Paulo le Silase ba ile ba tumiša Modimo ka go opela ge ba be ba le kgolegong. (Dit 16:25) Mehleng ye ya rena, badumedigotee le rena ba ile ba opela dikopelo tša Mmušo ge ba be ba le kampeng ya tshwenyo ya Sachsenhausen kua Nazi Jeremane le ge ba be ba rometšwe Siberia. Mehlala ye e bontšha kamoo dikopelo di nago le matla a go thuša Bakriste bao ba lebeletšanego le diteko. Di ba nea sebete.

Kgauswinyane maleme a mangwe a oketšegilego a tla hwetša kopelo e mpsha yeo e rego “Sing Out Joyfully” to Jehovah (‘Opelela Jehofa ka go Hlaboša o Thabile’). Ge re šetše re hweditše kopelo ye, re ka swara mantšu a yona ka hlogo ka go itlwaetša dikopelo tše nakong ya borapedi bja lapa. (Ef 5:19) Ke moka moya o mokgethwa o tla re thuša go di gopola ge diteko di tšwelela. Dikopelo tša Mmušo di ka re thuša go dula re naganne ka kholofelo ya rena. Di ka re kgothatša ge re lebeletšane le diteko. Le gona ge re thabile, mantšu a tšona a kgothatšago a dira gore re ‘opele re thabile’ ka ge dipelo tša rena le tšona di tla ba di thabile. (1Kr 15:16; Ps 33:1-3) Anke re direng sohle seo re ka se kgonago go diriša ka botlalo dikopelo tša rena tša Mmušo!

BOGELANG BIDIO YEO E REGO KOPELO YEO E ILEGO YA NEA BAŠOMI MATLA. KA MORAGO GA MOO LE ARABENG DIPOTŠIŠO TŠE DI LATELAGO:

• Ke maemo afe ao a dirilego gore Ngwanabo rena Frost a hlame kopelo e itšego?

• Kopelo yeo e ile ya kgothatša bjang bana babo rena kampeng ya tshwenyo ya Sachsenhausen?

• Ke maemong afe a letšatši le letšatši ao go ona dikopelo tša Mmušo di ka go matlafatšago?

• Ke dikopelo dife tša Mmušo tšeo o ka ratago go di tseba ka hlogo?