Go kwela motho bohloko ke go kgona go kwešiša kamoo a naganago ka gona, kamoo a ikwago ka gona, tsela yeo a phelago ka yona le dilo tšeo a di hlokago. Batho ba kgona go bona ge e ba re ba kwela bohloko. Le gona re tlo ba bontšha kwelobohloko ge e ba re tloga re nyaka go ba thuša. Ge re bontšha batho kwelobohloko ge re le tšhemong, re tla ba re ekiša tsela yeo Jehofa a re ratago ka yona le go re hlokomela gomme seo se tla dira gore batho ba nyake go ithuta ka yena.—Fil 2:4.

Go bontšha kwelobohloko ga e no ba mokgwa wo re o dirišago ge re ruta batho Beibele. Re bontšha kwelobohloko ka go theetša gabotse le ka go ba le botho. Le gona re bontšha kwelobohloko ka tsela yeo re bolelago le batho ka yona, tsela yeo re ba swarago ka yona, tsela yeo re dirišago matsogo ge re bolela le tsela yeo re bonagalago ka yona sefahlegong. Le gona re bontšha batho gore re tloga re na le taba le bona ka go tseba maemo a bona, dilo tšeo ba di ratago le tšeo ba di dumelago. Re swanetše go ba botša se sengwe le se sengwe seo se ka ba thušago, eupša ga se ra swanela go ba gapeletša gore ba fetoge. Re tlo thaba ge batho bao re bolelago le bona ba amogela seo re ba botšago sona.

BOGELANG BIDIO YA HWETŠA LETHABO MODIRONG WA GO DIRA BATHO BARUTIWA—KAONEFATŠA BOKGONI BJA GAGO BJA GO RUTA—BONTŠHA KWELOBOHLOKO, KE MOKA LE ARABENG DIPOTŠIŠO TŠE:

• Maki o bontšhitše bjang kwelobohloko ge Jane a be a latetšwe?

• Maki o ile a bontšha Jane kwelobohloko bjang ge a be a mmotša gore a ka se kgone go bala ka gobane o na le stress?

• Maki o ile a bontšha bjang kwelobohloko ge Jane a be a mmotša gore bophelo bja gagwe bo hlakahlakane?