1, 2. Ke’ng seo batho ba bantši ba se dumelago mabapi le batho bao ba hwilego?

DIMILIONE tša batho Afrika di dumela gore lehu ga se mafelelo a bophelo, eupša ke phetogo feela, go tšwela pele ka bophelo tikologong e nngwe. Ba bantši ba nagana gore bagologolo ba bona bao ba hwilego ba fetile lefaseng leo le bonagalago go ya lefaseng leo le sa bonagalego, go tloga lefaseng la batho go ya lefaseng la meoya.

² Go dumelwa gore bagologolo ba goba meoya ya bagologolo, e kgonthišetša go phologa le go atlega ga malapa a bona lefaseng. Go ya ka pono ye, meoya ya bagologolo ke bagwera ba nago le tutuetšo e matla, bao ba kgonago go tliša puno e botse, go tšwetša pele go phela gabotse le go šireletša kotsing. Go bolelwa gore ge e ba e hlokomologwa goba e kgopišwa, e ka tliša kotsi—bolwetši, bodiidi le masetlapelo.

3. Batho ba bangwe ba rapela bjang bagologolo?

³ Batho bao ba phelago ba diriša mekgwa le ditirelo tša go hlompha le go boloka tswalano e botse le meoya ya bagologolo. Mekgwa ye e bonala kudu-kudu mahung le mekgweng ya tša poloko e bjalo ka moletelo. Go rapela bagologolo go bontšhwa le ka ditsela tše dingwe gape. Ka mohlala, pele batho ba bangwe ba ka nwa dino tše di tagago, ba tšhela se sengwe fase bakeng sa bagologolo. Le gona, ka morago ga ge dijo di apeilwe, di tlogelwa ka gare ga pitša e le gore ge bagologolo ba e-tla, ba tle ba hwetše seo ba ka se jago.

4. Ke’ng seo batho ba bantši ba se dumelago mabapi le moya?

⁴ Batho ba bangwe ba dumela gore batho bao ba phelago ba na le moya wo o sa hwego wo o phologago lehu la mmele. Ge e ba motho a phela bophelo bjo bobotse, go bolelwa gore moya o ya legodimong goba paradeiseng, eupša ge e ba motho a phela bophelo bjo bobe, go bolelwa gore o ahlolelwa go ya diheleng. Gantši batho ba kopanya kgopolo ye le ditumelo tša setšo. Ka mohlala, kuranta ya dipego tša bahu yeo e tsebišago ka ditirelo tša kereke tša poloko, ka dinako tše dingwe e tla bolela gore motho o “ile tikologong e nngwe” goba “o ile go bagologolo.” Ditumelo tše ka moka di theilwe kgopolong ya gore moya (soul) goba (spirit), o phologa lehu la mmele. Beibele e re’ng mabapi le se?

5, 6. Go ya ka Beibele, moya (soul) ke’ng?

⁵ Beibele e bontšha gore moya (soul) ga se selo seo se lego ka gare ga motho; moya (soul) ke motho ka boyena. Ka mohlala, ge Modimo a be a bopa Adama, ‘motho o ile a napa a ba moya o phelago.’ (Genesi 2:7) Adama ga se a newa moya; e be e le moya, motho yo a feleletšego.

⁶ Ka baka leo, re bala gore meoya e a belegwa. (Genesi 46:18) E ka kgona go ja goba go  ikona. (Lefitiko 7:20; Psalme 35:13) E a lla le go hwa. (Jeremia 13:17; Jona 2:7) Meoya e ka thopša, ya hlomarwa le go swarwa ka ditšhipi. (Doiteronomio 24:7; Psalme 7:5; 105:18) Dibeibele tše dingwe di fetolela lentšu la leleme la mathomo e le “moya (soul)” ditemaneng tšeo, mola tše dingwe di diriša mantšu “sephedi,” “sebopiwa” goba “motho.” Ka moka ga wona a bolela selo setee.

7. Ke ditemana dife tša Beibele tšeo di bontšhago gore moya o ka hwa?

⁷ Ka ge moya e le motho, ge motho a e-hwa, moya o a hwa. Hesekiele 18:4, (PK) e re: “Moya o senyago o tlo hwa.” Le gona Ditiro 3:23, (PK) e re: “Moya o mongwe le o mongwe [goba motho] o sa kwego moporofeta yoo, o tlo kgaolwa setšhabeng.” Ka gona moya ga se selo seo se phologago lehu la mmele.

8. Moya (spirit) wo o lego bathong ke’ng?

⁸ Moya (spirit) ga o swane le moya (soul). Go batho moya (spirit) ke matla a bophelo ao a ba dirago gore ba kgone go dira mediro ya bophelo. Moya (spirit) o swana le matla a mohlagase. Mohlagase o ka dira gore sefokiša-moya goba setšidifatši di šome, eupša ge e le wona o ka se kgone go fokiša moya goba go dira gore dilo di tonye. Ka tsela e swanago, moya wa rena o dira gore re kgone go bona, go kwa le go nagana. Eupša moya ka bowona o ka se kgone go dira le ge e le sefe sa dilo tše ka ntle le mahlo, ditsebe goba bjoko. Ke ka baka leo Beibele e bolelago ka motho gore: “Môya wa motho o a tloxa, ’me yêna o boêla mmung wa xaxwe; mohla woo ké mo xo fêlaxo maanô a motho.”—Psalme 146:4.

