Mangwalo a Bakriste a Segerika gantši a bolela ka Baranaba le moapostola Paulo. Banna ba ba ile ba hlankela e le balebeledi ba basepedi, ba etela diphuthego tša pele. Ka baka la’ng? Ba be ba tshwenyegile e le ka kgonthe ka boiketlo bja bana babo bona ba moya. Paulo o ile a bolela gore o be a nyaka go ‘boela le go etela bana babo’ go bona gore ba be ba phela bjang. O be a ikemišeditše go sepela dikhilomithara tše makgolo gore a yo ba kgothatša. (Ditiro 15:36) Yeo ke kganyogo yeo balebeledi ba rena ba basepedi ba nago le yona lehono.

Ba tlela go re kgothatša. Molebeledi yo mongwe le yo mongwe wa tikologo o etela diphuthego tše e ka bago tše 20, o fetša beke le e nngwe le e nngwe ya tšona gabedi ka ngwaga. Re ka holwa kudu ke phihlelo ya bana ba babo rena ba le basadi ba bona, ge e ba ba nyetše. Ba katanela go tseba ba bagolo le ba banyenyane, gomme ba fišegela go ya le rena bodireding bja tšhemo le bathong bao re ithutago Beibele le bona. Balebeledi ba ba dira maeto a bodiši le bagolo, gomme ba re matlafatša ka go nea dipolelo tše di kgothatšago dibokeng le dikopanong.—Ditiro 15:35.

Ba kgahlegela bohle. Balebeledi ba tikologo ba tloga ba kgahlegela boemo bja moya bja diphuthego. Ba kopana le bagolo le bahlanka ba bodiredi bakeng sa go hlahloba tšwelopele yeo e dirilwego le go ba nea keletšo e šomago tabeng ya go phetha boikarabelo bja bona. Ba thuša babulamadibogo gore ba atlege bodireding bja bona e bile ba thabela go tseba batho bao ba sa tšwago go thoma go kopanela le go kwa ka tšwelopele ya bona ya moya. Yo mongwe le yo mongwe wa bana ba babo rena o ikgafa e le ‘mošomigotee bakeng sa go re hola.’ (2 Bakorinthe 8:23) Re swanetše go ekiša tumelo ya bona le boineelo bja bona go Modimo.—Baheberu 13:7.

• Balebeledi ba tikologo ba etela diphuthego ka morero ofe?

• O ka holwa bjang ke diketelo tša bona?