Go thoma ngwageng wo, re tlo ba le nako e ntši ya go itokišeletša Segopotšo sa lehu la Kriste. Ge Segopotšo se ka ba gare ga beke, diboka tša gare ga beke di ka se be gona bekeng yeo. Ge Segopotšo se ka ba mafelobekeng, polelo ya phatlalatša le Thuto ya Morokami di ka se be gona mafelobekeng ao. Na o tla diriša gabotse nako yeo o sa yego dibokeng ka yona? Go no swana le ge Bakriste ba lekgolong la pele la ngwaga ba be ba dira dilo tše itšego go itokišeletša segopotšo, le rena re swanetše go itokišeletša segopotšo. (Lu 22:7-13; km 3/15 1) Eupša e le gore segopotšo se tle se re hole, re swanetše go lokiša dipelo tša rena. Re ka dira seo bjang?

• Naganišiša ka bohlokwa bja go ba gona segopotšong.—1Ko 11:23-26

• Rapela gomme o naganišiše ka tswalano ya gago le Jehofa.—1Ko 11:27-29; 2Ko 13:5

• Bala dikgatišo goba dihlogo tšeo di bolelago ka segopotšo gomme o naganišiše ka tšona.—Joh 3:16; 15:13

Bagoeledi ba bangwe ba bala mmalo wa Beibele wa Segopotšo ka pukwaneng ya Go Hlahloba Mangwalo ka Mehla gomme ba naganišiša ka wona. Bagoeledi ba bangwe ba bala ditemana tša Beibele tše di lego tšhateng yeo e lego ka mo tlase gomme ba bangwe ba bala dihlogo tšeo di lego ka gare ga Morokami tšeo di bolelago ka Segopotšo le lerato leo Jehofa le Jesu ba re bontšhitšego lona. Go sa šetšwe gore o ithuta ka segopotšo o diriša eng, eka seo o kgethago go se diriša se ka go thuša gore o be le tswalano e botse le Jehofa le Morwa wa gagwe!