Re diriša matla a rena gabotse ge re ipeela dipakane tirelong ya Jehofa. (1Ko 9:26) Ka ge bofelo bo le kgauswi, dipakane di tla re thuša go diriša nako ya rena gabotse. (Ef 5:15, 16) Borapeding bja lena bja lapa, le ka boledišana ka dipakane tšeo le ka ipeelago tšona ngwageng o moswa wa tirelo. Go le thuša go dira seo, pukwana ye ya seboka e na le dihlogwana tše mmalwa tšeo di bolelago ka dipakane tšeo le ka naganišišago le go rapela ka tšona.—Jak 1:5.

Ka mohlala, na le ka thuša o tee ka lapeng gore e be mmulamadibogo wa ka mehla? Ge e ba o bona o ka re o ka se kgone go fihlelela diiri tšeo di nyakegago, boledišana le mmulamadibogo yo a lego maemong a go swana le a gago. (Die 15:22) Mohlomongwe le ka boledišana le mmulamadibogo yo mongwe nakong ya borapedi bja lena bja lapa. Ke moka le ngwale mananeo ao le ka a dirišago. Ge e ba o kile wa ba mmulamadibogo, na maemo a gago a ka go dumelela go tšea bobulamadibogo gape?

Na ba bangwe ka mo lapeng ba ka kgona go tšea bobulamadibogo bja go thuša kgwedi goba go feta moo? Ge e ba o se na matla, o ka kgona go tšea bobulamadibogo bja go thuša ka go fetša nako e nyenyane letšatši le lengwe le lengwe tšhemong. Ge e ba o se na nako ya go ya tšhemong gare ga beke ka gobane o šoma goba o tsena sekolo, mohlomongwe o ka kgetha go tšea bobulamadibogo ka kgwedi ya go ba le maikhutšo goba ya go ba le mafelobeke a mahlano. Ngwala khalentareng gore o nyaka go tšea bobulamadibogo bja go thuša neng, ke moka o itirele lenaneo.—Die 21:5.

BOGELANG BIDIO YA E BA LE SEBETE . . . GE E BA O LE MMULAMADIBOGO, KE MOKA LE ARABENG POTŠIŠO YE:

• Phihlelo ya kgaetšedi Aamand e go bontšha bjang gore Jehofa o rata le go hlokomela bao ba itimago dilo tše dintši gore e be babulamadibogo?