1-3. Batho ba botšiša dipotšišo tša mohuta ofe ka lehu, gona dikereke tše dingwe di araba dipotšišo tšeo bjang?

BEIBELE e re holofetša gore ka letšatši le lengwe “lehu le ka se hlwe le sa ba gona.” (Kutollo 21:4) Go Kgaolo 5, re ithutile gore sehlabelo sa Jesu sa topollo ke sona se dirago gore re kgone go tlo hwetša bophelo bjo bo sa felego. Eupša gona bjale batho ba sa hwa. (Mmoledi 9:5) Ka baka leo, e nngwe ya dipotšišo tša bohlokwa tšeo re ipotšišago tšona ke gore: Go direga eng ka rena ge re ehwa?

² Gantši re nyaka go tseba karabo ya potšišo yeo ge motho yo re mo ratago a hwile. Re ka ipotšiša gore: ‘O ile kae? Na o a re bona? Na a ka kgona go re thuša? Na re tla tsoga re mmone gape?’

³ Dikereke di araba dipotšišo tšeo ka ditsela tše di sa swanego. Tše dingwe di ruta gore ge e ba o lokile, ge o ehwa o ya legodimong, gomme ge e ba o le motho yo mobe, o yo swa diheleng. Dikereke tše dingwe di re ge o ehwa o fetoga sebopiwa sa moya gomme wa phela le ba geno bao ba šetšego ba hwile. Tše dingwe tšona di re ge o hwile gomme Modimo a feditše go go ahlola, o tlo tswalwa gape, goba wa belegwa gape ka mmele o mongwe, mohlomongwe o le motho yo mongwe goba gaešita le phoofolo.

4. Ke thuto efe e kgolo yeo dikereke di e rutago ka lehu?

⁴ Go bonagala dikereke di ruta dilo tše di sa swanego. Eupša mo e ka bago ka moka ga tšona di ruta thuto e tee e kgolo. Di ruta gore ge motho a ehwa, selo se itšego go yena se tšwela pele se phela. Na thuto yeo ke therešo?

5, 6. Go direga’ng ka rena ge re ehwa?

⁵ Jehofa o tseba seo se diregago go rena ge re ehwa, gomme o re boditše gore ge motho a ehwa, o kgaotša go phela. Ge motho a sa phele, o hwile. Ka gona ge motho a ehwa, ga a sa kwa selo e bile ga a sa gopola selo, ga a tšwele pele a phela kaekae. * Ge re hwile, ga re bone selo, ga re kwe selo e bile ga re nagane selo.

⁶ Kgoši Solomone o ngwadile gore “bahu ga ba tsebe selo le gatee.” Bahu ga ba sa kgona go rata motho goba go mo hloya, e bile kua ‘Bodulabahu ga go na modiro le ge e le maano goba tsebo.’ (Bala Mmoledi 9:5, 6, 10.) Le gona Beibele go Psalme 146:4 e re botša gore ge motho a hwile, “menagano ya gagwe” e a hwa.

7. Jesu o boletše’ng ka lehu?

⁷ Ge mogwera wa gagwe yo mogolo e lego Latsaro a be a hwile, Jesu o ile a botša barutiwa ba gagwe gore: “Latsaro mogwera wa rena o robetše.” Eupša Jesu o be a sa bolele gore Latsaro o robetše borokong. Jesu o ile a tšwela pele ka gore: “Latsaro o hwile.” (Johane 11:11-14) Ka gona Jesu o ile a swantšha lehu le boroko. Ga se a bolela gore Latsaro o legodimong goba gore o na le ba gabo bao le bona ba hwilego. Le gona ga se a bolela gore Latsaro o a swa diheleng goba gore o belegwe gape e le motho yo mongwe goba phoofolo. Go e na le moo, go be go le bjalo ka ge eka Latsaro o robetše. Ditemana tše dingwe tša Beibele di swantšha lehu le boroko bjo bogolo. Beibele e re ge Stefano a be a bolawa o ile “a robala lehung.” (Ditiro  7:60) Moapostola Paulo le yena o ngwadile gore Bakriste ba bangwe ba “robetše lehung.”—1 Bakorinthe 15:6.

8. Re tseba bjang gore Modimo o be a sa bopela batho gore ba feleletše ba hwile?

⁸ Na Modimo o be a bopile Adama le Efa gore ba tle ba feleletše ba hwile? Aowa! Jehofa o be a ba bopetše gore ba phele ka mo go sa felego e bile ba sa babje. Ge Jehofa a be a ba bopa, o ile a tsenya ka go bona kganyogo ya go nyaka go phela ka mo go sa felego. (Mmoledi 3:11) Ga go na motswadi yo a ratago go bona bana ba gagwe ba tšofala le go hwa. Jehofa le yena o ikwa bjalo ka rena. Eupša ge e ba  Modimo a re bopetše go phela ka mo sa felego, ke ka baka la’ng re ehwa?

