1, 2. (a) Na go no tseba leina la motho yo a tumilego go bolela gore o mo tseba gabotse? Hlalosa. (b) Ke’ng seo batho ba se dumelago ka Jesu?

GO NA le batho ba bantši bao ba tumilego mo lefaseng. O ka no ba o tseba leina la motho yo a tumilego. Eupša go tseba leina la motho yoo ga go bolele gore o mo tseba gabotse. Ga go bolele gore o tseba selo se sengwe le se sengwe ka bophelo bja gagwe le gore ge e le gabotse ke motho wa mohuta mang.

² O ka ba o kwele ka Jesu Kriste, gaešita le ge a phetše mo lefaseng nywageng e ka bago e 2 000 e fetilego. Eupša batho ba bantši ga ba tsebe gore Jesu e be e le motho wa mohuta mang. Ba bangwe ba re e be e le monna wa go loka, ba bangwe ba re e be e le moporofeta, gomme ba bangwe ba dumela gore ke Modimo. Wena o re’ng?—Bala Tlhaloso 12.

3. Ke ka baka la’ng go le bohlokwa gore o tsebe Jehofa Modimo le Jesu Kriste?

³ Go bohlokwa gore o tsebe therešo ka Jesu. Ka baka la’ng? Beibele e re botša gore: “Se se bolela bophelo bjo bo sa felego, gore ba tsebe wena Modimo a nnoši wa therešo le yo o mo romilego, Jesu Kriste.” (Johane 17:3) Ee, ge e ba o tseba therešo ka Jehofa le Jesu, o ka phela ka mo go sa felego lefaseng la paradeise. (Johane 14:6) Le gona, go tseba ka Jesu go tla go thuša ka gobane ke mohlala o mokaone wa go go ruta kamoo o ka phelago le go swara ba bangwe ka gona. (Johane 13:34, 35) Kgaolong  ya pele, re ithutile therešo ka Modimo. Ga bjale re tlo ithuta seo Beibele e re rutago sona ka Jesu.

4. Leina “Mesia” le leina “Kriste” a bolela’ng?

⁴ Mengwaga e mentši pele Jesu a ka belegwa, Jehofa o ile a holofetša ka Beibeleng gore o tla romela Mesia, goba Kriste. Leina “Mesia” le tšwa lelemeng la Seheberu, gomme leina “Kriste” le tšwa lelemeng la Segerika. Maina a ka bobedi a bolela gore Modimo o be a tla kgetha Mesia yo a holofeditšwego gomme a mmea boemong bjo bo kgethegilego. Mesia o be a tla dira gore dikholofetšo ka moka tša Modimo di phethagale. Jesu a ka go thuša le gona bjale. Eupša pele Jesu a ka belegwa, batho ba bantši ba ile ba ipotšiša gore: ‘Ke mang yo e tla bago Mesia?’

5. Na barutiwa ba Jesu ba be ba dumela gore Jesu ke Mesia?

⁵ Barutiwa ba Jesu ba be ba sa belaele gore Jesu ke Mesia yo a holofeditšwego. (Johane 1:41) Ka mohlala, Simone Petro o ile a re go Jesu: “Ke wena Kriste.” (Mateo 16:16) Re ka kgodišega bjang gore Jesu ke Mesia?

6. Jehofa o ile a thuša bjang batho ba botegago go tseba Mesia?

⁶ Nako e telele pele Jesu a ka belegwa, baporofeta ba Modimo ba ile ba ngwala dilo tše dintši tšeo di bego di tla thuša batho gore ba tsebe Mesia. Di be di tla ba thuša bjang? A re re o kgopetšwe gore o ye boemapeseng bja leemaema go yo tšea motho yo o sa kago wa mmona. Ge e ba go ka ba le motho yoo a go hlalosetšago yena gabotse, o tla kgona go mo tseba. Ka tsela e swanago, Jehofa o ile a diriša baporofeta ba gagwe go re botša seo Mesia a bego a tla se dira le seo se bego se tla mo diragalela. Go phethagala ga diporofeto tšeo ka moka go thuša batho ba botegago go tseba gore Jesu ke Mesia.

