KE KA BAKA LA ENG SEO SE LE BOHLOKWA? Barutwana ba Beibele ba swanetše go ineela go Jehofa gomme ba kolobetšwe e le gore a ba amogele. (1Pe 3:21) Ke moka bao ba phelago ka go dumelelana le boineelo bja bona, tswalano ya bona le Modimo e a šireletšwa. (Ps 91:1, 2) Mokriste o ineela go Jehofa—e sego go motho, mošomo goba mokgatlo. Ka baka leo, barutwana ba swanetše go rata Modimo le go mo leboga.—Rom 14:7, 8.

KAMOO O KA THUŠAGO MORUTWANA:

• Ge le dutše le ithuta, hlalosa seo le ithutago sona ka Jehofa. Gatelela gore go bohlokwa go bala Beibele letšatši le letšatši le go rapela Jehofa “ka mehla.”—1Th 5:17; Jak 4:8

• Kgothaletša morutwana go ipeela pakane ya go ineela go Jehofa le go kolobetšwa. Le gona, mo thuše go fihlelela dipakane tšeo di tlago go mo thuša go fihlelela pakane ya gore a kolobetšwe, tše bjalo ka go araba dibokeng goba go bolela ditaba tše dibotse go baagišani le bao a šomago le bona. Gopola gore Jehofa ga a gapeletše motho go mo hlankela. Motho o swanetše go itirela phetho ya go ineela go Jehofa.—Doi 30:19, 20

• Kgothaletša morutwana wa gago go dira diphetogo e le gore a kgahliše Jehofa gomme a swanelege go kolobetšwa. (Die 27:11) Ka ge mekgwa e itšego e ka ba e tsemile medu, go ka nyakega gore o tšwele pele o thuša morutwana wa Beibele go lahla semelo sa kgale gomme a apare se sefsa. (Ef 4:22-24) Mmotše gore a bale dihlogo tša Morokami tše di rego, “Beibele e Fetoša Maphelo”

• Mmotše ka lethabo leo o bilego le lona ge o dutše o hlankela Jehofa.—Jes 48:17, 18