Ge Jehofa a be a kgopela Moshe gore a yo ntšha setšhaba sa gagwe kua Egipita, mathomong Moshe o be a nagana gore a ka se kgone go dira bjalo. (Ek 4:10, 13) Na le wena o kile wa ikwa eka o ka se kgone go phetha kabelo e itšego? Na o ithuta Beibele le Dihlatse tša Jehofa ? Na o ipotšiša ge e ba o tla tsoga o kgonne go bolela ditaba tše dibotse ka ntlo le ntlo? Goba mohlomongwe o mofsa yo a tšhabago go botša bana bao o tsenago le bona sekolo ka Modimo. Goba mohlomongwe o a tšhoga ge o swanetše gore o bolele ditaba tše dibotse ka founo goba mafelong a batho bohle. Ge e ba go le bjalo, rapela Jehofa gore a go thuše ka moya wa gagwe o mokgethwa. (1Pe 4:11) Kgodišega gore o tla go thuša go phetha kabelo le ge e le efe yeo a go neago yona.​—Ek 4:11, 12.

BOGELANG BIDIO YEO E REGO, EBA LE SEBETE . . . GE E BA O LE MOGOELEDI, KE MOKA LE ARABENG DIPOTŠIŠO TŠE DI LATELAGO:

• Kgaetšedi Aoyama o be a lebeletšane le bothata bofe?

• Ke’ng seo se mo thušitšego gore a be le sebete?—Jer 20:7-9

• Go hlankela Jehofa ka mo go oketšegilego go mo hotše bjang?

• Ke mathata afe ao Jehofa a ka go thušago go lebeletšana le ona tšhemong?