7. Ke diporofeto dife tše pedi tšeo di bontšhago gabotse gore Jesu ke Mesia?

 ⁷ Tše pedi tša diporofeto tšeo ke tše di latelago. Sa mathomo, mengwaga e 700 pele Jesu a ka belegwa, Mika o ile a porofeta gore Mesia o tla belegelwa motseng o monyenyane wa Betlelehema. (Mika 5:2) Ke gona moo Jesu a belegetšwego gona! (Mateo 2:1, 3-9) Sa bobedi, Daniele o ile a porofeta gore Mesia o be a tla tšwelela ka ngwaga wa 29 C.E. (Daniele 9:25) Tše e no ba tše pedi tša diporofeto tše dintši tšeo di bontšhago gabotse gore Jesu ke Mesia yo a holofeditšwego.​—Bala Tlhaloso 13.

8, 9. Ke’ng seo se diregilego ge Jesu a be a kolobetšwa seo se hlatselago gore ke Mesia?

⁸ Jehofa o ile a hlalosa ka mo go kwagalago gore Jesu ke Mesia. Modimo o ile a holofetša Johane Mokolobetši gore go na le dilo tšeo a tlago go tseba ka tšona yo e bego e tla ba Mesia. Ge Jesu a eya go Johane gore a mo kolobetše Nokeng ya Jorodane ka ngwaga wa 29 C.E., Johane o ile a bona dilo tšeo. Beibele e re botša seo se diragetšego, e re: “Ka morago ga ge a kolobeditšwe a rotoga gateetee meetseng, magodimo a bulega, a bona moya wa Modimo o theoga bjalo ka leeba o etla godimo ga gagwe. Bonang! Le gona gwa kwala lentšu le le tšwago magodimong le re: ‘Yo ke Morwa wa ka, morategi, yo ke mo amogetšego.’” (Mateo 3:16, 17) Ge Johane a bona le go kwa seo, o ile a tseba gore Jesu ke Mesia. (Johane 1:32-34) Letšatšing leo, ge Jehofa a tšhollela moya wa gagwe go Jesu, o ile a ba Mesia. E be e le yena yoo Modimo  a mo kgethilego gore e be Moetapele le Kgoši.​—Jesaya 55:4.

⁹ Diporofeto tša Beibele, mantšu a Jehofa ka bowona le seo A bego a boletše gore se tla direga ge Jesu a kolobetšwa, di hlatsela gore Jesu ke Mesia. Eupša Jesu o be a etšwa kae le gona e be e le motho wa mohuta mang? Anke re boneng seo Beibele e se bolelago.

10. Beibele e re ruta’ng ka bophelo bja Jesu pele a ka tla mo lefaseng?

¹⁰ Beibele e re ruta gore Jesu o phetše legodimong ka nako e telele pele a ka tla lefaseng. Mika o itše Mesia ke wa “mehla ya pele.” (Mika 5:2) Jesu ka boyena o boletše ka makga a mantši gore o phetše legodimong pele a ka belegwa e le motho. (Bala Johane 3:13; 6:38, 62; 17:4, 5.) Gaešita le pele a ka tla mo lefaseng, Jesu o be a na le tswalano e kgethegilego le Jehofa.

11. Ke ka baka la’ng Jesu a le bohlokwa kudu go Jehofa?

¹¹ Jesu o bohlokwa kudu go Jehofa. Ka baka la’ng? Ka gobane Modimo o mmopile pele a bopa dilo ka moka le motho le ge e le ofe. Ke ka baka leo Jesu a bitšwago “leitšibulo la tlholo yohle.” * (Bakolose 1:15) Le gona Jesu o bohlokwa kudu go Jehofa ka gobane ke yena feela Jehofa a mmopilego ka go lebanya. Ke ka baka leo a bitšwago ‘Morwa yo a tswetšwego a nnoši.’ (Johane 3:16) E bile ke Jesu feela yo Jehofa a mo dirišitšego go bopa dilo tše dingwe ka moka. (Bakolose 1:16) Le gona ke Jesu feela yo a bitšwago “Lentšu,” ka gobane Jehofa o mo dirišitše go iša melaetša le ditaelo go barongwa le go batho.​—Johane 1:14.

12. Re tseba bjang gore Jesu le Modimo ga se motho o tee?

¹² Batho ba bangwe ba dumela gore Jesu le Modimo ke motho o tee. Eupša se ga se seo Beibele e se rutago. Beibele e re Jesu o bopilwe, e lego seo se bolelago gore o na le mathomo. Eupša Jehofa, yoo a bopilego dilo ka moka, ga a na mathomo. (Psalme 90:2) Ka ge Jesu e le Morwa wa Modimo, le ka mohla ga se a ka a leka go itira  Modimo. Beibele e ruta ka mo go kwagalago gore Tate o feta Morwa. (Bala Johane 14:28; 1 Bakorinthe 11:3.) Ke Jehofa feela yo e lego “Modimo Ramatlaohle.” (Genesi 17:1) Ke Modimo yo mogolo kudu le yo a phagamego kudu legohleng.​—Bala Tlhaloso 14.