9. Ke ka baka la’ng taelo yeo Jehofa a bego a e neile Adama le Efa go be go se thata go e latela?

⁹ Serapeng sa kua Edene, Jehofa o ile a botša Adama gore: ‘Le ka ja la ba la kgotsofala ka se se tšwago sehlareng se sengwe le se sengwe sa mo serapeng. Eupša ge e le sehlare sa go tseba botse le bobe le se ke la ja tša sona, gobane mohlang le ka jago tša sona le tla hwa lehu.’ (Genesi 2:9, 16, 17) Go be go se thata go latela taelo yeo e kwagalago, le gona Jehofa o be a na le tshwanelo ya go botša Adama le Efa se se nepagetšego le se se fošagetšego. Ka go kwa Jehofa, ba be ba tla bontšha gore ba hlompha matla a gagwe a bolaodi. E bile ba be ba tla bontšha gore ba leboga kudu dilo ka moka tšeo a ba neilego tšona.

10, 11. (a) Sathane o ile a fora Adama le Efa bjang? (b) Ke ka baka la’ng Adama le Efa ba be ba se na lebaka le le kwagalago la go dira seo ba se dirilego?

¹⁰ Ka maswabi, Adama le Efa ba ile ba kgetha go se kwe Jehofa. Sathane o ile a re go Efa: “A ke therešo gore Modimo o itše le se ke la ja tše di tšwago sehlareng se sengwe le se sengwe sa mo serapeng?” Efa a araba ka gore: “Dienywa tša dihlare tša mo serapeng re ka di ja. Eupša ge e le mabapi le go ja dienywa tša sehlare seo se lego gare ga serapa, Modimo o itše: ‘Le se ke la ja tša sona, le se ke la se kgwatha le gatee e le gore le se ke la hwa.’”​—Genesi 3:1-3.

¹¹ Ke moka Sathane a re: “Le ka se hwe lehu. Gobane Modimo o tseba gore ka lona letšatši leo le tlago go ja tša sona, mahlo a lena a tla bulega gomme la swana le Modimo, la tseba botse le bobe.” (Genesi 3:4-6) Sathane o be a nyaka gore Efa a nagane gore a ka itirela phetho magareng ga se se nepagetšego le se se fošagetšego. Ka nako e  swanago, o ile a botša Efa maaka ka seo se bego se tla mo diragalela ge a ka se kwe Modimo. Sathane o ile a botša Efa gore a ka se hwe, ka baka leo Efa o ile a ja seenywa seo ke moka a nea le monna wa gagwe e lego Adama. Adama le Efa ba be ba tseba gore Jehofa o ba boditše gore ba se ke ba ja seenywa seo. Ge ba be ba se ja, ba ile ba bontšha gore ba kgetha go se kwe taelo ya Modimo e lerato le e kwagalago. Ka go ja seenywa seo, ba ile ba bontšha gore ga ba hlomphe Tatago bona yo lerato wa legodimong. Ruri ba be ba se na lebaka le le kwagalago la go dira seo ba se dirilego!

12. Ke ka baka la’ng go nyamiša gore Adama le Efa ga se ba kwa Jehofa?

¹² Ruri go a nyamiša gore batswadi ba rena ba mathomo ga se ba ka ba hlompha Mmopi wa bona! Wena o be o tla ikwa bjang o godišitše ngwana gomme ka morago a fetoga lerabele gomme a dira se se fapanego le seo o mo laetšego gore a se dire? Na o be o ka se kwe bohloko?

13. Jehofa o be a e ra go re’ng ge a be a re “o tla boela leroleng”?

¹³ Ka baka la go se kwe, Adama le Efa ba ile ba lahlegelwa ke sebaka sa go phela ka mo go sa felego. Jehofa o ile a botša Adama gore: “Gobane o lerole gomme o tla boela leroleng.” (Bala Genesi 3:19.) Seo se be se bolela gore Adama o be a tla boela mmung, gwa ba bjalo ka ge eka ga se a ka a bopša. (Genesi 2:7) Ka morago ga gore Adama a dire sebe, o ile a hwa gomme a se sa ba gona.

