BOPHELO BJA BOKRISTE

Kamoo re ka Ithutago go Rata Modimo le Baagišani ba Rena

BAPALA

Le ge Bakriste ba se sa latela Molao wa Moshe, ditaelo tša wona tše kgolokgolo e lego go rata Modimo le go rata baagišani ba rena, di re thuša go bona seo Jehofa a nyakago re se dira. (Mat 22:37-39) Se ga se fo itiragalela. Ke selo seo re swanetšego go ithuta sona. Re ka ithuta sona bjang? Tsela e nngwe ya bohlokwa ke ka go bala Beibele letšatši le letšatši. Ge re ithuta dikarolo tše di fapafapanego tša semelo sa Modimo tšeo di hlaloswago ka Mangwalong, re bona “botse bja Jehofa.” (Ps 27:4) Ka baka leo, re mo rata le go feta gomme ra thoma go nagana go swana le yena kutšwanyana. Se se re tutueletša go kwa ditaelo tša Modimo, go akaretša le taelo ya gore re bontšhe ba bangwe lerato la kgonthe. (Joh 13:34, 35; 1Jo 5:3) Ka mo tlase go na le ditšhišinyo tše tharo tšeo di ka re thušago go thabela go bala Beibele.

Bona seo o se balago ka leihlo la kgopolo gomme o diriše dikwi tša gago. Ipone o le moo tiragalo yeo e diregago. O tla bona’ng, wa kwa’ng le go kwa monkgo wa mohuta ofe? Bao go bolelwago ka bona ba ka ba ba ile ba ikwa bjang?
Diriša mekgwa e sa swanego. O ka diriša mekgwa e latelago: Balela godimo, goba o theetše mmalo wo o rekhotilwego ge o dutše o bala. Bala ka motho yo a itšego wa ka Beibeleng goba ka taba e itšego go e na le gore o bale dikgaolo ka tsela yeo di latelanago ka yona. Ka mohlala, ithute ka Jesu o diriša Lemetletšo 23 ka go Phetolelo ya Lefase le Lefsa ya Mangwalo a Makgethwa goba Karolo 16 ka pukwaneng ya Tlhahlo ya go Ithuta. Bala kgaolo ka moka yeo temana ya letšatši e tšerwego go yona. Bala dipuku tša Beibele ka tatelano yeo di ngwadilwego ka yona.
Balela go kwešiša. Go kaone kudu gore o bale kgaolo e tee letšatši le lengwe le le lengwe gomme o e kwešiše go e na le go bala dikgaolo tše dintši gore o fetše Beibele. Nagana ka gore taba yeo o e balago e diragetše ka tlase ga maemo afe. Nyakišiša ditaba ka botlalo. Diriša mebapa le ditemana tše dingwe tšeo di sepedišanago le taba yeo o e balago. Nyakišiša bonyenyane taba e tee yeo o sa e kwešišego. Ge e ba go kgonega, nako ya gago ya go bala e lekane le ya go naganišiša.