13. Ke ka baka la’ng Beibele e re Jesu ke “seswantšho sa Modimo yo a sa bonagalego”?

¹³ Jehofa le Morwa wa gagwe e lego Jesu, ba ile ba šoma gotee ka mengwaga e dibilione pele magodimo le lefase di ka ba gona. Ba swanetše go ba ba be ba ratana kudu! (Johane 3:35; 14:31) Jesu o ile a ekiša dika tša tatagwe gabotse moo Beibele e mmitšago “seswantšho sa Modimo yo a sa bonagalego.”​—Bakolose 1:15.

14. Go kgonegile bjang gore Morwa yo bohlokwa kudu wa Jehofa a belegwe e le motho?

¹⁴ Morwa yo bohlokwa kudu wa Jehofa o ile a ikemišetša go tloga legodimong e le gore a belegwe e le motho mo lefaseng. Seo se ile sa kgonega bjang? Jehofa o ile a fetišetša ka mohlolo bophelo bja Morwa wa gagwe ka popelong ya kgarebe yeo e bitšwago Maria. Ka yona tsela ye, go be go sa hlokagale gore Jesu a be le tatagwe wa madi. Ka gona Maria o ile a belega morwa yo a phethagetšego, gomme a mmitša Jesu.​—Luka 1:30-35.

15. O ka dira’ng gore o tsebe Jehofa gakaone?

¹⁵ O ka ithuta mo gontši ka Jesu, bophelo bja gagwe le dika tša gagwe ka go bala puku ya Beibele ya Mateo, Mareka, Luka le Johane. Dipuku tšeo di bitšwa Diebangedi. Ka ge Jesu a swana le Tatagwe, seo o se balago se tla go thuša gore o tsebe Jehofa gakaone. Ke ka baka leo Jesu a ilego a re: “Yo a bonego nna o bone le Tate.”​—Johane 14:9.

16. Jesu o be a ruta eng? Dithuto tša Jesu di be di etšwa kae?

 ¹⁶ Batho ba bantši ba be ba bitša Jesu gore ke “Morutiši.” (Johane 1: 38; 13:13) Se sengwe sa dilo tša bohlokwa kudu tšeo a bego a di ruta e be e le “ditaba tše dibotse tša Mmušo.” Mmušo wo ke eng? Ke Mmušo wa Modimo woo o tlago go buša lefase ka moka o le legodimong gomme o tlišetše batho bao ba kwago Modimo ditšhegofatšo. (Mateo 4:23) Selo se sengwe le se sengwe seo Jesu a bego a se ruta se be se etšwa go Jehofa. Jesu o itše: “Seo ke se rutago ga se sa ka, eupša ke sa yo a nthomilego.” (Johane 7:16) Jesu o be a tseba gore Jehofa o nyaka batho ba ekwa ditaba tše dibotse tša gore Mmušo wa Modimo o tla buša lefase ka moka.

17. Jesu o be a ruta kae? Ke ka baka la’ng a be a šoma ka thata go ruta batho?

¹⁷ Jesu o be a ruta kae? Kae le kae moo a bego a hwetša batho. O be a ruta dinagamagaeng le ditoropong, metseng, mebarakeng, mafelong a borapedi le magaeng a batho. O be a sa letele gore batho ba tle go yena. Gantši o be a eya go bona. (Mareka 6:56; Luka 19:5, 6) Jesu o ile a šoma ka thata gomme a diriša nako ya gagwe e ntši go ruta batho. Ka baka la’ng? Ka gobane o be a tseba gore Modimo o nyaka gore a dire seo e bile ka mehla o be a ekwa Tatagwe. (Johane 8:28, 29) Le gona Jesu o be a ruta batho ditaba tše dibotse ka gobane a ba kwela bohloko. (Bala Mateo 9:35, 36.) O be a bona gore baetapele ba bodumedi ba be ba sa ba rute therešo ka Modimo le ka Mmušo wa gagwe. Ka gona o be a nyaka go thuša batho ba bantši ka mo a ka kgonago gore ba kwe ditaba tše dibotse.

