Go rutwa Beibele e be e dutše e le leswao le legolo la Dihlatse tša Jehofa. Bao ba fetšago nako e ntši ba le modirong wa go bolela ka Mmušo wa Modimo ba diretšwe dikolo tše di kgethegilego tšeo di ba thušago go ‘phetha bodiredi bja bona ka botlalo.’—2 Timotheo 4:5.

Sekolo sa Tirelo ya Bobulamadibogo. Ge mogoeledi a fetša ngwaga wa gagwe wa mathomo e le mmulamadibogo wa ka mehla, o laletšwa go ba gona sekolong sa matšatši a tshelelago seo se ka swarelwago Holong ya Mmušo ya kgauswi le ga gabo. Morero wa sekolo se ke go thuša mmulamadibogo go batamela kgauswi le Jehofa, gore a atlege kutšwanyana dibopegong ka moka tša bodiredi le go mo thuša go tšwela pele ka tirelo ya gagwe.

Sekolo sa Baebangedi ba Mmušo. Morero wa sekolo se sa dikgwedi tše pedi ke go thuša babulamadibogo bao ba nago le phihlelo bao ba ikemišeditšego go tloga gae gore ba yo hlankela moo go nago le tlhokagalo. Ge e le gabotse, ba ekiša Moebangedi yo mogolo yo a kilego a hlankela mo lefaseng e lego Jesu Kriste ka go bolela gore: “Ke nna yo! Roma nna!” (Jesaya 6:8; Johane 7:29) Ge ba tloga magae, ba ka swanelwa ke go yo phela bophelo bja tlasana. Setšo sa mo ba yago, boemo bja leratadima le dijo tša moo di ka ba di fapana kudu le tša mo ba tšwago. E bile ba ka swanelwa ke go ithuta leleme le lefsa. Sekolo se se thuša bana babo rena le dikgaetšedi bao ba sego lenyalong gotee le banyalani, ba nywaga e 23 go ya go e 65, gore ba be le bokgoni le dika tša moya tšeo di tlago go ba thuša kabelong ya bona e le gore ba tle ba dirišwe kudu ke Jehofa le mokgatlo wa gagwe.

Sekolo sa Beibele sa Watchtower sa Gilead. Ka Seheberu, lentšu “Gilead” le bolela “Mokgobo wa Bohlatse.” Ga e sa le se thewa ka 1943, dialoga tša sekolo se tša ka godimo ga tše 8 000 di rometšwe dinageng tše di fapafapanego e le baromiwa gore di yo nea bohlatse “go fihla karolong ya kgole ya lefase” gomme di bile le mafelelo a mabotse kudu. (Ditiro 13:47) Ge dialoga tše di be di fihla la mathomo kua Peru, go be go se na diphuthego nageng yeo. Gona bjale go na le diphuthego tša ka godimo ga tše 1 000. Ge baromiwa ba rena ba be ba fihla Japane, go be go na le Dihlatse tša ka tlase ga tše lesome nageng ye. Gona bjale go na le Dihlatse tša ka godimo ga tše 200 000. Bao ba yago sekolong se sa dikgwedi tše hlano sa Gilead, ba rutwa Lentšu la Modimo ka mo go tseneletšego. Sekolong se go laletšwa babulamadibogo ba kgethegilego, baromiwa, bao ba hlankelago diofising tša makala a rena goba balebeledi ba tikologo gomme ba newa tlwaetšo e tseneletšego gore ba tle ba thekge modiro wa lefase ka bophara.

• Morero wa Sekolo sa Tirelo ya Bobulamadibogo ke ofe?

• Ke bomang bao ba yago Sekolong sa Baebangedi ba Mmušo?