1. Mabapi le borapedi, ke kgetho efe yeo batho ba lebeletšanego le yona lehono?

JESU o itše: “E a sa emexo le Nna, ó lwa le Nna.” (Mateo 12:30) Re ka lehlakoreng la Jehofa goba ka lehlakoreng la Sathane. Batho ba bantši ba nagana gore ba hlankela Modimo ka tsela e amogelegago, eupša Beibele e bolela gore Sathane ke “motimetši wa lefase ka moka la batho.” (Kutollo 12:9) Batho ba dimilione ba dumela gore ba rapela Modimo, eupša ge e le gabotse ba hlankela Sathane Diabolo! Batho lehono ba lebeletšane le kgetho: Ba swanetše go hlankela Jehofa, “Modimo wa therešo,” goba Sathane, “rra-xomoaketši.”—Psalme 31:5, NW; Johane 8:44.

2. Ke tsela efe e nngwe yeo Sathane a lekago go thibela batho go rapela Jehofa?

² Go dira phetho ya go hlankela Jehofa ke kgetho e bohlale, kgetho yeo e tlišago go amogelwa ke Modimo. Eupša Sathane ga a thabišwe ke motho le ge e le ofe yo a hlankelago Modimo; o baka mathata bakeng sa bao ba hlankelago Modimo. Tsela e nngwe yeo a dirago se ka yona ke ka go tliša dikwero le kganetšo go tšwa go ba bangwe, gaešita le go tšwa go bagwera le ditho tša lapa. Jesu o lemošitše ka gore: “’Me ba-bô-motho e tlo ba manaba ’axwe.”—Mateo 10:36.

3. Ge e ba lapa la geno goba bagwera ba ganetša go rapela ga gago Modimo, o be o tla dira’ng?

³ Ge e ba seo se direga go wena, o be o tla arabela bjang? Batho ba bantši ba tseba gore tsela ya bona ya borapedi e fošagetše, lega go le bjalo ba diega go itokolla go yona. Ba nagana gore go dira bjalo e tla ba go se botegele malapa a gabo bona. Na seo ke se se kwagalago?  Ge e ba o be o ka lemoga gore ditho tša kgaufsi tša lapa di diriša dihlare-tagi tše kotsi, na o be o ka se di lemoše gore dihlare-tagi di tla di gobatša? O be o ka se di tlatše go dirišeng dihlare-tagi, na o be o tla dira bjalo?

4. Ke’ng seo Jošua a ilego a se botša ba-Isiraele mabapi le borapedi mehleng ya gagwe?

⁴ Jošua o ile a kgothaletša ba-Isiraele go tlogela mekgwa e fošagetšego ya bodumedi le metlwae ya bo-rakgolokhukhu ba bona. O itše: “Byalo-xê, Le boifeng Morêna; mo hlankeleng ka tlalô le ka xo mmôtêxêla. Le ilê medimo ye bô-tata-weno ba bexo ba e hlankêla mola ba sa le mošola wa noka le kua Egipita; Le hlankeleng Morêna.” (Jošua 24:14) Jošua o be a botegela Modimo, gomme Jehofa o ile a mo šegofatša. Ge e ba re botegela Jehofa, le rena o tla re šegofatša.—2 Samuele 22:26.

5. Ke ka baka la’ng re swanetše go lahla dilo tša maleatlana?

⁵ Go itokolla bodumeding bja maaka go bile go bolela gore re swanetše go senya dilo le ge e le dife tša malea tšeo re ka bago re e-na le tšona, tše bjalo ka dipheko, dipalamonwana tša maleatlana le maseka le dilo tša mohuta woo. Se ke sa bohlokwa ka gobane se bontšha gore re bea kholofelo ya rena e tletšego go Jehofa.

6. Ke’ng seo Bakriste ba pele ba ilego ba se dira ka dipuku tša bona tša bonoge?

⁶ Ela hloko seo Bakriste ba bangwe ba pele ba ilego ba se dira ge ba be ba dirile phetho ya go diriša bodumedi bja therešo. Beibele e re: “Ba bantši ba ba bexo ba dirile tša bonoxê kxalê, ba kxobokanya dipuku tša mohuta woo, ba di fiša pepeneneng.”—Ditiro 19:19.

