Ke ka baka la’ng re swanetše go gwerana le batho bao ba ratago Jehofa? Ka gobane ba tla re hlohleletša go dira dilo tše dibotse, eupša ge re ka gwerana le bao ba sa ratego Jehofa ba ka re hlohleletša go dira dilo tše mpe. (Die 13:20) Ka mohlala, ge Kgoši Jehoashe a be a gwerane le Moperisita yo Mogolo Jehoada, o ile a dira dilo “tše di lokilego mahlong a Jehofa.” (2Kr 24:2) Eupša ka morago ga gore Moperisita yo a hlokofale, Jehoashe o ile a tlogela go hlankela Jehofa ka gobane a gwerane le batho ba babe.—2Kr 24:17-19.

Mehleng ya baapostola, Paulo o ile a swantšha phuthego ya Bokriste le ‘ntlo e kgolo,’ ke moka a swantšha ditho tša phuthego le “dibjana,” goba thoto ya ka ntlong. Ge re ka tlogela go gwerana le motho le ge e le ofe yoo a dirago dilo tšeo di šišimišago Jehofa, go sa šetšwe gore ke wa leloko goba ke setho sa phuthego, re tla dula re le “sebjana sa morero o hlomphegago.” (2Ti 2:20, 21) Eka re ka tšwela pele re gwerana le batho bao ba ratago Jehofa e le gore ba re hlohleletše go mo hlankela.

BOGELANG BIDIO YEO E REGO,ITHUTE GO GANA DITLWAELANO TŠE MPE, KE MOKA LE ARABENG DIPOTŠITŠO TŠE DI LATELAGO:

• Re ka gwerana bjang le batho bao ba sa ratego Jehofa re sa lemoge?

• Ke’ng seo se thušitšego Bakriste ba bararo bao ba lego mo bidiong ye gore ba se sa gwerana le batho bao ba sa hlankelego Jehofa?

• Ke Mangwalo afe a ka Beibeleng ao a ka go thušago go kgetha bagwera ka bohlale?