9. Ke’ng seo moya (soul) le moya (spirit) di sa se dirego?

⁹ Ka gona, go ya ka Beibele moya (soul) goba moya (spirit) ga o tlogele mmele lehung bakeng sa go tšwela pele ka bophelo tikologong ya moya.

10. Ke’ng seo Beibele e se bolelago ka boemo bja bahu?

¹⁰ Ka gona, boemo bja bahu ke bofe? Ka ge Jehofa e le yena yo a bopilego batho, o bile o tseba seo se diregago go rena ge re e-hwa. Lentšu la gagwe le ruta gore bahu ga ba phele, ga ba kgone go kwa, go bona, go bolela goba go nagana selo le ge e le sefe. Beibele e re:

• “Xo bahu xa xo se se tsebyaxo.”—Mmoledi 9:5.

• “Leratô la bôná, lehlôyô la bôná, lehufa la bôná, di fedile kxalê.”—Mmoledi 9:6.

• “Kwa bo-dula-bahu mo O yaxo xôna, xa xo na modirô, xa xo na kxopolô, xa xo tsebô le bohlale.”—Mmoledi 9:10.

11. Ka morago ga ge Adama a dirile sebe, Jehofa o ile a re’ng go yena?

¹¹ Nagana ka seo Beibele e se bolelago ka mogologolo wa rena wa pele, Adama. Jehofa o bopile Adama ka “lerole la mmu.” (Genesi 2:7) Ge nkabe Adama a ile a kwa molao wa Jehofa, a ka ba a ile a phela ka mo go sa felego ka lethabo lefaseng. Lega go le bjalo, Adama ga se a ka a kwa molao wa Jehofa gomme kotlo e ile ya ba lehu. Adama o ile a ya kae ge a be a e-hwa? Modimo o itše go yena: “[O tlo] boêla mmung; ka xobane O ntšhitšwe mmung; O lerole; ’me sa xaxo ké xo boêla leroleng.”—Genesi 3:19.

12. Go diregile’ng ka Adama lehung?

¹² Adama o be a le kae pele ga ge Jehofa a ka mmopa ka lerole? O be a se felo. O be a se gona. Ka gona ge Jehofa a be a re Adama o tla “boêla mmung,” O be a bolela gore Adama o be a tla boela boemong bja go se phele go swana le lerole. Adama ga se a ka a tšwela pele a phela lefaseng la moya. Ga se a ka a ‘fetela’ tikologong ya meoya ya bagologolo. Ga se a ka a ya legodimong goba diheleng. O ile a boela boemong bja go se phele; o ile a kgaotša go ba gona.

13. Ke’ng seo se diregago go bobedi batho le diphoofolo lehung?

¹³ Na selo se se swanago se direga ka batho ka kakaretšo? Ee, se a direga. Beibele e hlalosa gore: “[Bobedi batho le diphoofolo] di leba felô xotee; tšohle di tšwa leroleng; ’me tšohle di boêla leroleng.”—Mmoledi 3:19, 20.

14. Ke kholofelo efe yeo e lego gona bakeng sa bao ba hwilego?

¹⁴ Beibele e holofetša gore Modimo o tla  tsošetša bahu bophelong lefaseng la paradeise. (Johane 5:28, 29; Ditiro 24:15) Eupša nako yeo e sa dutše e e-tla. Mo nakong ye, ba sa dutše ba robetše lehung. (Johane 11:11-14) Ga se ra swanela go ba boifa goba go ba rapela ka ge ba ka se kgone go re thuša goba go re gobatša.

15, 16. Sathane o leka bjang go dira gore batho ba dumele gore ge e le gabotse bahu ga se ba hwa?

¹⁵ Kgopolo ya gore ge e le gabotse ga re hwe, ke maaka ao a phatlaladitšwego ke Sathane Diabolo. Bakeng sa go dira gore batho ba kgolwe maaka a, yena le batemona ba gagwe ba leka go dira gore batho ba nagane gore bolwetši le mathata a mangwe di bakwa ke meoya ya bahu. Ke therešo gore mathata a mangwe a bakwa ke batemona ka bobona. Le gona ke therešo gore mathata a mangwe ga a bakwe ke matla ao a phagametšego a tlhago. Lega go le bjalo, ga se therešo gore kotsi e ka re tlela e e-tšwa go bao ba robetšego lehung.

¹⁶ Go sa dutše go e-na le tsela e nngwe gape yeo ka yona batemona ba lekago go dira gore batho ba nagane gore seo Beibele e se bolelago mabapi le lehu ke seo se fošagetšego. Ba fora batho ka go dira gore ba nagane gore ba bone goba ba boletše le bahu. Batemona ba dira se ka dipono, ditoro, dinoge goba ka ditsela tše dingwe. Lega go le bjalo batho ga ba kgokagane le bahu, eupša ba kgokagana le batemona bao ba ikgakantšhago ka go itira batho bao ba hwilego. Ke ka baka leo Jehofa a ahlolago ka matla dinoge le bao ba botšišago bahu.—Doiteronomio 18:10-12; Sakaria 10:2.