7. Ke’ng seo re ka se dirago ge e ba batemona ba re tlaiša?

⁷ Ba bangwe bao ba thomago go hlankela Jehofa gomme e le bao ba kilego ba akaretšwa ka go lebanya boloing, bonogeng goba mekgweng ya maleatlana, ba ka tlaišwa ke batemona. Ge e ba seo se go diragalela, bitša Jehofa ka go hlaboša ka thapelo o diriša leina la gagwe. O tla go thuša.—Diema 18:10; Jakobo 4:7.

8. Bakriste ba lebelela bjang medimo e šele le diswantšho tšeo di dirišwago borapeding bja maaka?

⁸ Bao ba kganyogago go hlankela Jehofa ga se ba swanela go boloka goba go diriša medimo e šele le ge e le efe goba diswantšho tša bodumedi tšeo e lego karolo ya borapedi bja maaka. Bakriste ba therešo ba “sepela ka tumelo e sego ka pono.” (2 Ba-Korinthe 5:7, NW) Ba hlompha molao wa Modimo wo o iletšago go dirišwa ga diswantšho le ge e le dife borapeding.—Ekisodo 20:4, 5.

9. Ke keletšo efe yeo Beibele e e neago mabapi le go ba ba bohlale?

⁹ Beibele e re: “Yo a sepelago le ba bohlale, o tlo hlalefa.” (Diema 13:20, PK) Ge e ba re nyaka go ba ba bohlale, re swanetše go sepela goba re gwerane le Dihlatse tša Jehofa. Ke batho bao ba sepelago tseleng e išago bophelong.—Mateo 7:14.

10. Dihlatse tša Jehofa di ka go thuša bjang go hlankela Modimo?

¹⁰ Dihlatse ka kgonthe di tshwenyega ka batho. Modiro wa tšona ke go thuša ba dipelo tše di botegago go kwešiša ditherešo tša Beibele tšeo di lebišago bophelong bjo bo sa felego. Di ka go thuša ka go ithuta Beibele le wena ka ntle le tefo. Di tla araba dipotšišo tša gago le go go bontšha kamoo o ka dirišago tsebo ya Beibele ka gona bophelong bja gago.—Johane 17:3.

11. Diboka tša Bokriste di ka go thuša bjang?

¹¹ O tla ithuta ka mo go oketšegilego ka ditsela tša Jehofa dibokeng tša tšona tšeo gantši di swarelwago Holong ya Mmušo. O tla matlafatšwa kganyogong ya gago ya go kganyoga go diriša bodumedi bja therešo. Le gona o tla amogela tlwaetšo ya kamoo o ka thušago ba bangwe go ithuta ditherešo tša Beibele.—Ba-Hebere 10:24, 25.

12. Thapelo e ka go thuša bjang go hlankela Modimo?

¹² Ge o dutše o ithuta mo go oketšegilego ka thato ya Jehofa le morero wa gagwe, go bonala o tla godiša tebogo ya gago ya go leboga ditsela tša gagwe tše lerato. Le gona o swanetše gore o godiše kganyogong ya gago ya go dira seo  se mo kgahlišago le go phema seo se sa mo kgahlišego. Gopola gore o ka batamela Jehofa ka thapelo bakeng sa go mo kgopela gore a go thuše go dira se se lokilego le go phema se se fošagetšego.—1 Ba-Korinthe 6:9, 10; Ba-Filipi 4:6.

13. O ka thabiša bjang pelo ya Jehofa?

¹³ Ge nako e dutše e e-ya, o dutše o gola moyeng, ka ntle le pelaelo o tla bona go nyakega ga go ba Hlatse ya Jehofa yeo e ineetšego le go kolobetšwa. Ka go tlatša lekoko la batho ba Jehofa, o tla thabiša pelo ya Jehofa. (Diema 27:11) O tla ba gare ga batho bao ba thabilego bao Modimo a bolelago ka bona gore: “Ké tlo axa makxatheng a lena, ’me lena Le tlo ba sethšaba sa-ka.”—2 Ba-Korinthe 6:16.