gagwe?
O ITHUTILE ENG?
Beibele e re ruta gore re rate bophelo, re bo hlomphe e bile re bo šireletše, ka gobane ke mpho e botse yeo Jehofa a re filego yona. Se se ra gore re swanetše go hlompha maphelo a rena le a batho ba bangwe.
Dipotšišo
-
Ke ka baka la’ng bophelo bja batho bo le bohlokwa kudu go Jehofa?
-
Jehofa o ikwa bjang ge motho a ka bolaya motho yo mongwe ka boomo, goba leseana leo le sa imilwego?
-
Ke ka baka la’ng o leboga mpho yeo Modimo a re filego yona ya bophelo?
ITHUTE KA MO GO OKETŠEGILEGO
Re ka bontšha bjang gore re leboga mpho e botse ya bophelo yeo Jehofa a re filego yona?
Ekwa karabo ya potšišo e rego: Na Modimo a ka lebalela mosadi yo a kilego a ntšha mpa?
“Modimo o Ikwa Bjang ka go Ntšha Mpa?” (Sehlogo seo se lego wepesaeteng)
Taba ya gore Jehofa o hlompha bophelo e ka re thuša bjang gore re kgethe boithabišo bjo bo ka se beego maphelo a rena kotsing? Ekwa karabo sehlogong se:
“‘Dipapadi tše di Feteletšego’—Na o Swanetše go Lekela Hlogong?” (Phafoga! ya October 8, 2000.)
Ekwa gore Beibele e ka thuša bjang motho yo a dulago a nagana ka go ipolaya.
“Na Beibele e ka Nthuša ge ke Dula ke Nagana ka go Ipolaya?” (Sehlogo seo se lego wepesaeteng)
a Jehofa o na le taba le batho bao ba kwelego bohloko. (Psalme 34:18) O a kwešiša gore ge batho ba kwele bohloko, ba ka no duma go ipolaya. E bile o nyaka go thuša batho ba bjalo. Jehofa a ka thuša bjang motho yo a nyakago go ipolaya gore a se sa nyaka go ipolaya? E le gore o kwe karabo, bala sehlogo seo se rego: “Na Beibele e ka Nthuša ge ke Dula ke Nagana ka go Ipolaya?” seo se lego ka tlase ga karolo e rego, Ithute ka mo go Oketšegilego thutong yona ye.
b Batho bao ba kilego ba ntšha mpa ga se ba swanela go ikwa ba le molato kudu ka gobane Jehofa a ka ba lebalela. Ge o nyaka go kwa ditaba tše dingwe mabapi le go ntšha mpa, bala sehlogo seo se rego: “Modimo o Ikwa Bjang ka go Ntšha Mpa?” seo se lego ka tlase ga karolo e rego, Ithute ka mo go Oketšegilego thutong yona ye.
You May Also Like
DIPOTŠIŠO TŠEO DI BOTŠIŠWAGO KUDU
Thuto ya Beibele ke Eng?
Hwetša dikarabo tša dipotšišo tša mabapi le thuto ya rena ya mahala ya Beibele.
