MODIMO YO MATLA-OHLE ke Mmuši wa legohle. Maphelo a rena, mo nakong ye le nakong e tlago, a ithekgile ka yena. O na le matla a go nea moputso le matla a go nea kotlo. O na le matla a go nea bophelo le matla a go fediša bophelo. Ge e ba re amogelwa ke yena, re tla atlega; ge e ba re sa amogelwe ke yena, dilo di tla re sepelela gampe kudu. Ke ga bohlokwa gakaakang gore borapedi bja rena bo amogelege go yena!

Batho ba rapela ka ditsela tše dintši. Ge e ba bodumedi bo swana le tsela, na ditsela ka moka tša bodumedi di amogelwa ke Modimo? Aowa, Modimo ga a di amogele. Jesu yo e lego moporofeta wa Modimo, o ile a bontšha gore go na le ditsela tše pedi feela. O itše: “Kxôrô e išaxo tahlexong ké pêtlêkê, le tsela ye e yaxo xôna e phatlaletše; ’me ba ba tsênaxo ka yôna ké ba bantši. Xobane kxôrô e išaxo bophelong e pitlaxane; le tsela ye e yaxo xôna ké e thsêsê; ’me ba ba e bônaxo xa ba nene.”—Mateo 7:13, 14.

Go na le mehuta e mebedi feela ya bodumedi: bjo bo išago bophelong le bjo bo išago tahlegong. Morero wa poroutšha ye ke go go thuša go hwetša tsela e išago bophelong bjo bo sa felego.