Ge Jesu a be a le mo lefaseng, o ile a gatelela bohlokwa bja taelo yeo e rego: “Godiša tatago le mmago.” (Ek 20:12; Mat 15:4) Jesu o ile a kgona go bolela ka bolokologi ka taba ye ka gobane o ile a dula a “ikokobeleditše” batswadi ba gagwe ge e be e le mofsa. (Lu 2:51) Ge a godile, o ile a kgonthišetša gore go tla ba le motho yo a tla šalago a hlokometše mmagwe ge yena a hwile.—Joh 19:26, 27.

Le lehono, bafsa ba Bakriste bao ba kwago batswadi ba bona le go bolela le bona ka tlhompho ba a ba godiša. Ge e le gabotse, ga se ra beelwa mengwaga e itšego gore re hlomphe batswadi ba rena. Le ge batswadi ba rena ba tšofetše, re swanetše go tšwela pele re ba hlompha ka go diriša bohlale bja bona. (Die 23:22) Le gona re hlompha batswadi ba rena bao ba tšofetšego ka go ba hlokomela maikwelong le ka dilo tše dingwe tšeo ba di hlokago. (1Ti 5:8) Go sa šetšwe gore re sa le ba banyenyane goba re šetše re godile, go dula re boledišana le batswadi ba rena ke tsela e botse ya go ba hlompha.

BOGELANG BIDIO YA GO HLALOSA TABA KA GO THALA DISWANTŠHO YEO E REGO, NKA BOLEDIŠANA BJANG LE BATSWADI BA KA? KE MOKA LE ARABENG DIPOTŠIŠO TŠE DI LATELAGO:

• Ke ka baka la’ng o ka thatafalelwa ke go boledišana le batswadi ba gago?

• O ka bontšha bjang gore o hlompha batswadi ba gago ge o boledišana le bona?

• Ke ka baka la’ng o swanetše go dira sohle se o ka se kgonago gore o boledišane le batswadi ba gago? (Die 15:22)