3:1-5

Ke ka baka la’ng Jesu a be a kwešitšwe bohloko kudu ke boitshwaro bja baetapele ba bodumedi ba Bajuda? Ka gobane ba ile ba dira gore go be thata go boloka Sabatha ka go itsenyetša melawana e mengwe e mentši yeo e sego bohlokwa. Ka mohlala, motho o be a se a dumelelwa go bolaya letsetse ka Sabatha. Motho o be a dumeletšwe go fodišwa ge feela bophelo bja gagwe bo be bo le kotsing. Se se ra gore motho yo a robegilego lerapo goba yo a thinyegilego o be a ka se alafiwe ka Sabatha. Go molaleng gore baetapele ba bodumedi ba be ba se na taba le monna wa seatla se se omeletšego.