BOPHELO BJA BOKRISTE
Thuša Lapa la Gago go Gopola Jehofa
Jeremia o ile a newa taelo ya gore a lemoše Bajuda gore ba be ba tlo fedišwa ka gobane ba lebetše Jehofa Modimo wa bona. (Jer 13:25) Go tlile bjang gore tswalano ya setšhaba se le Modimo e senyege ka tsela ye? Malapa a Baisiraele a be a se sa hlankela Modimo gabotse. Go bonagala dihlogo tša malapa di be di sa latele tlhahlo ya Jehofa yeo e lego go Doiteronomio 6:5-7.
Lehono malapa ao a tiilego moyeng a bopa diphuthego tše di tiilego. Dihlogo tša malapa di ka thuša malapa a tšona go gopola Jehofa ka go swara Borapedi bja Lapa ka mehla le go dira gore e be bjo bo holago. (Ps 22:27) Ka morago ga go bogela bidio yeo e rego “Mantšu . . . a o a Bee Pelong ya Gago”—Dipoledišano le Malapa, arabang dipotšišo tše di latelago:
-
Malapa a mangwe a ile a fenya bjang mathata ao a tlwaelegilego tabeng ya borapedi bja lapa?
-
E mengwe ya meputso ya go swara Borapedi bja Lapa ka mehla le bjo bo holago ke efe?
-
Ke na le mathata afe tabeng ya borapedi bja lapa, gona ke tlo a rarolla bjang?