Ge e ba o le mofsa yo a sa kolobetšwago goba o ithuta Beibele, na o ikemišeditše gore mafelelong o tle o kolobetšwe? Ke ka baka la’ng o swanetše go kolobetšwa? Ge o ineela le go kolobetšwa o thoma segwera se sebotse le Jehofa. (Ps 91:1) Le gona go dira dilo tšeo go tla go thuša gore o tle o phologe. (1Pe 3:21) O ka dira’ng gore o ineele go Modimo le go kolobetšwa?

Inyakele bohlatse bjo bo bontšhago gore seo o se dumelago ke therešo. Dira nyakišišo gore o kgone go hwetša dikarabo tša dipotšišo tšeo o ipotšišago tšona. (Rom 12:2) Bona ge e ba go na le diphetogo tšeo o swanetšego go di dira. Dira diphetogo tšeo ka ge o nyaka go kgahliša Jehofa. (Die 27:11; Ef 4:23, 24) Ka mehla rapela Modimo gore a go thuše. Kgodišega gore Jehofa o tla go matlafatša le go go thekga ka moya wa gagwe o mokgethwa. (1Pe 5:10, 11) Maiteko ao o a dirago ga se a lefeela. Go hlankela Jehofa ke tsela ya bophelo yeo e di phalago ka moka!—Ps 16:11.

BOGELANG BIDIO YA KE KA BAKA LA ENG RE KOLOBETŠWA? KE MOKA LE ARABE DIPOTŠIŠO TŠE DI LATELAGO:

• Ba bangwe ba ile ba fenya mapheko afe gore ba feleletše ba kolobeditšwe?

• O ka dira’ng gore o be le tumelo yeo mafelelong e tlago go go thuša gore o ineele go Jehofa?

• Ba bangwe ba ile ba thušwa ke’ng go dira dilo tšeo di nyakegago gore ba tle ba swanelege go kolobetšwa?

• Jehofa o šegofatša bjang bao ba kgethago go mo hlankela?

• Go ineela le go kolobetšwa go ra go re’ng?