Ke bomang bao re swanetšego go ba amogela ka lerato? Batho ka moka bao ba tlago dibokeng tša rena tša Bokriste, e ka ba e le bao ba tlilego la mathomo goba bao ba phelago ba etla. (Rom 15:7; Heb 13:2) E ka ba e le Mokristegotee le rena yo a tšwago nageng e nngwe goba Mokriste yo a fodilego moyeng yo a tšerego nako e telele a sa tle. Ipotšiše gore o be o tla ikwa bjang ge o be o le boemong bjoo. Na o be o ka se thabele go dumedišwa ka lerato? (Mat 7:12) Bjale go re’ng o sa dire maiteko a magolo a gore o sepelasepele ka Holong ya Mmušo pele diboka di thoma le ge di fedile gore o dumediše bao ba tlilego dibokeng? Se se dira gore dibokeng go foke moya wa lerato le lethabo le gore Jehofa a tumišwe. (Mat 5:16) Ke therešo gore o ka no se kgone go bolela le motho yo mongwe le yo mongwe yo a tlilego dibokeng. Eupša ge re dira sohle seo re ka se kgonago go amogela batho ka moka bao ba tlilego dibokeng, seo se tla dira gore ba ikwe ba le gae ga mahlaku. *

Ga se ra swanela go amogela baeng feela ka matšatši a bohlokwa a bjalo ka letšatši la Segopotšo eupša re swanetše go ba amogela ka dinako tšohle. Ge baeng ba bona gore re ratana go tšwa pelong, seo se ka dira gore ba tumiše Modimo gomme ba kopanele le rena borapeding bjo bo sekilego.—Joh 13:35.