Jehofa o tšeela godimo kudu dikeno tšeo batho ba di dirago ge ba nyalana. O boletše gore monna le mosadi ba swanetše go kgomarelana. (Mat 19:5, 6) Go na le banyalani ba bantši ka phuthegong bao ba beago mohlala o mobotse. Eupša ga go na lenyalo leo le phethagetšego. Mathata a no fela a eba gona. Banyalani ga se ba swanela go nagana gore go arogana le go hlalana go tla ba rarollela mathata, ka ge yeo e le tsela yeo batho ba lefase ba naganago ka yona. Banyalani ba Bakriste ba ka dira’ng go šireletša lenyalo la bona?

Nagana ka dilo tše tše hlano tša bohlokwa.

1. Šireletša pelo ya gago ka gore o se ke wa bapala ka lerato le batho ba bangwe goba wa ithabiša ka dilo tše di gobogilego ka gobane dilo tšeo di senya lenyalo.—Mat 5:28; 2Pe 2:14.

2. Matlafatša segwera sa gago le Modimo gomme o nyake go mo kgahliša lenyalong la gago.—Ps 97:10.

3. Tšwela pele o apara semelo se sefsa e bile o direle molekane wa gago dilonyana tšeo di tla dirago gore bophelo bo be bonolo go yena.—Kol 3:8-10, 12-14.

4. Dula o boledišana le molekane wa gago ka tlhompho le ka dilo tša bohlokwa bophelong.—Kol 4:6.

5. Nea molekane wa gago tshwanelo ya lenyalo ka lerato.—1Ko 7:3, 4; 10:24.

Ge Bakriste ba hlompha lenyalo, ba hlompha le Mohlami wa lenyalo e lego Jehofa.

BOGELANG BIDIO YEO E REGO RE SWANETŠE GO ‘KITIMA KA KGOTLELELO’—LATELA MELA YA PHADIŠANO, KE MOKA LE ARABENG DIPOTŠIŠO TŠE DI LATELAGO:

• Le ge lenyalo le ka thoma gabotse, ke mathata afe ao a ka tšwelelago?

• Melao ya motheo ya Beibele e ka thuša bjang bao ba naganago gore lerato le fedile lenyalong la bona?

• Jehofa o beile melao efe ya lenyalo?

• Banyalani ba swanetše go dira’ng gore lenyalo la bona le atlege?