Ipone o be o dula Galilea mehleng ya Jesu. O tšere leeto la go ya Monyanyeng wa Mešaša Jerusalema. Ge o fihla, o hwetša motse wa Jerusalema o tletše ka badumedigotee le wena go tšwa kgole le kgauswi. O nyaka go yo neela Jehofa sehlabelo. O tšama o swere pudi, o feta lešaba la batho leo le tletšego diterata tša motse woo o lebile tempeleng. Ge o fihla tempeleng, o hwetša go tletše batho ba bangwe bao le bona ba tlišitšego dihlabelo. Mafelelong, nako ya gore o nee baperisita pudi ya gago ya fihla. Ka yona nako yeo wa gopola gore ngwaneno yoo a ka bago a le lešabeng leo goba mo motseng, o na le se sengwe ka wena. Jesu o hlalositše seo o bego o swanetše go se dira. (Bala Mateo 5:24.) Go etša ge Jesu a boletše, wena le ngwaneno yoo le be le ka dira bjang khutšo? Mapokisaneng a a mabedi a lego ka mo tlase, kgetha karabo ya nnete go le lengwe le le lengwe.

O SWANETŠE . . . 

• go boledišana le ngwaneno ge feela o nagana gore seo se mo kgopišitšego se a kwagala

• go leka go phošolla ngwaneno ge e ba o nagana gore o kgopišwa ke dilo tše dinyenyane goba le yena o na le molato

• go se fele pelo ge ngwaneno a bolela seo se mo tshwenyago, gaešita le ge o sa kwešiše gabotse seo a go botšago sona. Mo kgopele tshwarelo ka ge o mo kgopišitše o sa ikemišetša

NGWANENO O SWANETŠE . . . 

• go botša batho ba ka phuthegong kamoo o mo kgopišitšego ka gona

• go bolela le wena a galefile, a go botše dilo tšeo di mo kgopišitšego gomme a go gapeletše gore o dumele gore o na le phošo

• go tseba gore o ile wa swanelwa ke go ba le boikokobetšo le gore go be go se bonolo gore o ye go yena gomme a go lebalele ka bolokologi

Le ge lehono re sa išetše Jehofa dihlabelo tša diphoofolo, Jesu o be a re ruta gore go dira khutšo le bana babo rena go sepedišana bjang le go hlankela Modimo ka tsela yeo a e amogelago?