18. Ke dika dife tša Jesu tšeo o di ratago kudu?

¹⁸ Jesu o be a rata batho le go tshwenyega ka bona. O be a le botho e bile a batamelega. Gaešita le bana ba be  ba rata go ba le yena. (Mareka 10:13-16) Jesu ka mehla o be a dira dilo ka toka. O be a hloile go se botege le go hloka toka. (Mateo 21:12, 13) O phetše mehleng ya ge basadi ba be ba se na ditokelo tše dintši e bile ba sa hlomphiwe. Eupša Jesu ka mehla o be a ba swara ka tlhompho le ka seriti. (Johane 4:9, 27) Le gona Jesu o be a tloga a ikokobeditše. Ka mohlala, mantšiboeng a mangwe o ile a hlapiša barutiwa ba gagwe maoto, e lego modiro wo gantši o bego o dirwa ke mohlanka.​—Johane 13:2-5, 12-17.

19. Ke mohlala ofe woo o bontšhago gore Jesu o be a tseba seo batho ba bego ba tloga ba se hloka le gore o be a nyaka go ba thuša?

¹⁹ Jesu o be a tseba seo batho ba bego ba tloga ba se hloka, gomme o be a nyaka go ba thuša. Seo se ile sa bonagala gabotse ge a be a diriša matla a Modimo go fodiša batho ka mohlolo. (Mateo 14:14) Ka mohlala, monna yo a nago le lephera o ile a tla go Jesu gomme a re: “Ge feela o rata, o ka ntlhwekiša.” Jesu o ile a kgongwa ke ge monna yo a ekwa bohloko le ge a tlaišega. O ile a mo kwela bohloko gomme a nyaka go mo thuša. Ka gona Jesu o ile a otlolla letsogo la gagwe, a kgwatha monna yoo, gomme a re go yena: “Ke a rata. Hlweka.” Ka gona monna yoo wa go babja a fola! (Mareka 1:40-42) Na o ka akanya kamoo monna yo a ilego a ikwa ka gona?

20, 21. Ke bjang Jesu e lego mohlala o mobotse wa go kwa Modimo?

²⁰ Jesu ke mohlala o mobotse wa go kwa Modimo. Go sa šetšwe seo se bego se direga goba seo manaba a gagwe a bego a mo dira sona, o be a botegela Tatagwe. Ka mohlala, Jesu ga se a ka a dira sebe ge Sathane a mo leka. (Mateo 4:1-11) Ba bangwe ba lapa la gabo Jesu ba be ba sa dumele gore e be e le Mesia gomme ba ile ba re “o  hlakane hlogo,” eupša Jesu o ile a tšwela pele a dira modiro woo Modimo a mo neilego wona. (Mareka 3:21) Ge manaba a gagwe a be a mo swara ga sehlogo, Jesu o ile a dula a botegela Modimo gomme ga se a ka a leka go a kweša bohloko.​—1 Petro 2:21-23.

²¹ Gaešita le ge Jesu a ile a hwa lehu le sehlogo le le bohloko, o ile a dula a botegela Jehofa. (Bala Bafilipi 2:8.) Nagana kamoo a ilego a swanelwa ke go kgotlelela dilo tše dintši letšatšing leo a hwilego ka lona. O ile a golegwa, dihlatse tša maaka tša mo latofatša ka gore o rogile Modimo, baahlodi bao ba sa botegego ba mo nyatša, bahlolampherefere ba mo sega, gomme mašole a mo tlaiša le go mo kokotela koteng. Ge a be a ehwa o ile a goeletša ka gore: “Go phethegile!” (Johane 19:30) Matšatši  a mararo ka morago ga ge Jesu a hwile, Jehofa o ile a mo tsoša gomme a mo fa mmele wa moya. (1 Petro 3:18) Ka morago ga dibeke tše mmalwa, Jesu o ile a boela legodimong gomme a “dula ka letsogong la le letona la Modimo” ke moka a letela Modimo gore a tle a mmee go ba Kgoši.​—Baheberu 10:12, 13.

22. Ga bjale re na le sebaka sefe ka baka la ge Jesu a ile a dula a botegela Tatagwe?

²² Ka ge Jesu a ile a dula a botegela Tatagwe, ga bjale re na le sebaka sa go tlo phela ka mo go sa felego lefaseng la paradeise, go etša ge e be e le morero wa Jehofa. Kgaolong e latelago, re tlo ahlaahla kamoo lehu la Jesu le dirago gore go kgonege gore re tle re phele ka mo go sa felego.