Ke ka baka la’ng re thabela go ya dikopanong tša selete tša ngwaga le ngwaga? Go no swana le Baisiraele ba nakong e fetilego, le rena lehono dikopano di re nea sebaka sa go hlankela Jehofa re na le bana babo rena ba bantšintši. Re thabela dilo ka moka tšeo re di kwago kopanong tšeo di re thušago go dula re na le segwera se sebotse le Jehofa. Ge re le moo, re thabela le go fetša nako re na le bagwera le ba gabo rena. Re dira sohle seo re ka se kgonago gore re be gona matšatši ka moka a mararo a kopano.

Ge re le kopanong ga se ra swanela go nagana feela ka seo se ka holago rena, eupša re swanetše go nagana le kamoo re ka bontšhago ba bangwe lerato. (Ga 6:10; Heb 10:24, 25) Re bontšha gore re naganela ba bangwe ge re bulela ngwanabo rena goba kgaetšedi lebati, le ge re bea feela madulo ao a re lekanego. (Fil 2:3, 4) Dikopano di re nea sebaka se sebotse sa go hwetša bagwera. Pele lenaneo le ka thoma goba ka morago ga lenaneo gotee le nakong ya go khutša, re ka ipeela pakane ya gore re boledišane le motho yo re sa mo tsebego. (2Ko 6:13) Re ka hwetša batho bao re ka gweranago le bona bophelo ka moka! Le gona ge batho ba bangwe ba bona ka tsela yeo re ratanago ka yona, le bona ba ka nyaka go hlankela Jehofa.—Joh 13:35.

BOGELANG BIDIO YEO E REGO DIKOPANO TŠA DITŠHABATŠHABA TŠA “LERATO LE KA MOHLA GA LE FELE”! KE MOKA LE ARABENG DIPOTŠIŠO TŠE DI LATELAGO:

• Baeng bao ba tšwago dinageng tše dingwe bao ba bego ba le dikopanong tša ditšhabatšhaba tša 2019 ba ile ba bontšhwa bjang lerato?

• Ke ka baka la’ng go makatša go bona ka tsela yeo batho ba Jehofa ba nago le botee le lerato?

• Bana babo rena ba Sehlopha se Bušago ba boletše ka dintlha dife tša mabapi le lerato la Bokriste?

• Lerato le thušitše bjang bana babo rena ba Jeremane le Korea Borwa go ba le botee?

• Re swanetše go ikemišetša go dira’ng?