LEBAKA LEO GO LEGO BOHLOKWA: Go dira thuto ya motho ka noši go re thuša go hwetša ditherešo tša Beibele le go “kwešiša ka mo go feletšego seo e lego bophara le botelele le bophagamo le go iša” ga ditherešo tše. (Ef 3:18) E bile e re thuša gore re dule re sa solege le ge re phela lefaseng le le tletšego bobe le go “[Swarelela] ka go tia lentšung la bophelo.” (Fil 2:15, 16) Ge re dira thuto ya motho ka noši, re ka kgona go ikgethela kgatišo yeo re nyakago go ithuta Beibele ka yona. Bjale re ka dira’ng gore re holege kudu ge re bala Beibele?

RE KA DIRA SEO BJANG?

• Thalela ditemana tša Beibele gomme o ngwale dintlha tšeo o di hweditšego, o ka ngwala dintlha tšeo letlakaleng goba sedirišweng sa gago sa elektroniki.

• Ge o dutše o bala Lentšu la Modimo, ipotšiše dipotšišo tša go swana le gore: ‘Go bolelwa ka mang? Ka eng? E diregile neng? Kae? Ka baka la’ng? Bjang?

• Nyaka ditaba ka botlalo. Ge o dira nyakišišo ka didirišweng tšeo mokgatlo o re neilego tšona, šomiša sehlogo goba temana ya Beibele

• Naganišiša ka taba yeo o e balago gomme o ipotšiše gore o ka e diriša bjang bophelong bja gago

• Diriša seo o ithutago sona letšatši le letšatši.—Lu 6:47, 48

BOGELANG BIDIO YEO E REGO, SWARELELA “KA GO TIA”—KA GO BA LE THUTO YA MALEBA YA MOTHO KA NOŠI, KE MOKA LE ARABENG DIPOTŠIŠO TŠE DI LATELAGO:

• Bana babo rena ba bangwe ba re’ng ka thuto ya motho ka noši?

• Ke ka baka la’ng re swanetše go thoma ka thapelo pele re dira thuto ya motho ka noši?

• Re ka dira’ng gore re kwešiše pego e itšego ya Beibele?

• Re ka swaya Beibele ya rena bjang?

• Ke ka baka la’ng go le bohlokwa gore re naganišiše ge re ithuta Lentšu la Modimo?

• Re swanetše go dira’ng ka seo re ithutago sona?