Ka Labobedi la di-11 tša April, Bakriste ba bantši bao ba fodilego moyeng ba tlo tla Segopotšong. Ba fokoditše lebelo la go ya bophelong bjo bo sa felego ka mabaka a itšego, ao a mangwe a ona a hlaloswago ka poroutšheng ya Boela go Jehofa. (Heb 12:1) Lega go le bjalo, bao ba fodilego ba bohlokwa kudu go Jehofa. O ba rekile ka madi a morwa wa gagwe. (Dit 20:28; 1Pe 1:18, 19) Re ka ba thuša bjang gore ba boele ka phuthegong?

Bagolo ba phuthego ba leka ka matla go hwetša Bakriste bao ba fodilego le go ba thuša, go etša ge modiši a dira sohle seo a ka se kgonago go tsoma dinku tšeo di arogilego mohlapeng. (Lu 15:4-7) Se se bontšha gore Jehofa o rata dinku tša gagwe. (Jer 23:3, 4) Ga se bagolo feela bao ba ka kgothatšago batho ba bjalo, eupša ka moka ga rena re ka kgona. Jehofa o thabišwa ke ge re dira maiteko a go bontšha batho botho le lerato, le gona seo se tliša ditšhegofatšo. (Die 19:17; Dit 20:35) Ka go re’alo, nagana ka batho bao o ka ba kgothatšago gomme o thome lehono go ba kgothatša!

BOGELANG BIDIO YEO E REGO KGOTHATŠANG BAO BA FODILEGO MOYENG KE MOKA LE ARABENG DIPOTŠIŠO TŠE DI LATELAGO:

• Abbey o ile a gata megato efe ka morago ga gore a kopane le Hlatse yeo a sa e tsebego?

• Ke ka baka la’ng re swanetše go botša bagolo ge re nagana ka go thuša motho yo a fodilego moyeng?

• Abbey o ile a dira’ng ge a be a itokišeletša go etela Laura ka lekga la bobedi?

• Abbey o ile a bontšha bjang go phegelela, go se fele pelo le lerato ge a be a leka go kgothatša Laura?

• Re ka ithuta’ng papišong ya Jesu yeo e lego go Luka 15:8-10?

• Go bile le ditšhegofatšo dife ka ge yo mongwe le yo mongwe a ile a tsenya letsogo tabeng ya go thuša Laura?