KE KA BAKA LA ENG GO LE BOHLOKWA? Lebaka ke gore Jehofa o godiša peu ya therešo ka dipelong tša bao ba nago le “tshekamelo e swanetšego ka bophelo bjo bo sa felego.” (Dit 13:48; 1Ko 3:7) Re šomišana le yena ka go tshwenyega kudu ka batho bao ba lekago go phela ka go dumelelana le seo re ba rutago sona. (1Ko 3:7) Barutwana ba Beibele ba swanetše go kwešiša gore e le gore ba tle ba phologe, ba swanetše go kolobetšwa gore e be Dihlatse tša Jehofa. (1Pe 3:21) Re ba thuša gore e tle e be barutiwa ka go ba bontšha gore ba swanetše go dira diphetogo maphelong a bona. Le gona re ba thuša gore ba botše ba bangwe ditaba tše dibotse, ba ba rute tšona gomme ba ineele go Jehofa.​—Mat 28:19, 20.

RE KA DIRA SEO BJANG?

• Gopotša barutwana ba gago ba Beibele gore morero wa gore o ithute le bona Beibele ke go ba thuša “gore ba tsebe” Jehofa le go dira dilo tšeo di mo kgahlago.​—Joh 17:3

• Ba thuše go dira tšwelopele moyeng ka gore ba fenye dilo tšeo di ka ba šitišago, tša go swana le mekgwa e mebe le go gwerana le batho bao ba itshwarago ka tsela e belaetšago

• Ba matlafatše le go ba kgothatša pele ba ka kolobetšwa le ka morago ga ge ba kolobeditšwe.​—Dit 14:22

BOGELANG BIDIO YEO E REGO, JEHOFA MODIMO O TLA GO THUŠA, KE MOKA LE ARABENG DIPOTŠIŠO TŠE DI LATELAGO:

• Ke dilo dife tšeo di ka dirago gore batho ba bangwe ba dikadike go ineela go Jehofa le go kolobetšwa?

• Bagolo ba ka thuša bjang barutwana ba Beibele gore ba dire tšwelopele moyeng?

• Jesaya 41:10 e re ruta’ng ka Jehofa?

• Ke dika dife tšeo di ka re thušago go hlankela Jehofa ka tsela yeo a e amogelago le ge re sa phethagala?