Batswadi bao ba ratago Jehofa ba kganyoga go bona bana ba bona ba hlankela Jehofa. Batswadi ba ka thuša bana ba bona go hlankela Jehofa ka go ba ruta Beibele go tloga e sa le ba banyenyane. (Doi 6:7; Die 22:6) Na go dira seo go nyaka boikgafo? Ee, bo a nyakega! Eupša boikgafo bjo e ka se be bja lefeela.—3Jo 4.

Batswadi ba ka ithuta mo gontši go Josefa le Maria. Ba be “ba tlwaetše gore ngwaga o mongwe le o mongwe ba ye Jerusalema monyanyeng wa Paseka,” gaešita le ge go dira bjalo go be go nyaka boikgafo le tšhelete. (Lu 2:41) Go bonagala Josefa le Maria ba be ba tshwenyegile kudu ka gore lapa la bona le be le tswalano ya kgauswi le Jehofa. Ka mo go swanago, lehono batswadi ba ka thuša bana ba bona gore ba hlankele Jehofa ka gore ba diriše sebaka se sengwe le se sengwe go ba ruta le go ba beela mohlala o mobotse.—Ps 127:3-5.

BOGELANG BIDIO YEO E REGO, BA ILE BA DIRIŠA SEBAKA SE SENGWE LE SE SENGWE, KE MOKA LE ARABENG DIPOTŠIŠO TŠE DI LATELAGO:

• Jon le Sharon ba ile ba tšwela pele ba hlankela Jehofa bjang ge ba be ba godiša bana?

• Ke ka baka la’ng batswadi ba swanetše go nea ngwana yo mongwe le yo mongwe tayo ka tsela yeo e mo swanetšego?

• Batswadi ba ka thuša bana ba bona bjang gore ba dule ba tiile tumelong ge ba kopana le diteko?

• Ke dilo dife tšeo mokgatlo wa Jehofa o di tšweleditšego tšeo o kilego wa di diriša go thuša bana ba gago gore ba gole moyeng?