KE KA BAKA LA ENG GO LE BOHLOKWA?: Lengwalo la 1 Bakorinthe ke le lengwe la mangwalo a 14 ao Moapostola Paulo a ilego a a ngwalela Bakriste gotee le yena gore a ba kgothatše. Ge motho a ngwala lengwalo, o ba le nako ya go kgetha mantšu gabotse, e bile motho yoo a le hwetšago a ka le bala gantši. Re ka kgona go botša ba leloko le bagwera ba rena ditaba tše dibotse ka go ba ngwalela mangwalo. Le gona re ka kgona go ngwalela le batho bao re sa kgonego go bolela le bona ka go lebanya. Ka mohlala, motho a ka ba a ile a thabela molaetša wa rena eupša a se sa hwetšagala gabonolo. Batho ba bangwe ga ba hwetšagale ka ge ba dula dintlong goba mafelong ao go lego thata go tsena go ona, ka ge ba dula dintlong tšeo di šireleditšwego ke masekhurithi goba ka ge ba dula mafelong a kgole. Ke eng seo o swanetšego go dula o se gopola ge o ngwalela motho yo o sa mo tsebego lengwalo?

KAMOO O KA NGWALAGO LENGWALO KA GONA:

• Ngwala seo o bego o ka se bolela ge o be o na le motho yoo. Mathomong a lengwalo, itlhalose gore o mang le gore ke ka baka la’ng o ngwadile lengwalo leo. Mohlomongwe o ka botšiša motho yoo potšišo yeo a ka naganišišago ka yona gomme o mmotše ka karolo yeo e rego, Ithute Beibele Inthaneteng o le Noši. Ke moka mmotše gore re ithaopela go ithuta Beibele le batho ka magaeng a bona, ke moka o mo ngwalele tše dingwe tša dihlogo tšeo di lego ka gare ga dikgatišo tša rena tšeo re ithutago Beibele le batho ka tšona. O ka tsenya karata ya jw.org, taletšo goba pampišana ka lengwalong leo

• Ngwala lengwalo le le kopana. Ge o ka ngwala le le telele, motho yo a le balago a ka lapa go le bala. Bona sehlogo seo se rego Kamoo o ka ngwalago lengwalo

• Bala lengwalo leo gore o kgone go lokiša diphošo. Kgonthišetša gore lengwalo leo le a kwagala, le na le bogwera, le a kgothatša le gore ditaba tšeo o di ngwadilego ga di kgopiše mmadi. Kgomaretša ditempe tše di lekanego enfelopong. Ge e ba o sa dire bjalo, motho yoo o mo ngwaletšego a ka patedišwa tšhelete yeo e šotago