BOPHELO BJA BOKRISTE
Itokišetše Boemo bja Tšhoganetšo bja tša Kalafo
Ke ka baka la eng o swanetše go itokiša? Boemo bja tšhoganetšo bja tša kalafo bo ka tšwelela go sa letelwa. Ka gona, dula o itokišitše e le gore ge seo se ka direga o tle o kgone go hwetša thušo e kaone ya tša kalafo. Ka go dira bjalo o tla ba o bontšha gore o hlompha bophelo le molao wa Jehofa wa go bolela ka madi.—Dit 15:28, 29.
O ka dira eng gore o itokiše?
-
Rapela pele o tlatša karata ya gago ya madi. a Bagoeledi bao ba kolobeditšwego ba ka kgopela ngwanabo rena yo a šomago ka dikgatišo tša phuthego Karata ya Madi (DPA) le Identity Card (ic) e lego karata ya madi ya bana ba bona ba banyenyane
-
Ge e ba o le moimana, kgopela bagolo fomo ya Boitsebišo Bakeng sa Baimana (S-401). Fomo ye e tlo go thuša go dira diphetho tše dibotse mabapi le mathata a tša kalafo ao a ka bago gona ge o sa imile le ge o belega
-
Botša bagolo e sa le pele ge e ba go ka hlokega gore o dire ophareišene yeo dingaka di ka nyakago go diriša madi, goba ge e ba o swanetše go robala sepetlele. O be o botše le sepetlele gore o tlo etelwa ke mohlanka wa Dihlatse tša Jehofa
Bagolo ba ka thuša bjang? Ba ka go thuša go tlatša karata ya gago ya madi. Lega go le bjalo, bagolo ba ka se go direle diphetho goba go hlalosa dipono tša bona ka ditaba tšeo di nyakago phetho ya motho ka noši. (Rom 14:12; Gal 6:5) Ge go ka tšwelela boemo bjo bo ka nyakago gore o tšhelwe madi, botša bagolo ba phuthego ya geno ke moka kapelapela ba tla boledišana le Komiti ya go Hloma Kwano le Sepetlele (HLC).
Komiti ya go Hloma Kwano le Sepetlele e ka thuša bjang? Bana babo rena bao ba hlankelago komiting ye, ba rutilwe gore ba ka thuša bjang ba tša maphelo le tša molao gore ba kwešiše pono ya rena ka madi. Ba ka boledišana le ngaka ya gago ka ditsela tše dingwe tša go go alafa ntle le go go tšhela madi. Ge e ba go hlokega, ba ka go thuša go hwetša ngaka yeo e ka go alafago ntle le go go tšhela madi.
BOGELANG BIDIO YA O KA DIRA DIPHETHO TŠE DIBOTSE BJANG GE O KGETHA KALAFO YEO E SEPEDIŠANAGO LE MADI? KE MOKA LE ARABENG DIPOTŠIŠO TŠE:
-
Ke’ng seo o ithutilego sona mo bidiong ye seo se ka go thušago go itokišeletša maemo a tšhoganetšo a tša kalafo ao a ka akaretšago tšhelo ya madi?
a Thuto 39 ka pukung ya O ka Thabela Bophelo go ya go Ile! e ka go thuša go dira diphetho tše dibotse tabeng ya mehuta ya kalafo yeo e ka akaretšago go dirišwa ga madi.