14. Ke ka baka la’ng re ehwa?

 ¹⁴ Ge nkabe Adama le Efa ba ile ba kwa Modimo, nkabe ba sa phela lehono. Eupša ka go se mo kwe, ba ile ba dira sebe, gomme ba feleletša ba hwile. Sebe se swana le bolwetši bjo kotsi bjoo re bo fetišeditšwego ke batswadi ba rena ba mathomo. Ka moka ga rena re belegwa re le badiradibe, ke ka baka leo re hwago. (Baroma 5:12) Eupša Modimo o be a sa nyake gore go be bjalo. Modimo o be a sa nyake gore batho ba hwe, e bile Beibele e bitša lehu gore ke “lenaba.”​—1 Bakorinthe 15:26.

15. Go tseba seo se diregago ka rena ge re ehwa go re thuša bjang?

¹⁵ Go tseba seo se diregago go rena ge re ehwa go re lokolla dikgopolong tše dintši tša maaka. Beibele e re ruta gore bahu ga ba kwe bohloko goba go nyama. Re ka se kgone go bolela le bona, gomme le bona ba ka se bolele le rena. Re ka se thuše bahu ka selo, le bona ba ka se re thuše ka selo. Ba ka se re gobatše, ka go re’alo ga go hlokagale gore re ba tšhabe. Lega go le bjalo, dikereke tše dintši di botša batho gore bahu ba a phela kaekae le gore re ka ba thuša ge re ka nea baruti tšhelete goba bao go thwego ke bakgethwa. Eupša ge re tseba therešo ka seo se diregago ka rena ge re ehwa, ga re forwe ke maaka ao.

16. Dikereke tše dintši di ruta maaka afe ka bahu?

¹⁶ Sathane o diriša dikereke go botša batho maaka le go dira gore ba nagane gore bahu ba a phela. Ka mohlala, dikereke tše dingwe di ruta gore ge re ehwa, selo se itšego ka go rena se tšwela pele se phela kaekae. Na kereke ya gago e ruta seo, goba na e ruta seo Beibele e se bolelago ka bahu? Sathane o diriša maaka go aroša batho go Jehofa.

17. Ke ka baka la’ng thuto ya gore batho ba fišwa diheleng e senya Jehofa leina?

¹⁷ Seo dikereke tše dintši di se rutago ka bahu ke maaka  a matala. Ka mohlala, dikereke tše dingwe di ruta gore batho ba babe ge ba ehwa ba yo fišwa diheleng ka mo go sa felego. Maaka ao a senya Jehofa leina. Modimo a ka se tsoge a dumeletše gore batho ba tlaišege ka tsela yeo! (Bala 1 Johane 4:8.) Wena o ka ikwa bjang ka motho yo a otlago ngwana ka go fiša matsogo a gagwe mollong? O tla mmona a le sehlogo kudu. E bile o ka se nyake go gwerana le motho yoo. Ke kamoo Sathane a nyakago gore re ikwe ka gona ka Jehofa!

18. Ke ka baka la’ng re sa swanela go tšhaba bahu?

¹⁸ Dikereke tše dingwe di botša batho gore ge re ehwa, re fetoga meoya. Dikereke tše bjalo di ba ruta gore ba swanetše go hlompha meoya yeo gaešita le go e tšhaba, ka gobane e ka ba bagwera ba bona ba babotse goba ya ba manaba a bona. Batho ba bantši ba dumela maaka ao. Ba tšhaba bahu, ka baka leo ba rapela bona go e na le go rapela Jehofa. Gopola gore bahu ga ba kwe selo, ka gona ga go nyakege gore re ba tšhabe. Jehofa ke Mmopi wa rena. Ke Modimo wa therešo, gomme re swanetše go rapela yena feela.​—Kutollo 4:11.

19. Go tseba seo se diregago ka rena ge re ehwa go re thuša bjang?

¹⁹ Ge re tseba therešo ka seo se diregago ge re ehwa, re lokologa maakeng ao a rutwago ke dikereke. E bile therešo ye e re thuša go kwešiša dilo tše dibotse tšeo Jehofa a re holofeditšego tšona nakong e tlago.

20. Re tlo ithuta ka’ng kgaolong e latelago?

²⁰ Kgalekgale yo mongwe wa bahlanka ba Modimo e lego Jobo o ile a botšiša gore: ‘Ge e ba motho a ehwa, na a ka buša a phela?’ (Jobo 14:14) Na ruri go a kgonega gore motho yo a hwilego a tsoge bahung? Karabo yeo Modimo a re neago yona ka Beibeleng e kgahliša kudu. Re tla e bona kgaolong e latelago.