Re phela lefaseng leo le lekago go re dira gore re nagane gore botse ke bobe gomme bobe ke botse. (Jes 5:20) Seo se nyamišago ke gore batho ba bangwe ba dira dilo tšeo Jehofa a di hloilego tša go swana le go ratana ga batho ba bong bjo bo swanago. Bana ba sekolo le batho ba bangwe ba ka leka go dira gore bana ba rena ba itshware go swana le bona. O ka thuša bjang bana ba gago gore ba tle ba kgone go lebeletšana le teko yeo le tše dingwe tša go swana le yona?

Ruta bana ba gago melao ya Jehofa. (Le 18:3) Ganyenyane-ganyenyane ruta bana ba gago seo Beibele e se bolelago ka thobalano. Ba rute go ya ka mengwaga ya bona le ka tsela yeo ba tlago go kwešiša. (Doi 6:7) Ipotšiše gore: ‘Na ke rutile bana ba ka tsela ya maleba ya go bontšha ba bangwe gore ba a ba rata? Na ke ba rutile bohlokwa bja go apara ka tsela e hlomphegago? Na ke ba rutile gore ba se ke ba dumela ge batho ba bangwe ba ba swaraswara ka tsela yeo e sego ya maleba? Na bana ba ka ba tla tseba gore ba dire’ng ge e ba motho yo mongwe a leka go ba bontšha diswantšho tša batho ba sa aparago goba a ba kgopela go dira seo Jehofa a rego se fošagetše?’ Go ba ruta go ka ba thuša gore ba se ke ba tsena mathateng. (Die 27:12; Mmo 7:12) Ge o ruta bana ba gago, o bontšha gore o rata mpho e bohlokwa yeo Jehofa a go neilego yona.—Ps 127:3.

BOGELANG BIDIO YEO E REGO AGA NTLO YEO E TLAGO GO KGOTLELELA—ŠIRELETŠA BANA BA GAGO ‘BOBENG,’ KE MOKA LE ARABENG DIPOTŠIŠO TŠE DI LATELAGO:

• Ke ka baka la’ng go se bonolo gore batswadi ba bangwe ba rute bana ba bona ka thobalano?

• Ke ka baka la’ng batswadi ba swanetše go godiša bana ba bona “ka tayo le temošo ya Jehofa”?—Ef 6:4.

• Ke dilo dife tšeo mokgatlo wa Jehofa o di tšweleditšego go thuša batswadi go ruta bana ba bona ka thobalano?—w19.05 12, lepokisi

• Ke ka baka la’ng o swanetše go boledišana le bana ba gago ka mehla pele ba ka ba le mathata?