Beibele e boletše e sa le pele gore Sathane o tla re tlaiša e le ge a leka go thibela modiro wa rena wa go bolela ditaba tše dibotse. (Joh 15:20; Kut 12:17) Re ka thuša bjang Bakristegotee le rena bao ba tlaišwago dinageng tše dingwe? Re ka ba rapelela. “Topo ya moloki e na le matla e bile e a šoma.”—Jak 5:16.

Re ka rapelela eng? Re ka kgopela Jehofa gore a nee bana babo rena le dikgaetšedi sebete le go ba thuša gore ba se boife. (Jes 41:10-13) Le gona re ka rapelela gore balaodi ba mmušo ba se ke ba thibela modiro wa go bolela ditaba tše dibotse, “e le gore re tšwele pele re phela bophelo bja khutšo le boiketlo.”—1Ti 2:1, 2

Ge Paulo le Petro ba be ba tlaišwa, Bakriste ba lekgolong la pele la nywaga ba ile ba ba rapelela ka maina. (Dit 12:5; Rom 15:30, 31) Le ge re sa tsebe maina ka moka a bao ba tlaišwago lehono, re ka ba rapelela ka go bolela diphuthego, dinaga goba ditikologo tša gabo bona.