Jakobo o be a tseba gore re swanetše go ineela go Jehofa ka mo go feletšego, le ge Jehofa a be a se a hlwa a bea molao wa gore batho ba se ke ba rapela medimo e šele. (Ek 20:3-5) Ka morago ga gore Jakobo a boele Bethele, o ile a laela batho ka moka bao a bego a na le bona gore ba lahle medingwana ya bona. Ke moka, a lahla medingwana yeo, go akaretša le mangina ao batho ba bego ba a apara bakeng sa go itšhireletša le gore ba be le mahlatse. (Ge 35:1-4) Ga go pelaelo gore Jehofa o ile a thabišwa ke se Jakobo a ilego a se dira.

Lehono, re ka bontšha bjang gore re ineetše go Jehofa ka mo go feletšego? Re bontšha seo ka gore re pheme dilo le ge le dife tša go sepedišana le medingwana goba meoya e mebe. Seo se ra gore re swanetše go lahla selo le ge e le sefe sa go sepedišana le botemona le gore re hlokomele gore re ithabiša ka eng. Ka mohlala, ipotšiše gore: ‘Na ke kgahlwa ke go bala dipuku goba go lebelela dimubi tšeo di nago le di-vampire, di-zombie goba boloi? Na dilo tšeo ke ithabišago ka tšona di dira gore dilo tša go swana le magic le go foša ba bangwe ka meleko di bonagale eka e no ba go ithabiša feela?’ Re swanetše go ralokela kgole le dilo tšeo Jehofa a di hloilego.—Ps 97:10.

BOGELANG BIDIO YEO E REGO “LE GANETŠE DIABOLO,” KE MOKA LE ARABENG DIPOTŠIŠO TŠE DI LATELAGO:

• Palesa yo a bego a ithuta Beibele o be a na le bothata bofe?

• Ke ka baka la’ng go le bohlokwa gore o kgopele thušo go bagolo ge e ba wena goba motho yo o mo tsebago a tshwenywa ke matemona?

• Ke dilo dife tšeo re swanetšego go di lahla ge e ba re nyaka Jehofa a re šireletša?

• Palesa o ile a dira phetho efe ka pelapela?

• Mo o dulago gona ke dilo dife tša go sepedišana le matemona tšeo o ka di phemago?